Read Tobelo O NGO ESTER 9 Bible Online

O NGO ESTER 9 - Tobelo bible

O NGO ESTER 9

¹Mabaha yadono mawange ngimoi deʼ hange o Adar mamede, enagënanga o wange ihitotatapu mangale yadiai ma koano aipareta mangale hagala o Yahudioka manyawa. O wange gënanga yodämaoka o yahudi manyawa manga haturu-haturu mangale yakuaha o hoana gënanga. Mä inyata o Yahudi manyawa yautumoka önanga.

²O kota yogetongo, hagala o Yahudi manyawa imatoomu deʼ imatekerimoi mangale yaparangi mata-mata o nyawa manga niata itotorou onangika. Hagala o hoana kiaka dika idadi yamodongo onangika hiädono moiua yobarani yahimanga önanga.

³Koaholi mata-mata o propinsioka yoloago-agomo, o gubernur-gubernur, o daera mabaluhu deʼ o pareta mapangka-pangkati yäriwo o Yahudi manyawa karana mata-mata iwimodongo o Mordekhaika.

⁴O pareta magilolitino o nyawa ihi öriki o Mordekhai duru wokuaha o kadatoka deʼ kaiholoi wokuahaoli.

⁵Hoko gënanga o Yahudi manyawa yakunu yadiai manga hininga mahuka deʼ toönanga manga haturü, önanga yaparangi deʼ o oworo daha yätoma.

⁶O Susanoka, o negara makota matiti, o Yahudi manyawa yätoma yaratuhu motoa.

⁷Manga hidogoronaka naga o Haman o Hamadata aingohaka, aingohaka o nauru yangimoi, o Yahudioka manyawa manga haturu ilöamo-amoko. Onanga gënanga ganga: o Parsandata, o Dalfon, o Aspata, o Porata, o Aridata, o Parmasta, o Arisai, o Aridai deʼ o Waizata. Mä o Yahudi manyawa yodiaiua yaora.

¹¹O wange gënanga dika o nyawa ihingahu ma koanoika manga ngöe hagala o nyawa yätoma o Susanoka.

¹²Ma Jou Koano womitemo ma Jou Boki o ngo Esterika, ”O Susanoka dika o Yahudi manyawa yatoma o nyawa yaratuhu motoa, yodogoika o Haman aingohaka yangimoi. Okia hongoli o propinsi-propinsioka! Hohi orikua okia önanga yodiai dokengoka! Ya, kiahongoli nogögaho-gahoko öraha nënanga? No temo dika, ngona maraioka aha namake!”

¹³O ngo Ester mohaluhu, ”Nako Jou Koano nomodeke, kokiani o Yahudi manyawa yogögogere o Susanoka nënanga iyarehe o ngorumino nahigumal̄a yogilioli okia yadödodiaioka o wange nënanga. Ikali, kokiani o Haman aingoha-ngohaka manga mayeti gënanga yanuneuku o liate yaliko-likoukuoka.”

¹⁴Daha ma koano wohi döaka o pareta mangale yadiai o ngo Ester amigogahoko; o pareta mahurata mangale o Susan makota wohihupu deʼ o Haman aingohaka yangimoi manga mayeti yalikouku.

¹⁵Ho, mawange ngimoi deʼ iatoka o Adar mamede, hagala o Yahudioka manyawa o Susanoka ima toomuoli de yätoma o nyawa yaratuhu hangeoli o kotaka gënanga. De moi nënangaö önanga yooraua.

¹⁶Hagala o Yahudioka manyawa yogö gogere o propinsi-o propinsiokaö ima toomuoka deʼ yoriwo toönanga manga diri, önanga yautumu manga haturu de yätoma yaribuhu mori tumidi de yamotoa yadödoha-dohata önanga. Mä önanga yooraua.

¹⁷Idödadadi gënanga idadi mawange ngimoi de hangeoka o Adar mawangeoka. O wange yaino, mawange ngimoi deʼ iatoka, önanga yätomaua o nagonaö, mä ihimulia o wange gënanga de manga morene.

