Read Tobelo O KELUARAN 19 Bible Online

O KELUARAN 19 - Tobelo bible

O KELUARAN 19

¹Genanga de iböto o Israel manyawa yamal̄a o Rafidim, önanga yamal̄a o Mesir maberera deʼ ipaha, deʼ mawange moioka o mede mahangeoka önanga imahi ädono o Sinai matonaka ikokakahaika. Onanga imä tau o Sinai mal̄oku matimioka,

³deʼ o Musa wadoa ol̄oku gënanga la imamake de ma Jou Madutu. O l̄okuoka gënanga ma Jou witemo-temo o Musaika deʼ wï huloko ünanga wohingahu o Israel manyawaika, o Yakub aidifauku,

⁴”Ngini niamakeoka okia Tadodiai o Mesir manyawaika, deʼ sarakia Ngohi tinï ao ngini Ngohino o ngï ino nënanga de o kuaha ma amoko, hokä o totaleo rajawali yäo mangohaka magahuhu mal̄okuoka.

⁵ Oraha nanga nako ngini nihihingounu Ngohino deʼ nisetia Ahi jajika, ngini aha Tinihidadi Ahi umati mahirete. Ya mode-modekika o dunia ganga Ngohi madutu, mä ngini aha nidadi Tongohi madutu tinïhaya-hayanga,

⁶ Tomä ngiriki mangale Ahi diri mahirete, deʼ ngini aha nihïleleani Ngohi hokä o imam-imam.”

⁷Done o Musa wouti deʼ wä ahoko o tutuda-tutuda hupaya ima toomu, daha wahijarita onangika hagala moi-moi ma Jou wohipo pareta unangika.

⁸Onanga mata-mata yohaluhu ihi kutuonil̄e, ”Ngomi mimau miadiai hagala ma Jou waheto-hetongoka,” deʼ o bobaluhu gënanga o Musa wohiädono ma Jouika. Daha ma Jou wïtemo o Musaika, ”Ngohi aha toböa nginika tomahi hawoino o lobi ipiri-pirini magoronaka; hagala o nyawa aha yoihene Ngohi totemo-temo ngonaika, deʼ mulaenge o öraha gënanga önanga aha salalu yongaku ngonaika.

¹⁰Oraha nënanga nimakamake de hagala o nyawa gënanga, deʼ nahuloko önanga o wange nënanga deʼ yarehino imasadia manga diri la yadiai o puji mamau-mau. Onanga kokiani yafoka toonanga manga pakeanga.

¹¹Midiringi önanga kokiani imahidiaioka. O wange gënanga Ngohi aha touti o Sinai mal̄okuku, o ngï mata-mata o nyawa yakunu ihimake Ngohi.

¹² Nodiai o nonako ihigilolitino ol̄oku nënanga hokä o batingi yakunua o nyawa gënanga yatilakuru. Näduhunu o nyawa geönanga yadoa o l̄oku, ekola imahitigika. Onagona honanga yatilakuru mabatingi aha yähukumu yähohonenge;

¹³o nyawa geönanga kokiani yäkaweli de o helewo ekola yätoimi, deʼ yakunua yatigi. Nenanga yadaene kayaoa o nyawaika kayaoa o aiwanika; mata-mata yatotilakuru o batingi gënanga kokiani yähukumu yähohonenge. Maöraha yoihene o trompet mailingi kaililiarika, hagala o nyawa geonanga kokiani yadoa ol̄oku.”

¹⁴De ipaha o Musa ol̄okuoka de wouti deʼ wahuloko o nyawa geonanga imahidiai la yadiai o puji mamau-mau. Una wato, ”Midiringi ngini kokiani nimahidiai, deʼ itai-taitino nënanga yakunua nimako röehe moi de o ngoheka.” Daha o nyawa gönanga yomulaenge imahidiai deʼ yafoka manga pakeanga.

¹⁶ O wange hangeoka, o ngoru-ngorumino, naga o dotoreke deʼ o leletongo. O lobi mabiri-birini iuti ol̄okuku deʼ yoihene o trompet mailingi duru kahäkuatil̄e. O nyawa mata-mata manga tauoka yohawana kaima hidahaharuku.

¹⁷O Musa wä ao önanga yohupu la imakamake de ma Jou Madutu, daha önanga imaokoino ol̄oku gënanga matimiuku.

¹⁸O Sinai mal̄oku yamode-modekika yatamunuku o nofo, karana ma Jou wouti enanguku o uku magoronaka. O nofo gënanga ikuhuhulu hokä o nofo o nonofo mapara-parail̄e, deʼ ol̄oku yamode-modekika igiwi kahagiria.

¹⁹O trompet mailingi kai dogo-dogo ikuatil̄e. O Musa wotemo-temo deʼ ma Jou Madutu wïbaluhu de o dotoreke.

²⁰Ma Jou wouti o Sinai mal̄oku matubuku, deʼ wïahoko o Musa la waino ol̄oku matubuino gënanga. Daha o Musa wodoa,

²¹deʼ ma Jou wïtemo unangika, ”No uti deʼ nahidöaka o hohininga hagala o nyawa geönanga, yakunua önanga yatilakuru o batingi hupaya yaino ihilega Ngohi. Nako önanga kayatilakuru, manga hidogoronaka manga ngöe aha yohonenge.

²²Maboboloi o imam-imam yomau imahitigi Ngohino; kokiani yatebini manga diri nako kowali önanga aha Tähukumu.”

²³O Musa wïtemo ma Jouika, ”Hagala o nyawa geönanga yakunua yodoa, hababu Ngona nohipareta, hupaya mia pulono ol̄oku nënanga hokä o ngï madebi-debini deʼ miatailako mihidodiai o batingi mahigilolitino.”

²⁴Ma Jou wohaluhu, ”Nouti daha nomakilioroli nenangino nimanïki de o Harun. Mä o imam-imam deʼ o kawaha yakunua yatilakuru o batingi mangale yoboa Ngohino. Nako önanga yatilakuru aha Tä hukumu.”

²⁵Daha o Musa wouti imakamake o nyawa geonanga deʼ wohiadono ma Jou Ai behehongo onangika.