Read Tobelo O NEHEMIA 6 Bible Online

O NEHEMIA 6 - Tobelo bible

O NEHEMIA 6

¹O Sanbalat, o Tobia, o Gesyem de tongomi mia haturu-haturu mahomoa yoihene ngomi miaböto mihigoko okali o bebeno o mehele, de mata-mata mapidaha itamunoka, ngaroka o öraha gënanga ngomi mihi pake uahi o ngorana mabebeno-bebeno o kota mangorana ma ago-agomo mangora-ngoranoka.

²Daha o Sanbalat de o Gesyem ihi dingoto o gogahoko ngohino hupaya toboa miadiai o doomu dede önanga o kapongo moioka o Ono ma Waioka. Mä ngohi tohi öriki önanga yomau ihihibodito ngohi.

³Hababu gënanga tohi dingoto o bobaluhu nënanga onangika, ”Ngohi takunua taika karana magogiria miadiai o manarama ilö ago-agomo. O manarama gënanga aha itogumu nako tamal̄a mangale homakamake dede ngini.”

⁴Hiädono ihi gali maiata önanga ihi dingoto o gogahoko kaima tero ngohino, de mahi geto-getongoli tobaluhu kaimatero.

⁵Higali mamotoaka o Sanbalat ainyawa womatengo woboa de wohi döaka o hurata wohitotararonuku,

⁶madol̄a hoko nënanga: ”O Gesyem wohi goungu naga o abari o hidal̄okoka hagala o hoana manga hidogoronaka yakilolitino nënanga, yotemo Riadodoto de mata-mata o Yahudioka manyawa himakatatoro nima lawani, de gënanga hababu Riadodoto nihigoko okali o kota ma bebeno o mehele. Unanga wotemo o Riadodoto nomau noma goraka ani diri nodadi o Yehuda manga Koano,

⁷de nätumutoka o nabi yamuruono naga mangale ini tede Riadodoto o Yerusalemoka. O abari o hidal̄okoka gënanga maraioka aha yadono makoanoika. Hababu gënanga, noboa mangale hohidatoro o hali gënanga.”

⁸Mä ngohi tohidingoto mabobaluhu nënanga, ”Mata-mata Riadodoto notemo gënanga, o demo ielu-eluku de o abari itotiaiua Riadodoto mahirete.”

⁹Onanga imitaili imihi kokamodongo ngomi hupaya ngomi mia togumu o manarama gënanga. Ngohi toma niata, ”Ya Jou Madutu, Nohihi kuata ngohi!”

¹⁰O öraha gënanga dika magoronaka, ngohi toiki o Semaya ai tauika o Delaya aingohaka o Mehetabeel ai danongo, karana ünanga wamake o dagahanga woboa ngohino. Wato ngohino, ”Naino ngone inahinoto hoiki homangiunu ma Jou Ai Tauoka. Ngone hakusi mangorana mata-mata, hababu naga o nyawa yomau ini toma ngona. Mudukua o hutu nënanga ngona aha ini toma.”

¹¹Mä ngohi tohaluhu, ”Ngohi nënanga koigoungua o nyawa yoigo ihi oa-oara manga diri. Hokä o nyawa biaha ngohi takunua tongohama ma Jou Ai Tau, done ngohi tohonenge. Kowali, ngohi toluku!”

¹²Ta tiba-tibanga o hali gënanga ibotino, ngohi tamao o Semaya ai higaro gënanga ma Jou Madutu inoua, maʼ o Tobia de o Sanbalatino. Onanga iwi uru bokumoka o Semaya mangale wohiädono o hidodemo gënanga ngohino.

¹³Toönanga manga dungutu enagënanga hupaya ngohi tohawana de tamoteke toönanga manga damake hiädono todiai o baradoha. De hoko gënanga önanga yamake o öraha yadadi dorou ahi romanga hiädono ngohi todadioka o nyawa manga uru madekaroka.

¹⁴Ngohi toma niata, ”Ya Jou Madutu, Nohininga okia yadodiai o Tobia de o Sanbalat gënanga. Nahukumu önanga! Hoko gënangö manabia ami romanga o ngo Noaja de o nabi-nabi mahomoa yomau ihihikoki modongo ngohi.”

¹⁵Ihigoko okali o bebeno o mehele gënanga yaol̄omo maöraha o wange moritoa de hinoto, de iböto o Elul mamede mawange monaoko de motoaoka.

¹⁶Maöraha mia haturu-haturu hagala o hoana manga hidogoronaka imihi gilolitino genangoka yoihene o hali gënanga, önanga yohawana yamake o mal̄eke, hababu mata-mata o nyawa ihi öriki o manarama gënanga yadiai de ma Jou Madutu Ai Roriwo.

¹⁷O öraha utu gënanga o Yahudi manga tutuda-tutuda kayodiaiohi ima kokuhurata de o Tobia.

¹⁸Manga ngöe o Yahudioka manyawa imateke dodiawo de o Tobia, karana ünanga ai toroa o Sekhanya o Arah aingohaka. Ikali o Yohanan, o Tobia aingohaka, wokawingi de o Mesulam o Berekhya aingohaka ngoi ora.

¹⁹Ngaroka o Tobia hoko genangika wotulihi o hurata ngohino, mangale wohihikoka modongo ngohi, mä o Yahudioka manga tutuda-tutuda gënanga yaheto-hetongo ahi himangoka hagala o Tobia ai oa-oa. Mahomoa gënanga mata-mata totemo-temoka, önanga ihi ngahu unangika.