Read Tobelo O KELUARAN 21 Bible Online

O KELUARAN 21 - Tobelo bible

O KELUARAN 21

¹Daha ma Jou wïtemo o Musaika, ”Nahidöaka o Israel manyawaika hagala o datoro nënanga:

² Nako ngini nimaija o gilaongo womatengo niahoana manyawa-mahirete, ünanga kokiani winïkarajanga o taongo butanga madekana. O taongo matumidi magoronaka ünanga kokiani niwihibebasi deʼ iparalua wofangu okianaga.

³O demo ma ade ünanga kawoma hohomoaikahi maöraha wodadi niagilaongo, done maöraha ünanga wohupu ngoi hekata yakunua monïki. Mä o demo ma ade ünanga wokawingoka maöraha wodadi niagilaongo ngoihekata yakunu monïki dede ünanga.

⁴Nako ai tuanga wihikawingi ünanga de o ngoheka momatengo, daha ünanga wamake o ngohaka, done ngoi hekata deʼ ai ngohaka gënanga ganga madutu toai tuanga; deʼ yakunua yonïki deʼ o gilaongo gënanga maöraha ünanga iwihibebasi.

⁵Mä o demo ma ade o gilaongo gënanga wohinyata ünanga wähininga ai hekata, aingoha-ngohaka, de ai tuanga, inoli woluku wobebasi,

⁶done ai tuanga kokiani wïao ünanga o pupuji mangïika. Dokengoka o gilaongo gënanga wihuloko womaokoino womahiakeoko o ngoranoko ekola o pupuji mangï mangorana maliateoko, deʼ ai tuanga kokiani wapidaha o gilaongo gënanga ai ngauku. Done ünanga aha wodadi ai gilaongo ai umuru magurutu.

⁷Nako o Ibranioka mangoheka momatengo ami ama womihukunu hokä o gilaongo, o taongo butanga deʼ ipaha o ngoheka gënanga imihibebasua, hoʼ imahowono de o gilaongo o nauru.

⁸Nako münanga mïsanangua ami tuanga ai dungutu womikawingi, done münanga kokiani imi hukunoli ami dimonika. O ngoheka gënanga yakunua imi hukunu o nyawa maporetinoika, hababu munanga koiadilua imihidiai ami tuanga watötotomua ai jaji.

⁹Nako womatengo womiija o gilaongo o ngoheka mangale idadi ai ngohaka ngoi hekata, o gilaongo o ngoheka gënanga kokiani imihidiai hokä aingohaka mahirete.

¹⁰Nako o ngohaka o nauru gënanga wokawingoli, ünanga kahirahi kokiani wadiai womihidöaka o inomo deʼ o pakeanga inoli mata-mata o haku hokä biaha ngoi hekata madodihirakakahi.

¹¹Nako ünanga watotomua ai kokiani wadodiai gënanga, ünanga kokiani womihibebasi ngoi hekata gënanga de ngarouha de o duduhuhu matiwi.”

¹² ”O naguna wägohara o nyawa mahomoa hiädono yohonenge, kokiani iwihukumu iwihohonenge.

¹³ Mä nako ünanga wägohara wohangajaua, deʼ ai dungutua wätoma, ünanga kokiani wohioara ai diri o ngï moika Ngohi aha tohidumutu ngonaika, deʼ dokengoka ünanga wamake o roriwo iwï goana.

¹⁴Mä nako womatengo ai awunu idoa deʼ wohangaja wätoma o nyawa mahomoa, deʼ ipaha ünanga woara Ahi huhuba mangïika la wamake o roriwo iwï goana, o nyawa gënanga kokiani o huhuba mangïoka de iwil̄ë deʼ iwihukumu iwihohonenge.

¹⁵O nagona yägohara manga ayo ekola manga ama kokiani yä hukumu yähohonenge.

¹⁶ O nagona yätohiki yahioara imatengo kokiani yähukumu yähohonenge, kayaoa o nyawa gënanga yähukunoka ekola kanagahi manga tauoka.

¹⁷ O nagona yalolai manga ayo ekola manga ama, kokiani yähukumu yähohonenge.

