Read Tobelo O NEHEMIA 9 Bible Online

O NEHEMIA 9 - Tobelo bible

O NEHEMIA 9

¹Mawange monaoko de iatoka o mede o gënanga, o Israeloka makawaha imatoomu. Onanga yopuaha mangale ihidumutu imatoduba mangale toönanga manga baradoha. Onanga imahitingaka manga diri de o nyawa maporetino mata-mata. Hokä manonako manga hininga ihuha, önanga imahinoa o pakeanga o karongo de yoderero manga häekuku de o tonaka. Ipaha önanga imaoko de imangaku hagala toönanga manga baradoha de toönanga manga ete de manga tohora manga baradoha.

³Madekanino done ho jam hange, ma Jou Ai Tita mabuku, toönanga manga Jou Madutu, yadabasa onangika de o jam hangeinoli madekanino önanga imangaku toönanga manga baradoha. Iböto gënanga önanga imahi tudukuku deʼ iwihuba ma Jou, toönanga manga Jou Madutu.

⁴Genangoka naga o mimbar mangale hagala o Lewi manyawa de mal̄okuoka imaokoino o Yesua, o Bani, o Kadmiel, o Sebanya, o Buni, o Serebya, o Bani de o Kenani. De manga ilingi makuatile önanga imä niata ma Jouika toönanga manga Jou Madutu.

⁵O puji o wange gënanga yamulaenge hagala o Lewi manyawa neönanga nënanga: o Yesua, o Kadmiel, o Bani, o Hasabneya, o Serebya, o Hodia, o Sebanya de o Petahya. Onanga yotemo, ”Nimaoko de niwihigiriri ma Jou tongone nanga Jou Madutu Nihidöaka o higiriri Unangika kahi ado-adonika! Nihigiriri Ai romanga iomanga o mulia. Ai romanga ikuata, yatilakuru hagala o higiriri!”

⁶Ipaha o Israeloka makawaha imaniata hoko nënanga, ”Ngona Jou, ka Ngona noma Tengo-tengoka Nohidadioka o murumu de o gitowa ingodumu, o ngöto de o dunia ikali hagala madol̄a, daha Nohidöaka o ngango de Napaliara. Ngonaika hagala o kuaha o dihangoka itilabuku ini huba; önanga yoponu Ngonaika de manga buku itilabuku.

⁷ Ngona o Jou Madutu, o Jou noma Tengo-tengoka. Ni iriki o Abram ai hoana manga hidogoronaino. O Ur o Babiloka wamal̄aka, karana Ngona mahirete Nituda. Daha Nihidöaka unangika o romanga mahungi: o Abraham, gënanga iwihetongo mulaenge o öraha gënanga.

⁸ Ni make ünanga wosetia Ngonaika deʼ wonihi ngounu. Daha Nodiai dede unanga o jaji ibitu-bitumu. O Kanaan matonaka, o Het de o Amori. O Feris matonaka, o Yebus de o Girgasi, mata-mata gënanga Nomau Nihidöaka unangika: hokä manga gogere mangï aidifauku yongodumu. Ipaha Nohitotomo o jaji gënanga unangika, hababu Ngona Noadili de Nosetia.

⁹ Namake manga hangihara tongomi mia ete de mia tohora maöraha ipaha-paha; Noihene manga gari o Mesiroka deʼ o Teberau ma Ngötoka.

¹⁰ O Mesir manga koanoika Nadiai o hali-o hali kabiahaua, ai pegaweikaö ikali o kawaha ai bereraka, hababu Nohi öriki sarakia Ani umati önanga yahangihara. Daha Ani romanga kaya heto-hetongo hiädono o wange nënanga.

¹¹ Mangale Nadiai o ngekomo Ani umatika, Nabelaka o ngöto; Nahitoaka önanga yatilakuru o ngöto matore-tore yapehakua. Yagoginïki yälutu o akere maluku-lukuku hokä o helewo yalutu o ngöto hoboborohonuku.

¹² De moi o lobi Natuda önanga o wangeoka. De öraha o hutu-hutu manga ngekomo Nohi tararono de o liate o uku.

