Read Tobelo O KELUARAN 23 Bible Online

O KELUARAN 23 - Tobelo bible

O KELUARAN 23

¹ ”Uha nihi ngahu-ngahu o abari ielu-eluku, deʼ uha nïariwo o nyawa madorou ihi döa-döaka o hakihi madiaiua.

²Uha nimahi mote-moteke de o nyawa yowöe-wöe nako önanga yodiai o howono ekola ihimotekua o hukumu deʼ ihidöaka o hakihi madiaiua.

³ Uha nia tingaka de nia fara o nyawa manga perekara nia putuhu magoronaka, ngarokä niä totailako yahowono ekola yahowonua gënanga o mihikini manyawa.

⁴ Nako ngini imadaenika niamake niahaturu manga hapi ekola manga keledai ihihangika, niao nihigilio madutuika.

⁵Nako niahaturu manga keledai irubaiha karana magina madubuho, nioriwo ënanga niamomikil̄e o keledai gënanga; uha niamal̄aika kahoko gënanga dika.

⁶ Niä hidiai o mihikini manyawa de ma adili nako önanga yoböa yaö manga perekara o pengadilanika.

⁷Nimahirehene o galaki ielu-eluku deʼ uha niädiai o hababu o nyawa yahowonua niä hukumu yohonenge, karana Ngohi tohigoungua o nyawa yododiai o dorou hokä hoko gënanga.

⁸Uha niatarima o uru mabobokumu matiwi, hababu o uru mabobokumu matiwi gënanga yadiai o nyawa yodadi yopiloko o diaiika deʼ yahidadi rugi hagala o nyawa yahowo-howonua.

⁹ Uha nia hidiai nisabaranga o nyawa dagi-dagino; ngini ni hi öriki sarakia mamamao nidadi o nyawa dagi-dagino, hababu kahuruono nginiö ma o nyawa dagi-dagino o Mesir mabereraka.”

¹⁰ ”O taongo butanga madekana ngini yakunu niö datomo nia dumule deʼ nia l̄ë okia ihi hasi-hasili.

¹¹Mä o taongo matumidoka o tonaka gënanga kokiani ngini niamal̄aika. O taongo gënanga magoronaka ngini yakunua nia toomu okianaga ena mahirete iwöwango-wangoil̄e niadumuleoka. Niamal̄aika gënanga mangale o mihikini manyawa, de mahouohi mangale o aiwani ihuhuhuku. Niadiai hoko genangoli de nia angguru madumule deʼ nia zaitun magota mautu.

¹² O minggu moi magoronaka o wange butanga ngini yakunu ni karajanga, mä o wange matumidoka ngini kokiani nimahibatongo, hupaya niaaiwani o gigini, o gogilaongo deʼ hagala o nyawa o dagi-dagino yomomanarama mangale ngini yakunoli imahibatongo.

¹³Niohininga nihidodiai hagala Taheto-hetongoka nginika. Uha niahuba o gikiri mahomoa maboboloi niahetongo maromanga ma yakunua.”

¹⁴”O taongo ihigetongo ngini kokiani niadiai hange o wange ma amoko mangale nihihoromati Ngohi.

¹⁵ O Abib mamede magoronaka, maöraha ihitotatapuoka ngini kokiani nihiamoko o Roti iRagi-ragi Ua ma Rameanga de madodagi tinihipoparetaka nginika, hababu o mede gënanga magoronaka ngini niamal̄a o Mesir. O rame o wange tumidino madekana gënanga uha niaol̄omo o roti ipake-pake o ragi. Nihi geto-getongo ngini niböa nihuba deʼ nihihoromati Ngohino, ngini kokiani niao o huhuba.

¹⁶ Nihirame o Gugutuku ma Rameanga maöraha ngini nimulaenge niautuku niadumule mahasili madodihiraka. Nihirame o Tau o Hoka-hoka ma Rameanga o taongo mabahaka maöraha ngini niatoomu niaangguru madumule mahasili deʼ niagota ihohoko madumule mahasili.