¹⁸Nako imakangamo mahidogoronaka womatengo wigohara o nyawa mahomoa de o helewo ekola de ai bokoto, mä kowïtomaua, ünanga aha iwihukumua. Nako o nyawa iwi goha-gohara gënanga hiädono-kokiani wotigirangika mangale o gogohara gënanga,

¹⁹mä de ipaha yakunu womomiki deʼ woma dagioli de o diki-diki, o nyawa wïgoha-gohara gënanga kokiani wïhouru wipaliara hiädono wotogumu deʼ wohidoaka ai rugi madururu hokokia madekana ünanga wopanyake.

²⁰O nagona yägohara manga gilaongo o nauru ekola o ngoheka hiädono o gilaongo gënanga gila-gila yohonenge, kokiani yähukumu.

²¹Mä nako o gilaongo gënanga yohonengua o wange moi ekola o wange hinoto magoronaka, o tuanga gënanga iwihukumua. O rugi wamö make-make karana yahihanga ai gilaongo gënanga marupa o hukumanga unangika.

²²Nako o nau-nauru yamuruono naga magogiriaka imakangamo deʼ womatengo toönanga manga hidogoronaka womidiai o bodito ongoheka momatengo deʼ ami röehoka hiädono münanga imi haiotaka, mäyadaenua ami homoaika, done o nyawa gënanga kokiani wofangu o bobangu ma amoko hokä ami rokata wogaho-gahoko, deʼ o hakimi ihi goungu.

²³Mä nako o ngoheka gënanga mamake o bodito iholoi itubuho, done o hukumanga mangale o dorou gënanga ganga o jiwa madururu o jiwa,

²⁴ o lako madururu o lako, o ingiri madururu o ingiri, o giama madururu o giama, o l̄ou madururu o l̄ou,

²⁵o nabo madururu o nabo, o nguku manabo madururu o ngukumanabo, o noboho madururu o noboho.

²⁶O nagona yägohara manga gilaongo manga lako hiädono i piloko, kokiani yahibebasi o gilaongo gënanga hokä manga lako maduduhuhu.

²⁷Nako womatengo wïgohara ai gilaongo hiädono ai ingiri itobiki, kokiani o gilaongo gënanga wihibebasi hokä ai ingiri-gënanga maduduhuhu.”

²⁸”Nako moi o hapi manauru yätaduku imatengo hiädono yohonenge o hapi gënanga kokiani yatoma yakaweli de o helewo, deʼ ma akeme yakunua yaol̄omo, mä madutu aha koiwi hukumua.

²⁹Nako o hapi manauru gënanga mabiaha itoba taduku, deʼ madutu iwihidöakoka o hohininga, mä wögoanua o aiwani gënanga, daha nako o hapi manauru gënanga yätaduku imatengo hiädono-yohonenge, done o aiwani gënanga kokiani yatoma yakaweli de o helewo deʼ madutuö kokiani yahukumu yahohonenge.

³⁰Mä nako mahapi madutu gënanga iwihigumal̄a wofangu o duduhuhu, ünanga kokiani wofangu hokokia mangöe yogaho-gahoko mangale ai jiwa maduduhuhu.

³¹Nako yätoma-toma gënanga imatengo o ngohaka o nauru ekola ongoheka, idadi o datoro kagenangoli.

³²Nako yätoma-toma gënanga imatengo o gilaongo o nauru ekola o ngoheka, o hapi madutu gënanga kokiani wofangu de o tiwi haaka moruange o gilaongo madutuika gënanga, deʼ o hapi manauru gënanga kokiani yakaweli de o helewo hiädono i honenge.

³³O nagona yal̄ë moi o humu madadamunu ekola o humu yohaiti deʼ yatamunua, daha o hapi manauru o dutu moi ekola o keledai yaotaka magoronauku,

³⁴o humu madutu gënanga kokiani wofangu o rugi madururu o aiwani ipopaliara madutuika gënanga, mä ünanga yakunu womä l̄ë o aiwani ipopaliara i hone-honengoka gënanga.

³⁵Nako imatengo manga hapi manauru yatoma o nyawa mahomoa manga hapi manauru, madutu yahinoto kokiani yahukumu o aiwani ipopaliara kai wango-wangohi gënanga deʼ ima regu matiwi. Onangö kokiani imäregu o aiwani ipopaliara ihone-honengoka maakeme gënanga.

³⁶Mä nako ihi örikoka o hapi manauru gënanga mabiaha itoba-taduku, deʼ madutu wogoanua, ünanga kokiani watururu de o hapi manauru mangango, deʼ yakunu womä l̄ë ma aiwani ipopaliara mahonenge gënanga.”