¹³ O dihangoka de Nauku Nouti o Sinai ma l̄oku ma l̄okuku, daha Natemo-temo de Ani umati mahirete. Nahi döaka o tita, o datoro de o pareta iadili, itiai de ifaida.

¹⁴O Sabat mawange itebi-tebini kiani önanga ihimulia, de itilakuru o Musa Ani tita Nohidöaka.

¹⁵ Maöraha önanga yahahini de koiwa manga inomo, o roti o dihangoka deyauku Nohiguti. De o helewoino mangumu-ngumutu, iputurungu de madodogowini o akere yaai-aiki o kiriti madudungu Nohi hahahuru deʼ makuata. Nähuloko önanga yogogere o tonaka Nohi jajaji onangika de makoboto.

¹⁶ Mä tongomi mia ete de mia tohora manga hininga ikurutil̄e de manga hininga itogowini; hagala Ani pareta önanga ihi ngounua.

¹⁷ Onanga yotomotekua, hagala Ani oa-oa yawohanga, deʼ mata-mata Ani manarama ihera-heranga ihihanga manga hiningaka. De manga edenge önanga iwi iriki womatengo manga baluhu, mangale waao önanga o Mesirika, ima idulu yodadi o gilaongo. Mä Ngona Jou Madutu Noigo Nohi apongo, Ani sabar ikurutu, Ani hininga i mura de Ani dora itotomo. Ani dora igoungu kabiahaua; Ngona Namal̄aikaua önanga.

¹⁸ Onanga yodiai o gomanga maduku o hapi. Daha önanga yotemo, ’Nenangala nia Jou Madutu, iniao-ao ngini o Mesirino nihupu, gilaongo mangino.’ Ya Jou Madutu, Ngona mahirete Nahikauku önanga!

¹⁹ Mä o tonaka makokakahaka gënanga önanga Namal̄aikaua, karana Ngona ini omanga o hayanga de o dora. O liate o lobi de o uku Narahukoka uaoli, toönanga manga ngekomo mahidumutu o wangeoka de o hutu-hutu.

²⁰De Ani kuaha maoa-oa Nadotoko önanga. Onanga yol̄omo o manna de yokere o akere yaoaka.

²¹O taongo moruatino madekana o tonaka makokakahaoka, Nahidöaka yaoaka hagala toönanga manga paralu. Toönanga manga pakeanga komaiwahi itorou, toönanga manga l̄ou yohiriua ekola il̄oboho.

²² Nahidöaka onangika o utumu mangale o pareta de o hoana mangöe toönanga manga tonaka maribatingoka. O Hesbon ma Koano Sihon ai berera, önanga yogogere; O Basan ma Koano Og ai berera, önanga imahi ngï.

²³ Nahidadi toönanga manga difauku ima daene mangöe hagala o murumu o gitawaoka. Nahidöaka önanga o tonaka mangale yogogere, o tonaka Nahi jajioka manga ete de manga tohoraika.

²⁴ Toönanga manga difauku yahohowono o Kanaan matonaka; manyawa dokengoka Ngona Naponu. Ani umati Nahidöaka o kuaha yodiai manga hininga mahuka hagala o Kanaan mahoana de manga kokoanoika.

²⁵ Ani umati yäora o bebeno o mehele imahitö tatatoko, o tonaka iboburere de o tau iomanga o kaya. Hagala o humu de o akere malako önanga yasita, o anggur madumule, o zaitun mautu de hagala o hohoko mahomoa. Onanga yoburere karana yol̄omo manga hininga mahuka. Hagala Ani ngongike ma oa-oa önanga yajame.

²⁶ Mä Ani umati imalawani de inihingounua, yolegaikaua Ani tita de Ani datoro, yatoma o nabi-nabi yahidö döa-döaka o hohininga, deʼ yahuloko önanga yolio Ngonaika, manga Jou Madutu. Ya Jou, higali magetongo Ngona inihikauku önanga,

²⁷done Nahilapahi önanga manga haturuika de mahayanga koiwa yakuaha de yatuku. Mä o huha yatuku magoronaka, önanga imahi böaka Ngonaika yogahoko o roriwo. O horogaka Ngona Noihene de Ani dora itototomo Nohidöaka mabobaluhu. Nahidingoto o tutuda de yonau-nauru yahilapahi önanga manga haturuino.

