Read Tobelo O KELUARAN 25 Bible Online

O KELUARAN 25 - Tobelo bible

O KELUARAN 25

¹Ma Jou wïtemo o Musaika,

²”Nähuloko o Israel manyawa yoao o huhuba Ngohino. Onagona manga hininga igaraki, kokiani yoao o huhuba,

³marupa: o gurasi, o haaka deʼ o tabaga;

⁴o ngöere o lenan ma aluhu, o ngöere o wol mabihi-bihi, mawüwungu deʼ madoka-dokara o ngöere o kabingi magogo,

⁵o duba manauru makai yadodokarika, o aiwani makai ma aluhu, o gota akasia,

⁶o hilo maminya, o upacara maminya marampa-rampa de mangale o dupa mabou-bounu,

⁷rupa-rupa o intan deʼ o folori mangale ihiporomu ma Imam wo Lamo-amoko ai kutanga deʼ ai alu mangunungu madadamunu.

⁸Nähuloko o Israeloka gënanga yodiai o tau o gahumu moi mangale Ngohi, hupaya Ngohi yakunu togogere toönanga manga hidogoronaka.

⁹O tau deʼ mapakakaha kokiani önanga yadiai imoteke mahirahi Tatatoroka aha Tonihimatoko ngonaika.”

¹⁰”Nidiai o peti o gahumu moi magota o akasia magurutu o senti o ratuhu moi de ngimoi, mangöata deʼ magurutil̄e moi-moi o senti mori butanga de butanga.

¹¹Nihilape magoronaka deʼ maporetino de o gurasi madutu deʼ niodiai mariwoto o gurasi.

¹²Mangale magota madodowiti, niodiai o gogoli o gurasi iata deʼ nihilaketika mal̄ouika iatö, o gogoli hinoto magumuruku yögetongo.

¹³Niodiaiö madodowiti magota o akasia deʼ nihilape de o o gurasi.

¹⁴Daha nihingohama madodowiti o gota gënanga mapeti magogolioko gënanga magumurukoko yögetongo.

¹⁵Madodowiti o gota gënanga kokiani kahirahi naga magogoli-gogolioka gënanga, deʼ yakunua ihihupu.

¹⁶Daha o peti magoronaka gënanga kokiani ngona nakelengauku o helewo hinoto deʼ o tita-o tita aha Tohi döa-döaka ngonaika.

¹⁷ Niodiai opeti gënanga madadamunu o gurasi madutu, magurutu o senti o ratuhu moi de ngimoi deʼ mangöata o senti mori butanga de butanga.

¹⁸Nidiai hinoto o malaekat o gurasi yatütutukoka,

¹⁹o peti gënanga mabarene yogetongo moi. Hinoto o malaekat gënanga kokiani idadi kamoi deʼ madadamunu,

²⁰deʼ niadiai imarihimangino deʼ magahuhu yoderefeuku o peti gënanga mal̄okuku.

²¹Nionoauku o helewo hinoto o peti gënanga magoronauku deʼ niödiai madadamunu mal̄okuku.

²²Genangoka mangï Ngohi aha homamake dede ngona, deʼ madadamunu mal̄okuoka, o malaekat hinoto gënanga mahidogoronaka, Ngohi aha tohidöaka hagala Ahi tita o Israel manyawaika.”

²³”Nidiai o gahumu moi o meja de o gota akasia magurutu o senti moritufange de tufange mangöata o senti moruata de iata, deʼ magurutil̄e o senti moributanga de butanga.

²⁴Nihilape de o gurasi madutu deʼ niariwotino de o gurasi madatekino yakilolitino.

²⁵Niodiai mameja madateke mangöatika o senti tumidi de mahononga deʼ niabatingino de o gurasi madateke magilolitino gënanga.

²⁶Nio diai o gogoli o gurasi o gahumu iata deʼ nihilaketika gënanga malibuku iatika mal̄ouika imahi tigi-tigika madatekika.

²⁷O gogoli gënanga mangale yatumungu magota madodowiti, hupaya o meja gënanga yakunu yadowiti.

²⁸Magota madodowiti gënanga kokiani yadiai de o gota akasia deʼ ihilape de o gurasi.

²⁹Nidiai o dodai-dodai, o udo-udomo, o kendi deʼ o mangko-mangko mangale o huhuba o angguru mateongo. Mata-mata o meja gënanga mapakakaha kokiani yadiai de o gurasi madutu.

³⁰ O meja gënanga kokiani yakelenga o Jaji ma Peti mahimangoka, deʼ o meja mal̄okuoka gënanga kokiani salalu i sadia o roti yadodiaiukuoka.”

³¹”Nidiai o hilo mal̄ou de o gurasi madutu. Mabuku deʼ majojö kokiani yadiai de o gurasi itütutukoka; o bunga-bunga ihipoporomu, maboro deʼ maboro mahahawo kokiani idadi moi de mabuku de majojö.

³²Majojöika kokiani niodiai majaga butanga, hange majaga magumuruku yögetongo.

³³Majaga yögetongo kokiani niodiai o poromu marupa o niara mahuri o gahumu hange maboro deʼ maboro mahahawo.

³⁴Majojöika kokiani niodiai o poromu marupa o niara mahuri o gahumu iata maboro deʼ maboro mahahawo.

³⁵Majaga mahabi yögetongo gënanga matimiuku kokiani niodiai moi o bunga maboro.

³⁶Ingodumu o hilo mal̄ou gënanga deʼ mabunga maboro de majaga-jaga kokiani niadiai de o gurasi madutu itü tutukoka, o dobiki moi.

³⁷O hilo mal̄ouoka gënanga niodiai o hilo o gahumu tumidi deʼ nihigogere hoko gënanga marupa hiädono madararono iruba mahimangika.

³⁸Nidiai o pakakaha mangale ihi tebi-tebini o hilo mahubu deʼ mabobilanguö de o gurasi madutu.

³⁹Niapake o gurasi o kilo moruange de motoa o gurasi madutu hupaya yadiai o hilo mal̄ou gënanga de hagala toënanga mapakakaha.

⁴⁰ Nogoana hupaya mahilo mal̄ou gënanga yadiai imoteke madüku tonihi mato-matokoka ngonaika ol̄oku nënanga matubuoka.”