Read Tobelo O KELUARAN 2 Bible Online

O KELUARAN 2 - Tobelo bible

O KELUARAN 2

¹O öraha gënanga o nauru woma tengo o Lewi ai hoanino, wo kawingi deʼ ongoheka moma tengo ka genanginoli ami hoana.

² Daha o ngoheka gënanga mongohaka o ngohaka o nauru woma tengo. Maöraha münanga mï make o ngohaka magil̄au gënanga duru kai hailoa, münanga mi iunika o mede hange madekana.

³Mä o ngohaka magil̄au gënanga yakunua iwi iunika i tedekana. Done o ayo gënanga mal̄ë o bongo-bongo ma röehe deʼ madiai moi o karaja, deʼ mohi lapeika deʼ o teri hupaya o akere uha yö ngohama. Ongohaka magil̄au gënanga iwi kelengauku o karaja magoronaka gënanga, daha iwi ao o Nil ma Ngairika deʼ i wi kelengauku o bongo-bongo marubu-rubuoka o ngairi gënanga madatekoka.

⁴Ngoi hiranga o riaka o ngohaka magil̄au gënanga moma oko ino genangoka dau deʼ hatoli magurutika la mö lega-lega okia aha idadi deʼ ami dodoto gënanga.

⁵Ma gogiriaka gënanga ma koano ngoi ora moböa. Münanga mo uti o ngairuku mangale moma ohiki, mä o momoholehe imï lö leleani yotagi-tagi o ngairi madatekino. Itodokanino ma koano ngoi ora mamake o karaja gënanga o bongo-bongo mahi dogoronaka, daha munanga momi huloko moma tengo ngomi gilaongo ma l̄ë.

⁶Maöraha ma koano ngoi ora ma helenga o karaja gënanga, ma make magoronaka naga o ngohaka magil̄au, deʼ o ngohaka ma gil̄au gënanga iari. Ma koano ngoi ora mamao mö dora enangika deʼ motemo, ”Nënanga o Ibrani manyawa manga ngohaka.”

⁷Daha ngoi hiranga o ngohaka gënanga momi leha ma koano ngoi oraika, ”Kanö modeke Jou Boki ngohi tolingiri o ayo moma tengo o Ibrani manyawa hupaya mahü huhu o ngohaka magil̄au gënanga?”

⁸”Kayaoa,” ma koano ngoi ora mohaluhu. Done o moholehe gënanga momi ahoko ngomi ayo mahirete.

⁹Ma koano ngoi ora momi temo ma ayoika gënanga, ”Nao o ngohaka magil̄au gënanga, deʼ nï huhu ünanga mangale ngohi; damä aha ngohi tonï hewa.” Done mao o ngohaka ma gil̄au gënanga deʼ mï huhu.

¹⁰ Maöraha o ngohaka magil̄au gënanga hatoli wo lamokoka, ngoi ayo mihi lapahi ünanga ma koano ngoi oraika. Daha ma koano ngoi ora madiai o ngohaka gënanga ami ngohaka paliara. ”Unanga tihi romanga o Musa, hababu o akere magoronaka deʼ ti l̄ë,” ma koano ngoi ora mato.

¹¹ Maöraha o Musa wobaluhoka, ünanga woiki imakamake deʼ ai hoana manyawa. Unanga wä make sarakia önanga yä pakisa ya diai o karajanga madodubuho. Wï make ö o Mesir manyawa woma tengo wi toma o Ibrani manyawa.

¹²O Musa wotö tailako ai gilolitino, deʼ maöraha ünanga wä make moiua naga iwi tö tailako, wï toma o Mesir manyawa gënanga daha ai mayeti wohi baitoka o dowongiuku.

¹³Iyarehino mawange o Musa woikoli, daha wä make yahinoto o Ibrani manyawa magogiriaka ima ngamo. ”Yadodoa ho ngona nï gohara ani dodiawo?” O Musa wï leha o nyawa wa howo-howonika gënanga.

¹⁴O nyawa gënanga wohaluhu, ”Onagona ini goraka ngona nodadi tongomi mia tutuda deʼ mia hakimi? Boteka ngona nomau nohi toma ngohiö, hokä o Mesir manyawa nï toma-toma gënanga?” Daha o Musa wohawanoka deʼ womapikiri, ”To bodito! Ahi manarama gënanga ihi örikoka.”

¹⁵ Maöraha ma koano woihene idadadi gënanga, ünanga wolingiri o akali la wïtoma o Musa. Mä o Musa wopiringana daha wogogere o Midian mabereraka. O Midianino ma imam, ai romanga o Yitro, aingohaka o ngoheka yatumidi. O wange moiuku, maöraha o Musa magogiriaka wogogeruku womahi tigi-tigika moi o humuika, o Yitro aingoha-ngohaka o moholehe yatumidö yoböa la o akere youiti deʼ yöguhe manga ama ai kabingi deʼ ai duba matika mangongokere mangï uku.

¹⁷Mä o aiwani yogoa-goana yamuruono naga yäduhu o ngoha-ngohaka o moholehe gënanga. Daha o Musa waino wariwo önanga deʼ wohiokere toönanga manga aiwani yapopaliara.

¹⁸Maöraha önanga yolio toönanga manga ama wä leha, ”Yadodoa ho, o wange nënanga ngini duru itaiti nilio?”

¹⁹Onanga yohaluhu, ”Naga o Mesir manyawa womatengo womïriwo ngomi ngarokä aiwani magogoana mahomoa imi ruäe. Inoli ünanga womï riwo o akere womï guiti, deʼ wohiokere tongomi mia aiwani ipopaliara.”

²⁰”Kiaka ünanga öraha nanga?” o Yitro wä leha ai ngoha-ngohakika. ”Yadodoa ho, ngini niwi mal̄aika o nyawa gënanga? Nioiki niwiahoko ünanga wol̄omo kama moi dede ngone.”

²¹O Musa wö modeke mangale wogogere genangoka. De ipaha o Yitro womihi kawingi ngoi ora ami romanga o ngo Zipora deʼ o Musa.

²²O ngo Zipora mongohaka o ngohaka o nauru womatengo. O ngohaka gënanga iwi hiromanga o Gersom, karana o Musa womapikiri, ”Ngohi nenangoka todadi o nyawa o dagi-dagino.”

²³De ma tao-taongo ipahaika o Mesir ma koano wohonenge. Mä o Israel manyawa yotaiana karana önanga yadiai hokä o gilaongo, hiädono önanga yopoaka yogahoko o roriwo. Toönanga manga boaka deʼ manga daiana yadono ma Jou Madutuika.

²⁴ Ma Jou Madutu woihene manga boaka, deʼ Unanga wöhininga Ai jaji deʼ o Abraham, o Ishak deʼ o Yakub.

²⁵Unanga wämake o Israel manyawa imadiai o gilaongo, done Ünanga waputuhu mangale wäriwo önanga.