Read Tobelo O KELUARAN 24 Bible Online

O KELUARAN 24 - Tobelo bible

O KELUARAN 24

¹De ipaha ma Jou wïtemo o Musaika, ”Nodoa hupaya nohïhimanga Ngohi, ngona nimakinïki de o Harun, o Nadab deʼ o Abihu, deʼ yamoritumidi o hoana matutuda, magurutikahi deʼ nia tilabukuku nihihuba Ngohi.

²Duga-duga ngona mahirete yakunu naino nomahitigi Ngohino. Mahomoa yakunua yaino imahi tigi-tigino, deʼ yomoholoi o kawaha yakunua yadoa o l̄oku nënanga.”

³Daha o Musa woiki deʼ wohingahu o nyawaika gënanga mata-mata ma Jou Aipareta deʼ Ai datoro. Onanga mata-mata yohaluhu i imakutuonil̄e, ”Ngomi mimau miadiai mata-mata wahö heto-hetongo ma Jou.”

⁴Genanga deʼ iböto o Musa watulihi mata-mata ma Jou Aipareta. Yarehino o ngoru-ngorumino, wohigoko o huhuba mangï o gahumu moi de o tugu ngimoi de hinoto ol̄oku gënanga matimioka; o tugu yogetongo idadi o dagali o Israeloka moi manga hoana.

⁵Daha o Musa wähuloko o gogoduru yamuruono naga, deʼ önanga ihihuba o huhuba ituhu-tuhuku mangale ma Jou inoli yatoaka o hapi o dutu muruono naga mangale o dame mahuhuba.

⁶O hidoku moi o hapi ma awunino gënanga wal̄e o Musa de, woguhe hagala o bokoluku. O hidoku moioli yoguhe o huhuba mangï mal̄okuku.

⁷De ipaha wal̄ë o jaji mabuku yöduli-dulihika ma Jou Aipareta, deʼ wabasa de ai ilingi kahäkuatil̄e mangale o nyawa geonanga. Onanga yato, ”Ngomi mimau miwihingounu ma Jou deʼ miadiai hagala Aipareta.”

⁸ Daha o Musa wal̄ë o awunu naga o bokolo magoronaka gënanga deʼ wahituagi o kawahauku. Wotemo, ”O awunu nënanga yakekete o jaji waliko-likoka ma Jou dede ngini, wohihol̄e hagala Aipareta.”

⁹De ipaha o Musa, o Harun, o Nadab, o Abihu deʼ yamoritumidi o tutuda gënanga yadoa ol̄oku,

¹⁰deʼ önanga iwimake o Israeloka manga Jou Madutu okia nagamoi mal̄okuoka hokä o mehele o nilam mahelewo, deʼ mamibihi hokä o dihanga madodararono.

¹¹Hagala o Israeloka manga tutuda gënanga iwimakeoka ma Jou Madutu; ngaroka hokogënanga önanga yobinahaua. Genanga de ibötoönanga yol̄omo deʼ yokere.

¹²De ipaha ma Jou wïtemo o Musaika, ”Naino Ngohino ol̄oku matubuoka. Genangoka aha Tonihidöaka ngonaika o helewo hinoto Täduli-dulihika Ahi tita gënanga Tohidöaka mangale o dodotoko o Israel manyawaika gënanga.”

¹³Daha o Musa deʼ o Yosua ai roriwo imahidiaioka deʼ o Musa wadoa o l̄oku ma Jou Ai ngï gënanga.

¹⁴O Musa wohibehehongoka o Israeloka manga tutudaika, ”Ni tamä o tau-tauoka nënanga hiädono ngomi mimakilioro. O Harun deʼ o Hur naga dede ngini nenangoka. O nagona naga manga hali, yakunu nia himanga önanga mangale nihitiai.”

¹⁵O Musa wadoa o Sinai mal̄oku, daha ünanga iwitamunu o lobi o doomu moi.

¹⁶Ma Jou Ai himanga macahaya iuti ol̄okuku gënanga deʼ o Israel manyawa yamake hokä o uku itoka-tokara ol̄oku matubuoka. O wange butangaino madekana o lobi yatamunuku o l̄oku gënanga, deʼ o wange matumidoka ma Jou wïahoko o Musa o lobino gënanga.

¹⁸ Daha o Musa igila-gila wodoa hiädono ünanga wowohama o lobi gënanga magoronaika. O wange moruata de o hutu moruata o Musa wogogere genangoka.