¹⁸Mä o Yahudioka manyawa naga o Susanoka ihimulia o wange mangimoi deʼ motoaoka, hokä o wange ma ago-agomo, hahabu önanga yätomaoka manga haturu mawange ngimoi de hangeoka de ngimoi deʼ iatoka, daha imatogumu mawange ngimoi deʼ motoaoka.

¹⁹Genanga hababu o Yahudioka manyawa yogögogere o kota maiyetekoka yohininga mawange ngimoi deʼ iatoka o Adar mamede hokä manga morene mawange, o wange mangale yorame yomore-morene ikali imahikodöaka o hadia marupa o inomo.

²⁰Iböto gënanga o Mordekhai wätulihi hagala idödadadi gënangaa deʼ wohidingoto o hurata o Yahudi manyawaika mata-mata o Persia ingodumu, yaoa ikurutika, yaoa itigino.

²¹O hurata gënanga madol̄a enagënanga o pareta mangale ihimulia mawange ngimoi deʼ iata deʼ ngimoi deʼ motoa o Adar mamedeʼ o taongo ihigetongo.

²²Hababu mawange-wange genangala önanga yautumoka toönanga manga haturu-haturu, hiädono manga hininga mahuha de manga hininga mahiri ingali idadi o morene deʼ o utumu. Ma hababu gënanga önanga kiani ihimulia hagala o wange gënanga, de o rameanga deʼ o jamuanga ikali ima hikodöaka o inomo deʼ ihikodoku o hadaka o mihikini manyawaika.

²³O Yahudi manyawa ihingounu o Mordekhai aipareta gënanga deʼ hoko gënanga o rameanga gënanga idadi manga biaha ma adati o taongo ihigetongo.

²⁴ O Haman Hamedata aingohaka, o Agag aidifauku, o Yahudioka manga haturu ilamo-amoko, yodiaioka o Yahudioka o undi ya hetongo ”o Purim” mafaida ihitatapu mawange mangale yätoma o Yahudioka manyawa; ünanga wätatoroka mangale wä hohonenge önanga wamata-mataka.

²⁵Mä o ngo Ester mihimanga ma koano, de ma koano wohidöaka o pareta ituli-tulihi idadi hababu o datoro itotorou wadodiai o Haman yatapal̄u ai diri mahirete, hiädono ünanga de ai ngoha-ngohaka yälikouku o liate yaliko-likoka.

²⁶Hababu gënanga o wange ma ago-agomo gënanga yahetongo o Purim. O Mordekhai ai hurata deʼ hagala yamömao-maoka o Yahudi manyawa,

²⁷mahasili önanga yodiai moi o datoro mangale toönanga manga diri mahirete, mangale toönanga manga difauku deʼ mangale mata-mata o nyawa aha yodadi o Yahudioka manyawa. Imamoteke o datoro gënanga o taongo ihigetongo önanga kiani ihimulia o wange hinotoino wohitö tatapuoka o Mordekhai.

²⁸Wohi tatapuö mangale kahi ädo-ädonika o Purim mawange gënanga kiani yohininga de ihimulia o Yahudi manga tau manyawa magetongo hagala o gögö o propinsi magetongo magoronaka deʼ o kota magetongo.

²⁹Ma datekoka gënanga, imakinïki deʼ o Mordekhai ai hurata, ma Jou Boki Ester o Abihail ngoi ora motulihi o hurata mahinotoka, mohi kuata o Mordekhai ai hurata madol̄a yakorona o Purim gënanga.

³⁰O hurata gënanga ihidingoto o Yahudi manyawaika mata-mata, deʼ madulihi nia uti-utiuku nihidingoto o Persia ma pareta mapropinsi o ratuhu moi deʼ monaoko de tumidika. O hurata gënanga nihidomoteke o niata hupaya o Yahudioka manyawa hokogenangika yamake o lola deʼ yorïdi.

³¹O hurata gënanga ihigaro hupaya önanga deʼ toönanga manga difauku yohininga o Purim mawange maöraha yakokorona, hokä sarakia önanga yohininga o puaha maöraha deʼ o duka manonako mapakeanga maöraha. Genangala o Mordekhai deʼ o ngo Jou Boki Ester manga hurata madol̄a.

³²O ngo Ester ami pareta ihitö tatapu o Purim madatoro-datoro yatulihi o buku magoronaka.