Read Tobelo O KELUARAN 1 Bible Online

O KELUARAN 1 - Tobelo bible

O KELUARAN 1

¹ O Yakub iwihi romangö o Israel, woiki o Mesir ma bereraika deʼ aingoha-ngohaka deʼ toönanga manga tau madol̄a moi-moi. O Yakub aingoha-ngohaka enagënanga:

²o Ruben o Simeon o Lewi o Yehuda

³o Isakhar o Zebulon o Benyamin

⁴o Dan o Naftali o Gad o Asyer.

⁵O Yakub aidifauku gënanga mata-mata manga ngöe yamori tumidi. O Yusuf wo hiraikaoka o Mesir mabereraka.

⁶O öraha muruono naga ipahaika o Yusuf deʼ ai riadodoto yo honenge; hoko genangoli imahi kuumuru moi dede ünanga.

⁷ Mä toönanga manga ngohaka deʼ manga danongo, enagënanga o Israel manyawa, yongohaka deʼ yodanongo duru kamanga ngoë, deʼ önanga manga ngöe yodogo duru itaiti, hiädono o Mesir maberera iomanga deʼ önanga.

⁸ De ipaha o koano mahungi woma tengo wï nako-nakoua o Yusuf wo mulaenge wopareta o Mesir mabereraka.

⁹Unanga wätemo ai kawahaika, ”O Israel manyawa gënanga duru idadi o bodito ngoneino, karana önanga duru kamanga ngöe, deʼ iholoi yokuata ngaro deʼ ngone.

¹⁰ Demo maade o parangi idadi, yakunu idadi önanga imateke rimoi deʼ nanga haturu mangale inä lawani ngone, daha yo piringana yamal̄a o berera nënanga. Ngone kokiani o ngekomo ho lingiri hupaya önanga uha idadi iholoi yowöeoli.”

¹¹Done o Mesir manyawa yä goraka yä goana yatö tailako o Israel manyawa mangale yä hangihara manga wowango deʼ omanarama itotubuho. Onanga yä pakisa ihi goko o Mesir ma koano ai kota o Pitom deʼ o Raamses la manga kia honanga magogo-gono matiti.

¹²Mä iholoi o Mesir manyawa yätuku, ka idogo yowoë o Israel manyawa manga ngoë, deʼ kaitagi ima higerewoto yamodeke o berera gënanga, hiädono o Mesir manyawa idadi yä modongoka onangika.

¹³Daha mahayanga deʼ madora koiwa önanga yätuku o Israel manyawa,

¹⁴deʼ yadiai toönanga manga wowango ihangihara. Madora de mahayangi koiwa önanga yapakisa yokarajanga itotubuho o tau ma ago-agomo ihi goko deʼ o dumule-dumuleoka.

¹⁵De ipaha o Mesir ma koano wä hipareta o ngo Sifra deʼ o ngo Puaika, ma bidan yahinoto yä riwo-riwo o Ibrani ma ngo ngoheka manga ngohaka ima kokil̄au.

¹⁶O Mesir ma koano wotemo, ”Maöraha ngini niä riwo o Ibrani ma ngongoheka yongohaka, nio hohininga nënanga: Nako o ngohaka imahi ado-adonino gënanga o nauru, nia hohonengoka ënanga! Nako o ngohaka imahi ado-adonino gënanga o ngoheka nia mal̄aika ënanga iwango.”

¹⁷Mä ma bidan yahinoto gënanga onyawa iwi modo-modongo ma Jou Madutuika. Onanga yoluku yadiai ma koano aipareta deʼ yä mal̄aika mata-mata o ngoha-ngohaka o nauru manga gogil̄au yo wango.

¹⁸Done ma koano wä ahoko ma bidan yahinoto gënanga deʼ wä leha, ”Yadodoa ho ngini nia mal̄aika o ngoha-ngohaka o nauru yowango?”

¹⁹Onanga yohaluhu, ”O Ibranioka ma ngongoheka hokä o Mesir o koua ma ngongoheka. Onanga duru igapanga yongohaka. Ma bidan mo moboa owahi, manga ngohaka ima kil̄auoka.”

²⁰Done ma Jou Madutu o bidan-bidan gënanga wahi barakati deʼ wahi döaka de manga ngohaka onangika, karana önanga iwi horomati ma Jou Madutu. Deʼ o Israel manyawa ma kaidogo yö wöe de yokuata.

²² Daha ma koano wohi döaka o pareta nënanga ingodumu ai kawahaika, ”O Ibranioka manyawa manga ngoha-ngohaka o nauru gënanga dahao ima kokil̄auino kokiani yä umo o Nil ma Ngairuku, mä mata-mata manga ngohaka o ngoheka yakunu yä mal̄a ika yo wango.”