Read Tobelo O NGO ESTER 5 Bible Online

O NGO ESTER 5 - Tobelo bible

O NGO ESTER 5

¹O wange mahangeoka mopuaha, o ngo Ester momahi noa o Jou Boki mapakeanga daha moiki o kadato magoronaka maloaika de momaokoino ma koano wohima-himanga o kawaha mangorana mahimangoka. Ma koano magogiria wogogeruku o pareta makuruhi mal̄okuoka yohimangika o ngoranika gënanga.

²Maöraha ünanga womimake ma Jou Boki o ngo Ester momaokoino maporetoka, ünanga wamao womidora munangika de womihi tumutika ai diki-diki o gurasi munangika. Done o ngo Ester motagi ami himangika, daha masö o diki-diki madekarika gënanga.

³Ipaha ma koano womi leha, ”Naga okia, ngohi Jou Boki? Okia noigo? Nahetongo! Ngaroko nogahoko ahi pareta mahononga aha tonihidöaka dika.”

⁴O ngo Ester mohaluhu, ”Nako Jou Koano nomodeke, kokiani o hutu nënanga Jou Koano de o Haman niboa ahi jamuangika ngohi tadiai mangale Jou Koano.”

⁵Ma koano wihuloko o Haman itaiti woböa, hupaya önanga yakunu ihitotomo o ngo Ester amigogahoko. Daha önanga yoboa o jamuangika o ngo Ester madodiai gënanga.

⁶Maöraha yokere o angguru, ma koano womileha, ”O öraha nënanga nahetongo okia noö igo-igo. Okia dika nogahoko aha tonihidöaka, ngaroka ahipareta mahononga!”

⁷O ngo Ester mohaluhu, ”Nako Jou Koano nomodeke natarima tongohi ahi gogahoko, kokiani jou Koano de o Haman niboali o jamuangika ngohi tadiai iyarehe mahutu. Daha o jamuangoka gënanga ngohi aha tohingahu ahi gogahoko Jou Koanoika.”

⁹O Haman wolio ma Jou Boki o ngo Ester ami jamuangoka de waino, de ai hininga duru imorene. Mä maöraha o kadato mangorana ma amo-amokoka ünanga wimake o Mordekhai womaokoua mangale wihoromati unangika, ünanga idadi duru wongamo.

¹⁰Mä ünanga kawoma tongohono ai diri de wolio ai tauika. Womahi adonika dokengoka ünanga wähuloko ai dodiawo yoböa de wogahoko o ngo Zeres, ngoi hekata, mangale imagögogere kamamoi de önanga.

¹¹Daha o Haman womahi ade-ade onangika de womaedenge de ai kaya, ai ngoha-ngohaka o nauru mangangöe, o mulia ibö baraguna watarima ma koanoino, de ai pangkati iholoi ikurutil̄e ngaro de o pegawe-pegawe mahomoa.

¹²Wotemoli, ”Igoungu ma Jou Boki o ngo Esterö duga-duga momiahoko ngohi de ma koano o jamuangika madödodiai mangale ngomi, de iyarehe mahutu ngomi momiahokoli.

¹³Mä mata-mata gënanga koiwa mamangarati, madekanino katimakeohi o Mordekhai, o Yahudi manyawa gënanga, wogogeruku o kadato mangorana ma amo-amokoka.”

¹⁴Yoihene gënanga ngoi hekata de ai dodiawo yogahoko hoko nënanga, ”Nohuloko dika yodiai o liate yalikouku magurutil̄e o metere monaoko de hinoto. Daha iyarehino, o ngoru-ngorumino nogahoko wonihigumal̄a ma koanoika mangale nilikouku o liateoka nënanga. De hoko gënanga ngona yakunu o jamuangika gënanga de ani hininga irirïdi.” O gogahoko gënanga duru yaoa imamoteke o Haman ai damake, hababu gënanga ünanga wohuloko de majapatioka yodiai o liate yaliko-likouku gënanga.