Read Tobelo O KELUARAN 27 Bible Online

O KELUARAN 27 - Tobelo bible

O KELUARAN 27

¹”Niodiai o huhuba mangï o gahumu moi de o gota akasia. Madüku ipahagi magurutu deʼ mangoata moi-moi o metere hinoto de o senti monaoko deʼ magurutil̄e o metere moi de o senti moruange.

²Malibuku yögetongo mal̄okuino kokiani niodiai o tataduku idadi kamoi de o huhuba mameja. Ingodumu kokiani ihilape deʼ o tabaga.

³Niodiai o bohoko, o sikop, o mangko, o garpu de o uku mangï. Mata-mata o pakakaha gënanga kokiani ihidiai deʼ o tabaga.

⁴Niodiai o dedeta o kawa o tabaga deʼ ihipakeika iata o gogoli mangale madodowiti magota malibuku iata matimino.

⁵Ma gurutil̄e madedeta o kawa gënanga yatogoronaino mahuhuba mameja magurutil̄e. Madedeta o kawa gënanga kokiani ihipalino mahuhuba mameja matimino.

⁶Niodiai hinoto madodowiti o gota akasia malape o tabaga,

⁷deʼ ihi ngohama magogoli-gogolioko mahuhuba mameja magumurukoko hinoto maöraha yadowiti o huhuba mameja gënanga.

⁸Niodiai o huhuba mameja gënanga de o aoto deʼ mapidaha magoronaka, imoteke demahirahi Tatatoroka Tonihi mato-matokoka ngonaika o l̄oku nënanga matubuoka.”

⁹”Niodiai o looa Ahi Tau magilolitino nihi bangi-bangi o hidete o ngöere o lenan ma aluhu. O koreharail̄e idaduoka, mahidete gënanga magurutu o metere moruata de iata,

¹⁰ihi tumungu o liate o tabaga monaoko, moi-moi de mahohol̄e o tabaga, deʼ malalakete inoli madudumungu o haaka.

¹¹Niodiai hokä hokogenangoli o koremieuku idaduoka.

¹²O wange madumuniha idaduoka, o hidete gënanga magurutu o metere monaoko de hinoto, de o liate ngimoi de mahohol̄e ngimoi.

¹³O wange mahiwaroko idaduoka, naga de mangoranoka, magurutu o hidete genangö o metere monaoko de hinoto.

¹⁴Mahigili de manirakoka o ngorana gënanga kokiani ihipakeika o hidete, moi-moi magurutu o metere butanga de o senti mori butanga de maliate hange mahohol̄e hangeoka.

¹⁶Mangale mangorana kokiani nihi pake o ngorana madadatoko o lenan ma aluhu magurutu o metere hiwo de ihi diai de o wol mabihi-bihi, mawuwungu deʼ madoka-dokara, deʼ ihi poromu de o suji-suji. Mangale mangorana madadatoko gënanga kokiani niodiai o lite iata de mahohol̄e iata.

¹⁷Mata-mata o liate o looa gënanga magilolitino kokiani ihi kodohanga moi de moika de madudumungu o haaka; malalakete kokiani o haaka deʼ mahohol̄e o tabaga.

¹⁸O hidete o looa gënanga magilolitino magurutu o metere moruata de iata mangöata o metere monaoko de hinoto deʼ magurutil̄e o metere hinoto de o senti monaoko. Mahidete kokiani yadiai de o lenan mangöere ma aluhu de mahohol̄e de o tabaga.

¹⁹Ingodumu o pakakaha yapake-pake o Tau magoronaka, mata-mata o bebeloho mangale o Tau deʼ mangale mahidete kokiani yadiai de o tabaga.”

²⁰”Nähuloko o Israel manyawa yoao o zaitun maminya madutu deʼ duru maoa-oa mangale o hilo Ahi Tau-tau magoronaka, hupaya yakunu yatuhuku deʼ iwango gila-gila.

²¹O Harun deʼ aingoha-ngohaka kokiani ihidailako o hilo gënanga o bobimaoa hiädono o hutu inohi Tongohi Ahi ngïoka, o ngöere inünuneuku maporetoka o Jaji ma Peti mahimangoka. O pareta gënanga kokiani yadiai kahiado-adonika o Israel manyawa deʼ manga ngohaka de manga danongo.”