¹⁷O taongo ihi getongo maöraha niadiai o rame gënanga, mata-mata o nau-nauru kokiani yoboa ihihuba ihihoromati Ngohino ma Jou nia Jou Madutu.

¹⁸Uha nihihuba o roti dema ragi-ragioka maöraha ngini nihihuba niaaiwani o gigini Ngohino. O aiwani o gigini mahaki ihihuba-huba Ngohino o rame-rame gënanga magoronaka yakunua imal̄aika hiädono yarehino mangorumino.

¹⁹ O taongo ihigetongo ngini kokiani niao ma Jou nia Jou Madutu Ai Tauika o gandum madodihiraka ngini niautuku. O duba mangohaka ma akeme ekola o kabingi mangohaka yakunua ihi hakai de ma ayo mahuhu mateongo.”

²⁰”Ngohi aha tahuloko Ahi malaekat inihihira ngini hupaya ini goana ngini deʼ iniao ngini mangï Tasosadiaika.

²¹Niatailako nihidodiai deʼ nihingounu ënanga. Uha nimalawani enangika karana ënanga Ahi huhuloko, deʼ ënanga aha inihiapongua niatö totilakuru.

²²Nako ngini nihingounu enangika deʼ niadiai hagala Tohipopareta, Ngohi aha toparangi tälawani nia haturu mata-mata.

²³Ahi malaekat aha inihihira ngini deʼ iniao ngini o Amori, o Het, o Feris, o Kanaan, o Hewi, deʼ o Yebus manyawa manga bereraika deʼ önanga aha Täbinaha.

²⁴Uha niahuba manga gogoana madulada deʼ uha niaturu madodagi önanga yohuba deʼ yohoromati. Niawedere toönanga manga gogoana madulada gënanga deʼ niatobiki o liate-liate o helewo önanga yapöpake-pake mangale yohuba de yohoromati.

²⁵Nako ngini nihihuba Ngohi ma Jou nia Jou Madutu, ngini aha tinihibarakati deʼ o inomo, deʼ nia oke-okere, deʼ hagala o panyake aha Tohitingaka dede ngini.

²⁶Nia bereraka aha koiwa o ngongoheka yahail̄otaka ekola yongohakua. Ngini aha Tohidöaka nia umuru ikurutu.

²⁷O hoana de o berera ngini niangö ngika-ngika aha Tadiai ihï modongo Ngohino; önanga aha Tadiai yobingu imahi orikokaua; nia haturu mata-mata aha imaidulu deʼ yopiringana.

²⁸Nia haturu-haturu aha Täruaeuku, deʼ o Hewi, o Kanaan deʼ o Het manyawa Täduhu Nia himangoka, hupaya ngini yakunu nitagi nia himangiha.

²⁹Onanga aha Täduhua kamamoi o taongo moi magoronaka, hupaya o tonaka gënanga uha ipaliaraua, deʼ o aiwani madorou uha yakaika-yakaino mahininga mahuka.

³⁰Onanga aha Täduhu o hidoku moi-hidoku moi, hiädono ani nyawa yaoaka manga ngöe mangale yö gogere o tonaka gënanga.

³¹Mabatingi-mabatingi niaberera aha Tohigogere o Akaba ma Jikoka hiädono o Efrat ma Ngairika, deʼ o Ngöto i Kokoronaka hiädono o tonaka ikokakahaika. Ngini Tinihidöaka niä kuaha yogogogere o berera gënanga, hiädono ngini yakunu niäduhu maöraha ngini nitagi niahimangika niaora o tonaka gënanga.

³²Uha nidiai o jaji de o nyawa geonanga ekola de toönanga manga gikiri.

³³Uha nihigumal̄a o nyawa geonanga yögogere niabereraka, hupaya ngini uha niahuba toönanga manga gikiri deʼ nibaradoha Ngohino. Nako ngini niahuba toönanga manga gikiri, ngini inïotaka o honenge madadagoko magoronauku.”