Read Tobelo O KELUARAN 12 Bible Online

O KELUARAN 12 - Tobelo bible

O KELUARAN 12

¹ Ma Jou wätemo-temo o Musa deʼ o Harunika o Mesir matonakoka. Wato,

²”O mede nënanga idadi o mede madodihiraka nia almanak mataongoka.

³Niahiadono o pareta nënanga o Israel manyawaika yongodumu: Mawange ngimoioka o mede nënanga, o nyawa moi-o nyawa moi o nau-nauru kokiani yotöaka o duba mangohaka o dutu moi la yaol̄omo kamamoi de manga tau madol̄a.

⁴Nako o tau madol̄a gënanga yohutuluholi mangale yamata o duba mangohaka o dutu moi, done o tau madol̄a gënanga deʼ i makokadateke yotigi-tigino yakunu kamamoi mata-mata yaol̄omo o duba mangohaka gënanga. O duba mangohaka gënanga kokiani yaregu i moteke manga ngöe manyawa yaol̄o-ol̄omo.

⁵Ngini yakunu nimä ngiriki o duba ekola o kabingi, mä kokiani manauru, ma umuru o taongo moi, deʼ koiwa mabodito.

⁶Ngini kokiani nia gogonika hiädono mawange ngimoi de iatoka. O wange gënanga, mabimaoauku, o Israel manyawa yongodumu kokiani yatoaka o duba mangohaka gënanga.

⁷Mahuhutulu ma awunu kokiani ihi nauhu o ngorana maliateika hinoto de o tau mangorana masita il̄o l̄oku-l̄okuil̄e manga ngï önanga yol̄omo.

⁸O hutu genangoli ma akeme kokiani yal̄ofo deʼ yaol̄omo de o gauku mamali-mali deʼ o roti maragi koiwa-iwa.

⁹O duba mangohaka gënanga kokiani yal̄ofo ingodu-ngodumu, mahäeke itotiai, mal̄ou deʼ mamamata madol̄a. Yaol̄omo ma akeme yal̄ofo-l̄ofoka gënanga, uha naga imä ol̄omo magou ekola iboho-bohoko.

¹⁰Mahuhutulö mauha yamal̄aika o hiode ma akeme gënanga hiädono o ngorumino; nako naga mahou, kokiani yatuhuku hiädono koiwaka.

¹¹Maöraha niol̄omo ngini kokiani nimapakeanga nimahi dodiaioka mangale nia dodagi, de nia sandal nia l̄ouoka deʼ o diki-diki nia giamoka. Ngini kokiani ni ol̄omo nima tai-taiti. Genanga o Paska mangol̄omo marameanga mangale nihi horomati Ngohi, ma Jou.

¹²O hutu gënanga Ngohi aha tokaika tokaino tamode-modeke o Mesir matonaka, deʼ Tä toma moi-moi o ngohaka o nauru o riaka, kayaoa o nyawa, kayaoa o aiwani. Ngohi aha tähukumu mata-mata o gikiri o Mesir matonakoka, karana Ngohi ma Jou.

¹³O awunu naga nia tau mangoranoka aha imadadi o nonako o tau-o tau nia ngï ngini nio gogogere. Nako Ngohi tamake o awunu gënanga, ngini tini tilakuru deʼ tini binahaua maöraha Ngohi tähukumu o Mesir.

¹⁴ O wange gënanga kokiani ngini nio hohininga hokä o wange ma amoko mangale ma Jou. Genangoka dei hikaika o wange gënanga kokiani ngini nihi amoko o taongo ihi geto-getongo.”

¹⁵Ma Jou wätemo, ”O wange tumidi madekana ngini yakunua nia ol̄omo o roti dema ragi-ragioka. O wange madodihiraka mata-mata o ragi kokiani nihihupu nia tauoka, hababu nako madekana o wange tumidi gënanga woma tengoani waol̄omo o roti dema ragi-ragioka, ünanga yakunokaua iwi etongo Ahi umati.

¹⁶O wange madodihiraka, deʼ o wange matumidokaö, ngini kokiani nima toomu la nia diai o puji. O wange gënanga ngini yakunua nia diai o manarama okia dika sowaliua ipöparalu mangale nimä sadia o inomo.

