Read Tobelo O KELUARAN 14 Bible Online

O KELUARAN 14 - Tobelo bible

O KELUARAN 14

¹De ipaha ma Jou wïtemo o Musaika,

²”Nahuloko o Israel manyawa imakilioro deʼ ima tau o Pi-Hahirot makota ma himangino, o Migdol ma kota deʼ o Gelagah ma Ngöto mahidogorona, imahi tigi-tigika de o Baal-Zefon makota.

³O Mesir ma koano aha watobote o Israel manyawa kayo tagi-tagi yakaika yakaino o bereraka nënanga deʼ yohihanga o tonaka i kokakahaka.

⁴Ngohi aha tadiai ünanga ai häeke i togowini hiädono ünanga winiginïki ngini. Mä Ngohi aha tohimatoko Ahi kuaha o Mesir ma koanoika deʼ aitentara deʼ önanga aha ihi öriki Ngohi ma Jou.” Daha o Israel manyawa yadiai hokä ma Jou wahipopareta onangika.

⁵Maöraha o Mesir ma koano woihene o Israel manyawa yopiringanoka, ünanga de ai popegawe imatoduba deʼ yotemo, ”Okia ngone hodiai? Yadodoa hongone hamal̄aika o Israel manyawa gënanga yoiki hiädono ngone hahohihanga nanga gogilaongo?”

⁶Daha ma koano wasadia o parangi makureta de aitentara.

⁷Unanga womä jobo de ai kureta mata-mata, ihi de etongo o ratuhu butanga o parangi makurete o kokapita yobare-barene.

⁸Igoungu ma Jou wadiai ma koano ai häeke itogowini, hiädono ünanga wäginïki o Israel manyawa magogiriaka manga dodagi magoronaka yamal̄a o berera gënanga ma Jou Ai gogöana matimiuku.

⁹O Mesir ma tentara de manga kuda mata-mata, o kureta deʼ yobare-barenuku yaginïki o Israel manyawa, deʼ yänïki manga poretino toönanga manga tau-tauika o gahi madatekoka imahi tigi-tigika o Pi-Hahirotika.

¹⁰Maöraha o Israel manyawa yämake o Mesir ma koano deʼ aitentara yoboa, önanga duru yohawana deʼ yopoaka ma Jouika yogahoko o roriwo.

¹¹Onanga iwi temo o Musaika, ”Boteka o Mesir matonakoka koiwa o jere, hiädono ngona nomïao ngomi hupaya mihonenge nenangoka? Namake ani manarama gënanga mahasili!

¹²Kahuruono o Mesir matonakoka ngomi mia hetongoka o hali nënanga aha idadi! Ngomi migegotoka hupaya ngona uha nomï ruae ngomi, mä nomï mal̄aika ngomi hirahi midadi o gogilaongo o Mesir matonakoka. De mihonenge o tonaka ikokakahaka nënanga iholoi yaoa midadi o gilaongo dokengoka!”

¹³O Musa wohaluhu, ”Uha nihawana! Nima totongohono! Ngini aha niamake okia ma Jou wadiai hupaya ngini nihalamati. O Mesir manyawa niä make-make öraha nänga, aha ngini niä makeokaua.

¹⁴Ma Jou aha womahi dofoika mangale ngini, deʼ ngini i paralua okianaga nidiai.”

¹⁵Ma Jou wïtemo o Musaika, ”Yadodoa hongona nopoaka nogahoko o roriwo? Nähuloko o Israel manyawa yotagi yogila-gila!

¹⁶Nagoraka ani diki-diki deʼ nohitumutuku o ngöto mal̄okuuku. Done ma akere aha imaregu deʼ o Israel manyawa yakunu yatoaka o ngöto deʼ imadagi matonaka madüdudungika.

¹⁷O Mesir manyawa aha Tadiai manga häeke itogowini hiädono önanga ihi gila-gila yaginïki o Israel manyawa, deʼ Ngohi aha tohimatoko Ahi kuaha o Mesir ma koanoika, de aitentara manga duduonika, okureta-kureta de yöbare-barenuku.

¹⁸Done o Mesir manyawa aha ihi öriki Ngohi ma Jou.”

¹⁹Daha ma Jou Madutu Ai malaekat naga o Israel manyawa manga duduono mahimangoka, imatagali mapore-poretoko. Deʼ imatagaliö o liate o lobi hiädono i gogere

²⁰o Mesiroka manga duduono deʼ o Israeloka manga duduono manga hidogoronaka. O lobi gënanga yapuda o huhutu, hiädono o hutu yahaiwatiki o duduono hinoto gënanga yakunua imabori hebangika.

²¹Daha o Musa ai giama wohi tumutuku o ngöto mal̄okuku, deʼ ma Jou wadiai o hidal̄oko o wange mahiwariha gënanga i tal̄oko kohäkuata hiädono o gahi imadohuku. O hutu yahaiwatiki o hidal̄oko gënanga i tal̄oko, deʼ yangali o ngöto i madadi o tonaka madü dudungu.

²² O akere iregu hinoto deʼ maöraha o Israel manyawa yatoaka o ngötoönanga imädagi o tonaka madü dudungika, deʼ o akere manga niraka de manga higili imahirupa o bebeno o mehele.

²³O Mesir manyawa de mata-mata manga kuda, okureta deʼ yö bare-barenuku yaginïki ihi gila-gila deʼ yanïki o Israel manyawa o ngöto mahigoronaika.

²⁴Itigi-tigi itebini o liate o uku deʼ o lobioka de ma Jou wäpulono o Mesir matentaraika deʼ duru wäruae.

²⁵Unanga wadiai manga kureta malululu itagiokaua, hiädono duru dema huha önanga manga himangika yotagi. O Mesir manyawa yato, ”Ma Jou womahi dofoika hupaya o Israel manyawa inä lawani ngone. Niaino hopiringana nenangoka!”

²⁶Ma Jou wïtemo o Musaika, ”Nohitumutuku ani giama o ngöto mal̄okuku, done o akere aha ilioli, deʼ o Mesir manyawa yälutu, manga kureta de yobare-barenuku.”

²⁷Daha o Musa wohitumutuku ai giama o ngöto mal̄okuku deʼ maöraha o wange ipotoka, o akere ilioli hokä madodihirakali. O Mesir manyawa imahidailako manga diri ihi halamati, mä ma Jou wälutu önanga o ngöto magoronauku.

²⁸O akere imaidulu deʼ yatamunu o kureta-kureta, yoböbare-barene, deʼ yongodumu o Mesir matentara yagoginïki o Israel manyawa o ngöto mahidogoronaika, hiädono önanga mata-mata yohonenge.

²⁹Mä maöraha o Israel manyawa yotöaka o ngötoönanga imädagi o tonaka madü dudungika, deʼ o akere imahi rupa o bebeno o mehele manga higili de manga niraka.

³⁰Mawange gënanga ma Jou wähihalamati o Israel manyawa o Mesir manyawa yagögoginïkino, deʼ önanga yamake o Mesir manyawa manga mayeti ihi dutukiha o hohaniha.

³¹Maöraha o Israel manyawa yamake sarakia ma Jou de Ai kuaha ma amoko wahihanga o Mesir manyawa, önanga duru yohëranga hiädono yongaku Unangika deʼ o Musaika, Ai gilaongo gënanga.