Read Tobelo O KELUARAN 29 Bible Online

O KELUARAN 29 - Tobelo bible

O KELUARAN 29

¹”Hoko nënanga madodagi niä tabis o Harun de aingoha-ngohaka hupaya önanga hokä ma imam yakunu ihïleleani Ngohi. Nal̄ë o hapi manauru magö o dutu moi, deʼ o duba manauru koiwa mabodito o dutu hinoto.

²De o tarigu duru maoa-oa nia ojo deʼ koiwa maragi. O hidoku moi nia ojo-ojouku gënanga kokiani yadiai o roti de o zaitun maminya, o hidoku moioli koiwa maminya, deʼ mahouohi yadiai okukisi ihi nau-nauhika de o minya.

³Yonoauku o karajauku deʼ ihihuba gënanga Ngohino kamamoi de o huhuba o hapi manauru deʼ o dutu hinoto o duba manauru.

⁴Nähuloko o Harun deʼ aingoha-ngohaka yoboa ahi Tau mangoranoka deʼ imaohiki.

⁵Nihipake o Harunika o imam mapakeanga: o kameja, o kutang, o juba yatamu-tamunu o kutang, o alu madadamunu deʼ o gorona maninikutu.

⁶Nögelenga o haëke madadamunu ai haëkuku de nohitodenge o haëke madadamunika gënanga o poromu o gurasi de o garade ’Ihitingaka mangale ma Jou’.

⁷Daha nal̄ë o upacara maminya, nihituagi ai haëkuku deʼ nïminya ünanga.

⁸Genanga deʼ iböto, nähuloko aingoha-ngohaka yaino deʼ nahipake o kameja

⁹deʼ o gorona maninikutu onangika, daha nägelenga o haëke madadamunu toönanga manga haëkuku. Hoko gënanga madodagi nä tabis o Harun deʼ aingoha-ngohaka. Onanga deʼ toönanga manga ngohaka de manga danongo hokä ma imam kokiani ihïleleani Ngohi kahi ado-adonika.

¹⁰De ipaha o hapi manauru gënanga kokiani ngona nao Ahi Tau-tau mahimangiha. O Harun deʼ ai ngoha-ngohaka kokiani yögelenga toona manga giama o aiwani gënanga mahäekuku.

¹¹Natoaka o hapi manauru gënanga Ahi himangoka, o Tau-tau mangoranoka.

¹²Nal̄ë o hidoku moi o hapi ma awunu gënanga deʼ nohinauhu de ani hagarara o huhuba mangï matotatadukika. O awunu gënanga mahou kokiani nödogopoa o huhuba mangï matimino.

¹³Genanga de iböto nal̄ë mata-mata mahaki yahawo-hawoino-mamamata madol̄a, magate duru maoa-oa deʼ magotooro hinotö deʼ mahaki deʼ nakelengauku mata-mata gënanga o huhuba mangï mal̄okuoka deʼ natuhuku mangale o huhuba Ngohino.

¹⁴Ma akeme, makai deʼ mawariki mahapi manauru gënanga kokiani yatuhuku o tau maporetoka. Genanga o huhuba mangale o imam-imam manga baradoha ma apongo.

¹⁵De ipaha nal̄ë o dutu moiani o duba manauru gënanga o Harun deʼ aingoha-ngohaka kokiani yögelenga toönanga manga giama o awini gënanga mahaëkuku.

¹⁶Daha natoaka o aiwani gënanga, nal̄ë ma awunu deʼ nohi tuagi mahuhuba mangï magumurukoko iatö.

¹⁷O duba manauru gënanga kokiani nalui-luiti. Mamamata madol̄a deʼ magaono kokiani naihoro deʼ nakelengauku mahaëke mal̄okuoka inoli yalö lui-luituku mahomoa mal̄okuoka.

¹⁸ Nohihuba ingodumu o duba manauru gënanga o huhuba mangï mal̄okuoka mangale o huhuba itö tuhu-tuhku. O huhuba bounu gënanga yasanangi Ahi hininga.

¹⁹Nal̄ë o duba manauru o dutumoioli, enagënanga o duba manauru mangale o tabisan madatoro madodagi. Nähuloko o Harun deʼ aingoha-ngohaka yögelenga toönanga manga giama o aiwani gënanga mahaëke mal̄okuku.

