Read Tobelo O NGO ESTER 2 Bible Online

O NGO ESTER 2 - Tobelo bible

O NGO ESTER 2

¹O öraha murono naga ipahaika, ngaro ma koano wongamokaua, ünanga kawa tiba-tibangohi ma Jou Boki o ngo Wasti ami manarama deʼ wodiaioka munangika.

²Hababu gënanga yononasihati itö tigi-tigi deʼ ma koano yogahoko hoko nënanga, ”Kayooa ini lingiri o moholehe yohöhailoa mangale Jou Koano.

³Kokiani Jou Koano nägoraka o pegawe-pegawe hagala o propinsi o paretaka nënanga mangale yalingiri o momoholehe yohöhailoa daha yaao önanga mata-mata ongoheka manga kadatoika o Susanoka nënanga. O Hegai, o pegawe ipöparalu wodadi ongoheka manga kadato matau manyawa manga häeke, aha wahidailako önanga deʼ wahidöaka o pake önanga yohailoa.

⁴Iböto gënanga, kokiani Jou Koano nomi iriki o moholehe Jou Koano duru nomi igo-igo, deʼ nomihidadi munanga o Jou Boki hokä ami dagali ma Jou Boki ongo Wasti.” Ma Koano wohi goungu o nasihat gënanga deʼ wadiai.

⁵O Susan makotaka gënanga naga o Yahudioka womatengo ai romanga Mordekhai o Yair aingohaka. Unanga o Kis deʼo Simei manga difauku o Benyamin ai ahalino.

⁶ O Mordekhai iwi tagokoka maöraha o Nebukadnezar, o Babel manga koano wautumu o Yerusalem. O Mordekhai iwitingaka o Babelika kamamoi deʼ o Yoyakim, o Yehuda manga koano, deʼ kamanga ngöe yatago-tagokino mahomoa.

⁷To ünanga ai riadodoto o ete moi, momatengo o moholehe ami biono ihailoa deʼ ami roëhe irahai, ami romanga o ngo Ester, mä ami romanga o Ibranioka o ngo Hadasa. O ngo Ester ami dimono yokoki honengoka deʼ munanga modadi o Mordekhai ai ngohaka womagorakil̄e deʼ womi paliara hokä aingohaka madutu.

⁸Ma koano aipareta ihingahu ibötino, o momoholehe manga ngöe yätoomu o Susanoka de o ngo Ester naga toönanga manga hidogoronaka. Munangö imiao ma koano ai kadatoika de iwihi gogoana o Hegaika o ngongoheka manga kadato matau manyawa manga baluhu.

⁹O Hegai wokiriri womi make o ngo Ester de womi igo munangika. De madataitoka o moholehe gënanga imihi döaka o hailoa mapake-pake ikali o inomo ihitö tinga-tingakoka. O ngo Ester imi tururu o ngï duru irorahaika o ngoheka manga kadatoka gënanga de o moholehe yatumidi duru yososawaro de yotötai-taiti ma koano ai kadatoka yähuloko mangale imi leleani munanga.

¹⁰Mangale o Morderkhai ai nasihati, o ngo Ester momahi ngahua munanga o Yahudioka manyawa.

¹¹O Mordekhai wotagi-tagi o ngoheka manga kadato malooa mahimangoka gënanga mangale womï leha ami öraha o ngo Ester de okia aha idadi dede munanga.

¹²Imoteke o datoro, o ngongoheka yahidöaka o hailoa mapake o taongo moino madekana: o mede butangaino de minya ihi gö ganu-ganu o manyanyi, de o mede butanga ituruino de o minya iganu-ganu o minya mabou-bounu mahomoa. Iböto gënanga, o moholehe magetongo yamake o hidoku mangale iwi himanga ma Koano Ahasyweros.

¹³Maöraha momatengo o moholehe mihimanga ma koano, munanga yakunu momahi pake okia dika imamoteke ami mau.

¹⁴Maöraha o hutu-hutu munanga imi ao ma koano ai kadatoika, de iyarehino munanga imi ao o kadato mahomoaika, de wohi dailako o Saasgas, womatengo o pangkati ikokurutil̄e wahi dö dailako ma koano ai heka-hekata paliara. O moholehe gënanga aha mihimangoka uaoli ma koano, sowaliua nako ma koano womimau de womi ahoko munanga de wahetongo ami romanga.

¹⁵Done yadono o ngo Ester ami hidoku mangale mihimanga ma koano — o ngo Ester ganga o Abihail ngoi ora de o riododoto o ete moi de o Mordekhai woma gorakil̄eoka hokä aingohaka mahirete; o ngo Ester imihi giriri moi-moi o nyawa imi make munanga. Maöraha munanga moiki mihimanga ma koano, o ngo Ester moma pakeanga imamoteke ahi dumutu de ai nasihati o Hegai, o ngoheka manga kadato mabaluhu.

¹⁶Hoko gënanga, mataongo tumidoka aipareta o Ahasyweros o mede mangimoioka, enagënanga o Tebet mamede, o ngo Ester imiao mihimanga ma Koano Ahasyweros ma koano ai kadatoka.

¹⁷Munanga misanangi de mihi utumu ma koano iholoi de o momoholehe mahomoa. Hababu gënanga munanga duru womi dora de womi hayanga ma koano. Daha ma koano womihi pake o popareta mamakota o ngo Ester ami häekoka de womihi dadi munanga Jou Boki momi tagali ma Jou Boki o ngo Wasti.

¹⁸Iböto gënanga, ma koano wodiai o rameanga ma ago-agomo hokä o horomati o ngo Esterika de wä ahoko mata-mata o pegawe ikali ainyawa yolago-agomo. Unanga wohi ngahu mawange imatogumu o pareta ingodumu de yahikodoku o hadia de maboboloi.

¹⁹O öraha utu gënanga o Mordekhai wigorokoka ma koano wodadi o berera mapegawe.

²⁰O ngo Esterö momahi ngahuuahi munanga o Yahudi manyawa, hababu o Mordekhai womï duhunu. O ngo Ester mihi ngounu o Mordekhai hokä maöraha munanga kamo etekohi de womi paliara ami iranga o ete moi gënanga.

²¹O wange moiuku, maöraha o Mordekhai magogiria womanarama o kadatoka, ma koano ai pegawe yokokurutil̄e yahinoto, enagënanga Bigtan de o Teres, imahigaro madorou yomau iwi toma ma Koano Ahasyweros, karana önanga duru iwidohata.

²²Manga datoro gënanga wohioriki o Mordekhai de ünanga de majapatioka wohiädono o ngo Esterika. Ma umo-umoua o öraha, o ngo Ester mohiade-ade ma koanoika okia wohiö ori-oriki o Mordekhai gënanga.

²³O perekara gënanga yatailako de madiai, daha inyata o hingahu gënanga itiai. Yahinoto gënanga yatulihi o pareta masejara mabuku magoronaka.