Read Tobelo O KELUARAN 26 Bible Online

O KELUARAN 26 - Tobelo bible

O KELUARAN 26

¹”Nidiai o Tau-tau mangale Ngohi de o dobiki ngimoi o ngöere o lenan ma aluhu, ihidiai de o wol mabihi-bihi mawuwüngu deʼ madoka-dokara. Nia suji o ngöere gënanga de o malaekat madulada.

²O dobiki moi-dobiki moi kokiani imatero maduduga, magurutu o metere ngimoi de hinoto deʼ mangöata o metere hinoto.

³Ma ngöere o dobiki motoa kokiani ihidohanga idadi o hidete moi, deʼ madobiki motoa mahomoa kokiani yadiai hokogenangoli.

⁴Niodiai madudumungu de o ngöere mabihi-bihi mahidete hinoto gënanga madatekino.

⁵Madudumungu moritoa o hidete yögetongo.

⁶Niodiai o lalakete gurasi moritoa, mangale ihidohanga o hidete gënanga hinoto hupaya yakunu idadi kamoi.

⁷Mangale matau gënanga makatu niodiai o dobiki ngimoi de moi o ngöere o kabingi magogo.

⁸O dobiki moi-dobiki moi kokiani imaketero maduduga, magurutu o metere ngimoi de hange deʼ mangoata o metere hinoto.

⁹O dobiki motoa kokiani ihidohanga idadi o hidete moi, deʼ o dobiki butanga mahomoa kokiani yadiai hoko genangoli. Madohanga mabutangaka kokiani yatupukoro hinoto hupaya yatamunu mahimangino.

¹⁰Niodiai odudumungu moritoa mahidete madodihiraka madatekino deʼ moritoa o dudumungu o hidete mahinotoka madatekino.

¹¹Niodiai o lalakete moritoa o tabaga deʼ ihi laketika madudumungika gënanga hupaya o hidete hinoto gënanga yakunu i dadi kamoi o tau-tau makatu.

¹²Ma ngöere madobiki maboloi ganga mangale i hitamunu ma Tau-tau maporete.

¹³Ma ngöere mahou mangöata o senti moritoa ma Tau magurutu kokiani imal̄aika yatamunu ma Tau gënanga magumurukoko.

¹⁴Nidiai o dadamunu hinoto mangale ma Tau maporetino, moi o duba makai yadodokarika deʼ moioli de o aiwani makai ma aluhu.

¹⁵Niodiai matau majaro iriko-rikotil̄e de o gota akasia.

¹⁶Moi-moi majaro magurutu o metere iata deʼ mangoäta o senti mori butanga de butanga.

¹⁷Majaro yögetongo naga o bebeloho hinoto o habi moi, hiadono majaro-majaro gënanga yakunu imakodohanga moi de mahomoaika.

¹⁸Mangale ma Tau yohima-himangil̄e o koreharail̄e, niodiai o jaro monaoko,

¹⁹de mahohol̄e o haaka moruata, hinoto majaro yö getongo matimioka mangale mabebeloho hinoto.

²⁰Mangale ma Tau yöhima-himanguku o koremieuku, niodiai o jaro monaoko,

²¹de mahohol̄e o haaka moruata, hinoto majaro yögetongo matimiuku.

²²Mangale ma Tau maporetiha o wange madumuniha yohimangiha niodiai o jaro butanga

²³deʼ o jaro hinoto mangale malibuku-malibuku.

²⁴Ma jaro malibuku gënanga kokiani ihi dohanga mal̄ouika, i gila-gilail̄e hiädono daku mal̄okuil̄e. Ma jaro hinoto idödadadi malibuku kokiani idiai madodagi hoko gënanga.

²⁵Hoʼ mata-mata naga o jaro tufange de mahohol̄e o haaka ngimoi de butanga, hinoto majaro yögetongo matimiuku.

²⁶Niodiai mahita ngimoi de motoa o gota akasia, motoa mangale majaro ma Tau magumurukoko,

²⁷motoa magumuruku mahomoaoko, deʼ motoahi ma Tau maporetino o wange madumuniha ihimangoka.

²⁸Mahita ikokorona kokiani ihitabi magurutil̄e yatogoronaika majaro, mabahaka de mabahaika o Tau gënanga.

²⁹Ma Tau majaro deʼ mahita gënanga kokiani ihilape de o gurasi. O gogoli-gogoli layatumungu o gota-o gota gënanga kokiani ihidiai de o gurasi.

³⁰Nihigoko o Tau gënanga imoteke de mahirahi Tatatoroka Tonihidumu-dumutoka ngonaika ol̄oku nënanga matubuoka.

³¹Niodiai o gahumu moi o ngorana madadatoko de o lenan ma aluhu ihidiai de o wol mabihi-bihi, mawuwungu deʼ madoka-dokara. Niasuji o ngöere gënanga de o malaekat madulada.

³²Nia nuneuku o ngorana madadatoko gënanga o liate iatuku o gota akasia ihilape de o gurasi o gahumu iata de malalakete ogurasi deʼ ihitabi mahohol̄e o haaka iata mal̄okuika.

³³ Nihigogere o ngöere gënanga o lalakete itatatorika matimiuku o Tau makatuoka. O ngöere gënanga maporetoka kokiani yakelenga o Jaji ma Peti madol̄a o helewo hinoto gënanga. O ngöere gënanga ihitingaka o Ngï i Tebi-tebini de o Ngï Duru i Tebi-tebini.

³⁴Niogelenga o Jaji ma Peti madadamunu mapeti mal̄okuku.

³⁵O huhuba mameja nihigogere o Ngï duru i Tebi-tebini maporetoka o koremieuku idaduoka, deʼ mahilo mal̄ou o koremieuku i daduoka o Tau gënanga magoronaka.

³⁶Niodiai o Tau mangorana madadatoko de o lenan mangöere ma aluhu ihidiai de o wol mabihi-bihi, mawuwungu deʼ madoka-dokara, ihiporomu de o suji-suji.

³⁷Mangale mangorana madadatoko gënanga kokiani niodiai motoa o liate de o gota o akasia ihilape de o gurasi deʼ ihi kodohanga de o lalakete o gurasi motoa. Niodiai o gahumu motoa o hohol̄e de o tabaga mangale oliate-liate gënanga.”