¹⁷O wange gënanga ani nyawa yongodumu Täao Tahihupu o Mesir mabereraka. Hababu gënanga nenangoka dei hikaika o taongo ihi geto-getongo, o wange gënanga kokiani ngini nio hohininga hokä o wange ma amoko.

¹⁸O mede madodihiraka magoronaka, i mulaenge mawange ngimoi de iatoka mahutu, hiädono mawange monaoko de moioka mahutu, ngini yakunua nia ol̄omo o roti dema ragi-ragioka. Madekana o wange tumidi gënanga mata-mata o ragi kokiani nihi hupu niatauoka. O Israel manyawa ekola o nyawa maporetino yaol̄omo o roti dema ragi-ragioka o wange ma amokoka gënanga, yakunokaua yaetongo Ahi umati.”

¹⁹

²⁰

²¹O Musa wä ahoko o Israel manyawa manga tutuda mata-mata, deʼ wätemo onangika, ”Nioiki deʼ nial̄ë mangale nia tau madol̄a o duba mangohaka o dutu moi mangale o Paska marameanga.

²²Nia l̄ë o hisop o nikutu moi, nia tono o loyanguku yogö guhe-guhe ukuoka o duba ma awunu gënanga, daha nihinauhu nia ngorana maliate hinoto deʼ nia tau mangorana masita il̄ol̄oku-l̄okuoko. Hiädono o ngorumino nia hidogoronaka ka o nyawa moiö mauha nia mal̄a o tau.

²³ Maöraha ma Jou wödagi o berera nënanga wakaika wakaino mangale wätoma o Mesir manyawa, ma Jou aha wamake o awunu nia liateoka hinoto deʼ nia tau mangorana masita il̄ol̄oku-l̄okuoko; done Ünanga aha kawatilakuru dika deʼ Wohigumal̄aua o Honenge ma Malaekat yö ngohama nia tau mangale inï toma ngini.

²⁴Ngini deʼ nia ngoha-ngohaka kokiani nihimoteke o pareta gënanga kahi ado-adonika.

²⁵Nako ngini nio ngohamoka o berera winihi jäjajioka ma Jou nginika, ngini kokiani nia diai o nonako ma ago-agomo nënanga.

²⁶Nako nia ngoha-ngohaka yoleha, ’Okia ma mangarati o nonako ma ago-agomo nënanga?ʼ

²⁷Ngini kokiani nihaluhu, ’Nenanga o Paska mahuhuba mangale hï horomati ma Jou, hababu o Israel manyawa manga tau o Mesir mabereraka watilakuru, maöraha ünanga wätoma o Mesir manyawa manga ngoha-ngohaka o nauru mariaka; deʼ ngone wonahi gumal̄a howango!ʼ ” Done yatilabukuku o Israel manyawa deʼ yohuba.

²⁸Daha önanga yoiki deʼ yadiai okia ma Jou wahi popareta o Musa deʼ o Harunika.

²⁹ O hutu gënanga i togorona ma Jou wätoma mata-mata o Mesir manyawa manga ngohaka o nauru mariaka, mulaenge ma koano aingohaka hiädono o bui manyawa manga ngoha-ngohaka. Mata-mata o aiwani i popaliara mangohaka mariaka mawa toma.

³⁰O hutu gënanga ma koano, o popegawe deʼ mata-mata o Mesir manyawa manga gogiokoka deʼ yomomiki. O Mesir maberera yamode-modekika yoihene o dodora mailingi i kua-kuatil̄e, karana koiwa naga moi o tau koi honengua womatengo manga ngohaka o nauru.

³¹O hutu gënanga dika, ma koano wä ahoko o Musa deʼ o Harun deʼ wätemo, ”Nioikoka, ngini mata-mata nenangoka! Nia mal̄a ahiberera! Nioiki niwi horomati nia Jou Madutu hokä ngini nigahoko.

³²Niao mata-mata nia hapi, o duba, deʼ nia kabingi, deʼ nioikoka! Ngohiö nihi gahoko o barakati.!”

