Read Tobelo O KELUARAN 18 Bible Online

O KELUARAN 18 - Tobelo bible

O KELUARAN 18

¹O Yitro, o Musa ai toroa, ma imam o Midian matonakoka, woihene mangale hagala moi-moi wamomanarama ma Jou Madutu mangale o Musa deʼ o Israel manyawa, maöraha ünanga wätuda önanga o Mesir mabereraka deʼ yohupu.

² Done o Yitro woiki wïadono o Musa, womi ao o ngo Zipora, o Musa ngoi hekata kamogogogerohi o Midian matonakoka,

³ imakomoteke deʼ o Gersom deʼ o Eliezer, aingohaka o nauru yahinoto. aingohaka madodihiraka wihiromanga o Gersom karana o Musa wato, ”Ngohi o dagi-dagino manyawa o berera mahomoaka”;

⁴aingohaka mahinotoka wihi romanga o Eliezer karana o Musa wato, ”Ma Jou Madutu ahi ete deʼ ahi tohora iwi huba-huba wohï riwoka deʼ wohi hihalamatoka ngohi hiädono ngohi wohitomaua ma koano Mesir”.

⁵O Yitro woböa imakomoteke de o Musa ngoi hekata deʼ ai ngohaka yahinoto o tonaka ikokakahaka mangï o Musa womä tau imahitigi-tigika ol̄oku itebi-tebinika.

⁶O Musa iwi hiabari önanga yoböa,

⁷done ünanga wohupu wäbuhuku önanga. Unanga watilabukuuku deʼ wohuba o Yitro ai himangoka deʼ wïame. Onanga imakeleha moi-moi manga röehe madumuloa, daha yowohama o Musa ai tau magoronaika.

⁸O Musa wohi jarita ai toroaika hagala moi-moi wadodiai ma Jou ma koanoika deʼ o Mesir manyawaika mangale wahihalamati o Israel manyawa. Unangö wohijarita mangale hagala mahuha de makangela yöhimanga o Israel manyawa o ngekomo mahoanika, deʼ sarakia ma Jou wahihalamati önanga.

⁹Woihene gënanga mata-mata o Yitro wamao womorene,

¹⁰deʼ wotemo, ”Iwi higogiriri ma Jou winihi hohalamati ngini ma koano deʼ o Mesir manyawa manga giama mahoatino! Iwi higogiriri ma Jou wahibebasoka o Israel manyawa yogogilaongo!

¹¹Oraha nanga ngohi tohiöriki ma Jou iholoi wolamoko de o gikiri mata-mata, karana mata-mata gënanga Wadiai maöraha o Mesir manyawa okianaga yodiai o Israel manyawaika duru de manga ëdenge.”

¹²De ipaha o Yitro wa ao muruono naga o huhuba yatö tuhu-tuhuku deʼ o huhuba yatoa-toaka hokä ihi huba-huba ma Jou Madutuika. O Harun deʼ mata-mata o Israel manyawa manga tutuda yoböa deʼ yol̄omo imakomoteke de o Yitro ma Jou Ai himanga magoronaka.

¹³Yarehino mawange o Musa watailako imateke roributu o Israel manyawa manga hidogoronaka. O karajanga gënanga yaol̄omo o öraha kade o ngorumino hiädono yohutu.

¹⁴Maöraha o Yitro wamake mata-mata kokiani o Musa wakarajanga, ünanga wïleha, ”Okia dika kokiani nakarajanga mangale o nyawa neonanga? Mata-mata nënanga kokiani nakarajanga mahirete, hiädono mangale ani nasihati dika yogahoko, hagala o nyawa gënanga imaokoino nenangoka kade o ngorumino hiädono yohutu?”

¹⁵O Musa wohaluhu, ”Hagala o nyawa gënanga yoböa ngohino hupaya ihiöriki ma Jou Madutu Ai mau.

¹⁶Nako önanga imateke ributu, önanga ihï himanga ngohi hupaya taputuhu toönanga manga perekara, deʼ ngohi tahingahu onangika hagala o pareta deʼ ma Jou Madutu Ai tita.”

¹⁷O Yitro wato, ”Itorou hoko gënanga.

¹⁸De madodagi gënanga ngona nakangela ani diri mahirete, deʼ hagala o nyawaö gënanga. O karajanga gënanga kaima tengo duru iwöe holi.

¹⁹Noihene tongohi ahi nasihati, deʼ ma Jou Madutu aha wonïriwo. Igoungu yaoa ngona natagali o nyawa neönanga ma Jou Madutu Ai himangoka deʼ nao toönanga manga hali Unangika.

²⁰Ngona kokiani nädotoko onangika ma Jou Madutu Aipareta deʼ nähitararono o wowango maoa-oa madodagi deʼ okia kokiani önanga yadiai.

²¹Mä de inoli gënanga ngona kokiani näiriki o nau-nauru yososawaro yamuruono naga, deʼ nätumutu önanga yodadi o tutuda o nyawa yaribuhu moi, yaratuhu moi, yamoritoa, deʼ yangimoi. Onanga kokiani o nyawa iwï modo-modongo deʼ iwi hingounu ma Jouika, yakunu yangaku deʼ yoluku yatarima o tiwi ouru mabokumu.

²²Nähuloko önanga imadiai hokä o nyawa neönanga manga hakimi, moi-moi yaregu manga doomu. O manarama gënanga kokiani önanga yadiai de madatoro. Hagala o perekara ipöparalu yakunu önanga ihiadono ngonaika, mä o ributu maiteteke yakunu önanga mahirete yatiai. O hali gënanga aha inihi uwini ngona karana önanga yomodeke imahi tagongo.

²³Nako ngona nadiai hoko gënanga, de o hali gënanga ma Jou Madutu wohipareta ngonaika, ngona aha kanakunu nadiai ani manarama, deʼ o nyawa mata-mata aha yolio de yamao yosanangi karana toönanga manga hali itaiti itiai.”

²⁴O Musa wamoteke o Yitro ai nasihati,

²⁵deʼ wäiriki o nyawa yososawaro o Israel manyawa manga hidogoronaka. Unanga wätumutu önanga yodadi o nyawa yäribuhu moi manga tutuda, yaratuhu moi, yamoritoa, deʼ yangimoi.

²⁶Onanga ihidagi manga manarama hokä o hakimi o Israel manyawaika. Hagala o perekara duru ipoparalu önanga ihiädono o Musaika, mä o ributu maiteteke önanga mahirete yatiai.

²⁷De ipaha o Musa wihigumal̄a o Yitro woiki deʼ o Yitro wolio ai bereraika.