²⁸Mä maöraha manga berera irïdi okali, önanga de majapatioka yobaradohali. Done nahilapahiokali önanga manga haturuika yatö tuku-tuku. Mä, maöraha önanga imamao de manga doduba itototomo, önanga imahi boaka Ngonaika yogahoko Nahihalamati. Done o horogaka de Ngona Noihene de Nariwo Nogogilio, hababu Ngona Nädora onangika deʼ duruhe Nahayanga.

²⁹ Nataaere önanga hupaya Ani dodotoko ihingounu, mä önanga yatila Ani tita de manga hininga magurutil̄e. Ena hioko, nako Ani tita yadiai, maraioka aha manga wowango yaoa. Onanga manga häeke irihiki de manga hininga itogowini, yoluku yoihene, yoluku ihingounu.

³⁰ O taongo itagali o taongo Ngona Nosabari Nahidöaka o hohininga; itilakuru o nabi-nabi, Ani Womaha yatemo onangika. Mä Ani umati gënanga yatamunu manga ngauku, daha Nahilapahi hagala o hoanika hagala o berera.

³¹Mä karana Ani dora ilamoko kabiahaua, Na mal̄aikaua ekola Nawedere önanga. Igoungu, Ngonala o Jou Madutu koiwa nimaketero; Ani dora de Ani hayanga ilamoko, Ani dora de Ani hayanga itototomo!

³² Ya Jou Madutu, tongomi mia Jou Madutu Nokua-kuata! O Jou Madutu Nolö amo-amoko de Nokuaha! De Ani setia Nasö hagala o jaji; hagala Ani jaji Nohitotomo deʼ Nadiai. Mulaenge maöraha o Asyur makokoano imituku ngomi hiädono öraha nënanga, o hangihara mangöe ngomi mia mao. Tongomi mia kokoano, mia imam-imam, mia nabi de mia balu-baluhu, mia ete de mia tohoraö de o kawaha, yatagongoka o hangihara mata-mata. Uha Nawohanga hagala o hangihara gënanga! Uha Nahihanga Ani Hohiningaoka.

³³Ani manarama iadili, Nomi hukumu ngomi mibobaradoha; Ngona kahirahi Nosetia ngaro ngomi imi omanga mitiaiua.

³⁴Tongomi mia ete de mia tohora, mia koano, mia imam, mia balu-baluhu, yatilakuru Ani tita ikali yolegaikaua. Hagala o pareta de o dodaaere Nohidö doa-doaka, yahaduliua, yolega ikauaoli.

³⁵Nahibarakati o kokoano yapopareta Ani umati, maöraha önanga yogogere o tonaka malua-luasoka de maboburere Ani Ngongike. Mä önanga yamal̄aua o ngango itotorou, yoluku imahigilaongo Ngonaika ikali yopuji.

³⁶Done öraha nënanga ngomi nënanga midadi o gilaongo o tonakoka Nomihi döa-döaka hokä o puhaka. O tonaka nënanga iburere, i omanga de mahasili, kokiani ngomi mia jame.

³⁷Hagala o hasili mia make-make o tonakino nënanga kiani mihilapahi o berera makokoanoika. Yokokokuaha gënanga Na goraka mangale Ani umati, hokä mahukumanga tongomi mia baradoha Ngonaika. Onanga yopareta manga hininga mahuka mangale tongomi mia diri de tongomi mia aiwani o gigini. Hababu gënanga öraha nënanga mia tagongo o hangihara, iomanga o hidehoto de o duka!”

³⁸Matiti hagala idadadi gënanga, ngomi o Israeloka makawaha midiai o jaji ibitu-bitumu de miatulihi, de yacapu tongomi mia tutuda-tutuda, hagala o Lewi manyawa deʼ womatengo tongomi mia imam.