Read Tobelo O NGO ESTER 7 Bible Online

O NGO ESTER 7 - Tobelo bible

O NGO ESTER 7

¹Done mangale mahinotoka makoano de o Haman yol̄omo yokere kamamoi de o ngo Ester.

²Ikali yokere o angguru, ma koano womi lehali o ngo Esterika, ”Hei, ngohi Jou Boki, okia noigo? Nahetongo! Maraioka aha tonihi döaka ngaroka nogahoko ahi paretaino ma hononga.”

³Ma Jou Boki o ngo Ester mohaluhu, ”Nako Jou Koano no modeke, ngohi togahoko hupaya ngohi de tongohi ahi hoana yakunu miwango.

⁴Hababu ngohi de tongohi ahi hoana imi hukunoka mangale imi toma. Hohi ade ngomi duga-duga imi hukunu mangale midadi o gilaongo, ngohi aha toma rirïdoka de toni ruäeua Jou Koano. Ma öraha nënanga ngomi aha imi binaha de imi hohihanga!”

⁵Daha ma Koano Ahasyweros womi leha ma Jou Boki o ngo Esterika, ”O nagona yobarani yodiai hoko gënanga? Kiaka manyawa?”

⁶O ngo Ester mohaluhu, ”O Haman iwitotorou nenangala to ngomi mia haturu de womiö aniaya!” De duru ai hawana o Haman wäpulo-pulono ma Kaono de ma Jou Boki.

⁷Ma koano duru wongamo, daha womaoko wamal̄a o meja de gila-gila wohupu, o kadato mamaratana madumuleika. O Haman wohiöriki ma koano wal̄ëoka o putuhu mangale wihukumu, hababu gënanga ünanga kahirahi wogogere de ma jou Boki o ngo Ester mangale wogahoko hupaya mihihalamati.

⁸De ai nganono itoakoka o Haman woma rubauku ai diri o ngo Ester ami bangko mado dipokouku mal̄okuoka mangale wogahoko o apongo, mä ima daenika o öraha gënanga dika ma koano wolio o kadato mamaratana madumuleoka de waino. Wimake o Haman hoko gënanga, ma koano woma pöaka, ”Okia? Ngona kano baraniohi dika nomipakisa ma Jou Boki nenangoka, ahi himangoka de ahi kadatoka mahirete?” De majapatioka ma koano ai demo-demo gënanga ibötino, yopö pangka-pangkati yoboa de yatamunu o Haman ai häeke.

⁹Daha o Harbona wato, womatengo o pangka-pangkatino gënanga, ”Jou Koano, o Haman ai tau madatekoka naga o liate yaliko-likouku magurutil̄e o metere monaoko de hinoto. O Haman wohigokoka mangale o Mordekhai iwi liko, o nyawa wohihohalamatoka Jou Koano ani jiwa.” Daha ma koano wapareta, ”Niwiliko o Haman o liateuku gënanga!”

¹⁰Hoko gënanga o Haman iwiliko o liateuku wohigö goko-gokoka mangale o Mordekhai. Daha iböto gënanga ma koano ai muruka irïdi.