Read Tobelo O KELUARAN 10 Bible Online

O KELUARAN 10 - Tobelo bible

O KELUARAN 10

¹Ma Jou wïtemo o Musaika, ”Noiki nïhimanga ma koano. Ngohi tadiaioka ünanga deʼ o popegawe itogowini manga haëke, hupaya Ngohi takunu todiai ihöhera-heranga toönanga manga hidogoronaka,

²deʼ hupaya ngona yakunu nohijarita ani ngohaka de ani danongika sarakia Ngohi täule-ule o Mesir manyawa de ihöhera-heranga gënanga. Done ngini mata-mata aha nihi öriki Ngohi ma Jou.”

³Daha o Musa deʼ o Harun yoiki iwï himanga ma koano deʼ i wïtemo unangika, ”Ma Jou o Ibrani manyawa manga Jou Madutu, wotemo, ’Hiadono muruonoka ngona noluku nohihimoteke Ngohino? Nämal̄aika Ahi umati yoiki, hupaya önanga yakunu ihihuba ihi horomati Ngohino.

⁴Nako ngona kanolukohi, done yarehe aha tö dotagao o kahoho ani bereraino.

⁵O tonaka mal̄okuika yamode-modekika, aha mata-mata yatamunu de o kahono duru kahä ngöe gënanga. Mata-mata idato-datomuku mahou, inoli o gota-o gota mautu yabobinahaua o awana o es, aha o kahoho gënanga yahou.

⁶Ani kadato, o popegawe manga tau deʼ o kawaha manga tauoka i omanga de o kahoho. O bodito nënanga aha iholoi hömodongo ngaro de yamao-maoka ani ete deʼ ani tohora.’ ” De ipaha o Musa womakilioro de woiki.

⁷O popegawe iwï temo ma koanoika, ”Hiadono muruonoka o nyawa gënanga kokiani wonadiai o huha? Nia mal̄aikala mata-mata o Israel manyawa gënanga yoiki la iwi huba iwi horomati ma Jouika, toönanga manga Jou madutu. Namake tongone nanga berera nënanga iwederoka!”

⁸Done o Musa deʼ o Harun ma koano wä ahokoli iwï himanga ma koano. Ma koano wätemo onangika, ”Ngini yakunu nioiki la niwipuji nia Jou Madutuika. Mä o nagona dika nia hidogoronaka aha yoiki?”

⁹O Musa wohaluhu, ”Ngomi mata-mata, kayaoa o gikiri magö kayaoa o bobereki. Ngomi aha mia ao mata-mata mia ngohaka, mata-mata mia hapi, o duba, deʼ mia kabingi, hababu ngomi kokiani midiai o rame de o ngol̄omo ma ago-agomo mangale miwi horomati ma Jou.”

¹⁰Ma koano wato, ”Idadiua ngohi tini higumal̄a ngini nia ao o ngongoheka deʼ nia ngoha-ngohaka! Ngini nigaho-gahoko gënanga kaima tero dika de nio nganono ngohi togahoko ma Jou winihi barakati ngini. Itararonoka ngohino ngini nia dungutu itorou.

¹¹Kowali! O nau-nauru dika yakunu yoiki la yohuba iwi horomati ma Jouika, nako ngini i goungu nio igo nihuba nihoromati dika!” De o demo-demo gënanga o Musa deʼ o Harun o kadatoka de yäduhu.

¹²Daha ma Jou wïtemo o Musaika, ”Natumutuku o Mesir matonaka mal̄okuku. O kahoho-kahoho aha iböa deʼ yaol̄omo hagala idö dato-datomo mahou-houohi o awana o es ipahaino.”

¹³O Musa wagoraka ai diki-diki deʼ ma Jou wadiai o wange mahiwara ma hidal̄oko ital̄oko o bereraka gënanga o wange moi deʼ o hutu moi yahaiwatiki. Itigi-tigi o ngorumino o hidal̄oko gënanga yao o kahoho-kahoho

¹⁴ hokä biahaua mangöe, hiadono yaomanga yamode-modekika o berera. Komaiwahi o nyawa yamake o kahoho hoko gënanga mangöe de gënanga de iböto mä ohali hoko gënanga komaiwaka i dadi.

¹⁵O tonaka mal̄okuku yamode-modekika hoihi tamunuku o kahoho hiädono itaromo holega-lega. Enanga yaol̄omo okia dika yabobinahaua o awana o es gënanga yöngohama o hohoko ha ol̄o-ol̄omo o gota mautuoka. O Mesir matonaka yamode-modekika koiwa naga moi ani o hoka-hoka mahou o gota-o gota mautuoka ekola idö dato-datomo.

¹⁶Ma koano de majapati wä ahoko o Musa deʼ o Harun daha wätemo, ”Ngohi tobaradohaka ma Jou nia Jou Madutuika deʼ nginika.

¹⁷Nihi apongo ahi baradoha mangale nanga mamoi, deʼ nimä niata ma Jou nia Jou Madutuika, hupaya anga wal̄ë ngohioka o hukumanga ina hohonenge nënanga.”

¹⁸O Musa wïmal̄a ma koano deʼ womä niata ma Jouika.

¹⁹Done ma Jou waidulu o hidal̄oko mameta imadadi o wange madumunu mahidal̄oko duru kaha kuata. O kahoho-kahoho gënanga o hidal̄oko yawuwu deʼ yao o Gelagah ma Ngötika. Kamoiö de koiwa naga igogogere o Mesir matonaka yamode-modekika.

²⁰Mä ma Jou wadiai ma koano watogowini ai haëke, deʼ ünanga wähigumal̄aua o Israel manyawa yoiki.

²¹Ma Jou wïtemo o Musaika, ”Nagorakil̄e ani giama, done duru mahohohutu aha yatamunu o Mesir matonaka.”

²² O Musa wagorakil̄e ai giama, deʼ o wange hangeino madekana duru mahohohutu yatamunuku o Mesir matonaka yamode-modekika.

²³O Mesir manyawa yakunua yamake okianaga deʼ madekanino gënanga moiua o nyawa kiaika naga yoiki. Mä o Israel manyawa manga tau-tauika kahirahi itararono.

²⁴Daha ma koano wä ahoko o Musa deʼ wätemo, ”Ngini yakunu nioiki nihuba nihoromati nia Jouika. O ngongoheka deʼ ongoha-ngohaka yakunu yänïki. Mä o hapi, o duba, deʼ o kabingi yakunua niao.”

²⁵O Musa wohaluhu, ”Nako hoko gënanga ahi Tuanga kokiani no mihi döaka o aiwani o gigini hupaya o huba deʼ mangale o huhuba i haro-harongo ma Jouika, tongomi mia Jou Madutu.

²⁶Mata-mata tongomi mia aiwani o giginii kokiani ngomi miao; kao dutu moiö ma aha yakunua ngomi mia mal̄aika. O aiwani o giginoka gënanga ngomi mia iriki kiaka aha mihi huba ma Jouika tongomi mia Jou Madutu. Dokengoka dahao ngomi aha mihi öriki o aiwani o gigini kiaka aha ngomi mihihuba.”

²⁷Ma Jou wihidadi ma koano ai haëke itogowini hiädono ünanga woluku wähigumal̄a o Israel manyawa yoiki.

²⁸Ma koano wïtemo o Musaika, ”Noikoka ahi himangoka! Uha hiädono ngona tonimakeoli! Nako hiädono tamakeoli ani biono, ngona aha nohonenge!”

²⁹”Hokä ani demo ahi Tuanga,” o Musa wato, ”Ahi Tuanga marai aha nohi makeokaua ngohi.”