³³O Mesir manyawa yatataiti o Israel manyawa hupaya itai-taiti yamal̄a o berera gënanga. Ona yato, ”Ngomi mata-mata aha mihonenge nako ngini koni oikua!”

³⁴Daha o Israel manyawa yal̄ë toönanga manga boko-bokolo de madol̄a o roti maragi koiwa-iwa yaojo-ojouku, yahawo deʼ o ngöere, deʼ yamoku.

³⁵ O nangö yadiaioka okia o Musa waheto-hetongoka, enagënanga yogahoko o poromu o haaka deʼ o gurasi inoli o pakeanga o Mesir manyawaika.

³⁶Ma Jou wadiai o Mesir manyawa yoigo yahidöaka o Israel manyawaika, hiädono önanga yahi döaka hagala o Israel manyawa yogö gaho-gahoko. De madodagi hoko gënanga o Israel manyawa yao o Mesir manyawa manga kaya ihupu deʼ o berera gënanga.

³⁷O Israel manyawa imä jobo deʼ imä dagi o Raamses makotaoka de o Sukot makotaika. Önanga manga ngöe yaribuhu ratuhu butanga, yäetongua o ngongoheka deʼ o ngoha-ngohaka.

³⁸Onanga yoao o hapi, o duba deʼ o kabingi kahängöe. Manga ngöe o nyawa maporetinoö magilamoko yonïki.

³⁹Onanga yoharongo o roti maragi koiwa-iwa yaojo-ojoukuoka, o Mesir mabereraka de önanga yoao. Onanga genangokadau de yäduhu de duru yahitodokanino, hiädono imahi daenua o bilaono imadiai.

⁴⁰ O Israel manyawa yogogeroka o Mesir matonakoka madekana o taongo o ratuhu iata de moruange.

⁴¹Mawange mabobahaka mataongo o ratuhu iata de moruange gënanga i ngodumu manga duduono ma Jou Ai umati yamal̄a o Mesir matonaka.

⁴²O hutu gënanga ma Jou woma togu-togumua wagoana mangale Wängotaka önanga o Mesir matonakoka deʼ yohupu. Deʼ genangö mahutu kahi ado-adonika ihi huba ma Jouika hokä o hohininga mahutu. Mahutu gënanga o Israel manyawa kokiani imä goa-goana.

⁴³Ma Jou wätemo o Musa deʼ o Harunika, ”Nënanga o Paska marameanga madatoro. O nyawa maporetino yakunua yaol̄omo o duba ma akeme ihi huba-huba o Paska mawangeoka.

⁴⁴Mä o gilaongo nimä ija-ijaino yakunu yonïki yol̄omo, nako önanga ima hunaoka.

⁴⁵O nyawa o dagi-dagino ekola o hewa manyawa yakunua yonïki yaol̄omo.

⁴⁶ I ngodumu o duba ma akeme gënanga kokiani yaol̄omo o tau magoronaka, deʼ yakunua yao ihihupu maporetika. Ma kobongo kamoiö mauha yatobiki.

⁴⁷Yongodumu o Israel manyawa kokiani ihi rame o rameanga gënanga.

⁴⁸O nyawa ima huna-hunaua yakunua yaol̄omo o rameanga mainomo gënanga. Nako o nyawa maporetino moi ani yogogere i tiaioka nginioka yöigo ihi rame o Paska mangale ihi horomati Ngohi, ma Jou, mata-mata o nau-nauru manga tau magoronaka kokiani imahuna ihira. Gënanga deʼ ibötoönanga yäetongo hokä o Israeloka manyawa madutu, deʼ yakunu yonïki o Paska marame magoronaka.

⁴⁹O datoro kaima tero inï korona o Israel manyawa madutu deʼ o nyawa maporetino mahirahi yogogere tingini nia hidogoronaka.”

⁵⁰Mata-mata o Israel manyawa ihi moteke deʼ yadiai hagala ma Jou wohi popareta o Musa deʼ o Harunika.

⁵¹Mawange gënanga ma Jou wä ao yongodumu o Israel manyawa o Mesir mabereraka yohupu.