Read Tobelo O KELUARAN 15 Bible Online

O KELUARAN 15 - Tobelo bible

O KELUARAN 15

¹ Daha o Musa deʼ o Israel manyawa ihi nyanyi o nyanyi nënanga mangale iwi higiriri ma Jou, ”Ngohi tomau tihinyanyi ma Jou, hababu Unanga woutumoka de macahaya. Mata-mata o kuda de yobare-barenuku yahikaweli o ngötuku.

² Ma Jou ahi roriwo wokö kua-kuata; Unanga wohihi hohalamati ngohi. Unanga ahi Jou madutu Unanga ngohi tomau tihigiriri ma Jou Madutu ahi ete de ahi tohora iwi huba-huba, Unanga ngohi tihimulia.

³Ma Jou gënanga o kapita yonau-nauru, ma Jou, gënanga Ai romanga.

⁴O Mesir manga tentara deʼ mata-mata manga kurete ihi kaweli o ngötuku. O kokapita duru yonau-nauru yalutu o Gelagah ma Ngötuku.

⁵Onanga o ngöto maluku-lukuku yalahiri, deʼ hokä o helewo iuti matitiuku.

⁶Ani kuata duru yöheranga, ya Jou, Nadiai koiwaka mia haturu nahi gogerewotoka.

⁷De Ani mulia ma amo-amoko Nä binaha mata-mata ini lawa-lawani Ngona. Ani dohata ihiru-hiru hokä o uku, deʼ Nätuhuku önanga hokä o gandum maröehe madoolenge.

⁸O ngöto Ngona nawuwu, ma akere malulu magurutil̄e, imaoko imatotiail̄e hokä o bebeno o mehele, hiädono o tonaka o ngöto matimiuku yakunu yodilakuru.

⁹Mia haturu yato, ’Onanga aha taginïki deʼ tätagoko, ahi oworo tatauril̄e, deʼ tabinaha önanga. Daha mata-mata manga arata taora, tohikodoku deʼ tajame hiädono tamao yaoaka.’

¹⁰Mä ma Jou deʼ mamoi dika wowohama wadotagao o Mesirika o bodito mawange. Onanga yalutu hokä o hori madodubuho, o akere mamoku-moku malulu homodo-modongo magoronauku.

¹¹O gikiri okia yakunu honihi tero de Ngona, ya Jou duru no Momulia deʼ Notebini?

¹²O nagona yakunu yadiai ihöhera-heranga de o manarama i ago-agomo hokä ma Jou? Ngona nohi mongöika Ani giama maniraka, done o haturu yohihanga o tonaka yalahiri.

¹³Ngona nätuda o nyawa Nahihalamatoka nënanga, karana Ngona nosetia Ani jajika. De o kuata ma amoko Ngona nähohongo deʼ Nä tuda Ani tonaka itebi-tebinika.

¹⁴O hoana de o berera yogihene de yohahara; o Filistin manyawa deʼ o Edom manga tutuda yoburakituku.

¹⁵O Moab manyawa yonönau-nauru kaima hidahaharuku, o Kanaan manyawa manga hininga ieteke.

¹⁶Onanga duru yohawana yahakihi ma Jou Ai kuata. Maöraha Ani umati yakaino, o hö haturu yakunua yätumungu; manga diri ihi oara o nyawa Nahibö bebasoka.

¹⁷Daha o Israeloka Nä ngotaka o ngï Na iri-irikokaika mangale Nogogogere. Onanga yogogere Ani doporono iTebi-tebinoka, o Tauoka Ngona mahirete nohigö goko-goko.

¹⁸Ngona ma Jou o Koano, no pareta kahiado-adonika.”

¹⁹Maöraha o Israel manyawa yatoaka o ngötoönanga i mädagi o tonaka madüdudungika. Mä maöraha o Mesir manga kureta de manga kuda deʼ yobö bare-barenuku yowohama o ngöto magoronauku. Ma Jou wadiai ma akere ihahuroli hiädono önanga yälutu.

²⁰Daha o ngo Miryam, momatengo ma nabi o Harun ngoi hiranga o riaka, mal̄ë ami damunu, deʼ mata-mata o ngongoheka imakinïki yatakoro o damunu de yoselo.

²¹O ngo Miryam mo nyanyi mangale önanga, ”Ni nyanyi mangale ma Jou hababu Unanga woutumoka de macahaya. Mata-mata o kuda deʼ yoböbare-barenuku yahikaweli o ngöto magoronauku.”

²²De ipaha o Musa wä ao o Israel manyawa o Gelagah ma Ngötoka de yodumutu o Syur matonaka ikokakahaika. Madekana o wange hange önanga yotagi yamakeua o akere.

²³Daha önanga yadono moi o ngï maromanga o Mara, mä genangoka ma akere duru kahämali, hiädono yakunua yaokere. Hababu gënanga o ngï gënanga yahetongo o Mara, mamangarati mamali.

²⁴Done hagala o nyawa gënanga yotaiana o Musaika deʼ iwi leha, ”Okia aha ngomi mia okere?”

²⁵O Musa womaniata wagou-goungu ma Jouika, daha ma Jou wihimatoko unangika o gota o dobiki moi. O gota gënanga o Musa wohikaweli o akeruku, daha o akere gënanga idadi ma ake-akere, hiädono yakunu yaokere. O ngïoka gënanga ma Jou wohi döaka o datoro-o datoro onangika, deʼ genangokaö Unanga wätaili önanga.

²⁶Ma Jou wato, ”Nihihi moteke Ngohi nia gou-goungu, deʼ nia diai okia Ngohi tapulono yaoa; nia moteke mata-mata Ahi pareta. Nako ngini nidiai hoko gënanga, ngini aha Tinï hukumua de o panyake Tahitotapal̄uoka o Mesir manyawaika. Ngohi ma Jou tinihi togu-togumu ngini.”

²⁷Iböto de gënanga önanga yadono moi o ngï ma romanga o Elim. Genangoka naga o jobubu ngimoi de hinoto deʼ o kurma ma utu moritumidi. Onanga imä tau ima hitigi-tigika o akerika gënanga.