²⁰Daha natoaka o duba manauru gënanga, nal̄ë ma awunu mahuhutulu deʼ nohinauhu o Harun deʼ aingoha-ngohaka manga ngauku mahoka manirakika, toönanga manga giama maniraka mahagarara mal̄ehaika deʼ manga l̄ou maniraka mahagarara mal̄ehaika. O awunu mahou gënanga kokiani nohituagi mahuhuba mangï magumurukoko iatö

²¹Nal̄e mahuhutulu o awunu naga o huhuba mangï mal̄okuoka deʼ mahuhutulu o upacara maminya, daha nadohurero o Harun deʼ ai ngoha-ngohakaikali toönanga manga pakeanga. Demadodagi hoko gënanga o Harun deʼ aingoha-ngohaka ikali toönanga manga pakeanga yatingakoka mangale Ngohi.

²²Nal̄ë o duba manauru gënanga mabikini dema haki-hakioka, mahaki malape mamamata madol̄aka, magate mahidoku maoa-oa, magotooro hinotö de mahaki deʼ magaono maniraka.

²³O roti makaraja ihi huba-hubaka Ngohino, nal̄ë o roti moi marupa yogetongo; moi ihidiai de o zaitun maminya, moi maminya koiwa, deʼ moi o kukisi.

²⁴Nakelenga mata-mata o inomo gënanga o Harun deʼ aingoha-ngohaka manga giamuku deʼ nähuloko önanga ihidöakika Ngohika hokä o huhuba ihidöa-döakika.

²⁵Daha onangoka de nal̄ë o roti gënanga deʼ natuhuku o huhuba mangï mal̄okuoka o huhuba ituhu-tuhuku gënanga mal̄okuoka. O huhuba gënanga mabounu yasanangi Ahi hininga.

²⁶Nal̄ë o duba manauru gënanga ma alu mangunungu deʼ nohi-huba mangale o huhuba ihidöa-döakika Ngohino. De gënanga tongona ani hidoku.

²⁷O imam matabisan o agama madatoro magoronaka, ma alu mangunungu deʼ maduba manauru yapake-pake o upacara gënanga magoronaka kokiani ihihuba hokä o huhuba ihidöa-döakika Ngohino deʼ yatingaka mangale hagala o imam.

²⁸Nënanga Ngohi taputuhu yakunua yangali: Maöraha Ahi umati yaino ihihuba o dame mahuhuba, ma alu mangunungu deʼ magaono o aiwani o gigini gënanga ganga o imam-imam manga hidoku. Genanga Ahi umati manga huhuba mangale Ngohi.

²⁹O Harun ai puji mapakeanga kokiani wahipuhaka aingoha-ngohakika, hupaya önanga yakunu yapake maöraha yätabis.

³⁰O Harun aingohaka wodadadi o imam wïtururu ai ama deʼ wowohama Ahi Tau-tauika mangale wadiai o puji o Ngï itebi-tebi noka, kokiani wapake o pakeanga gënanga o wange tumidi madekana.

³¹Nal̄ë o duba manauru ma akeme ipöpake-pake o upacara magoronaka o Harun deʼ ai ngoha-ngohaka yätabis deʼ o hiode ma akeme gënanga yahakai o ngï iTebi-tebinoka.

³²O hiode ma akeme gënanga kokiani önanga yaol̄omo Ahi Tau — tau mangoranoka dema roti mahou naga o karajaka.

³³Onanga kokiani yaol̄omo o inomo ihihuba-hubaka o baradoha maapongo maupacara magoronaka maöraha yätabis. Duga-duga ma imam yakunu waol̄omo o inomo yatinga-tingakoka mangale Ngohi.

³⁴Nako yarehino o ngorumino o hiode ma akeme ekola o roti gënanga de mahouohi, done mahou gënanga kokiani yatuhuku yamata-mataka, deʼ yakunua yaol̄omo karana yatingakoka.

³⁵O Harun deʼ aingoha-ngohaka yätabis maupacara kokiani yadiai o wange tumidino, hokä Tohipoparetaka ngonaika.

³⁶O wange ihigetongo kokiani ihihuba o hapi manauru o dutu moi mangale o baradoha maapono. De o huhuba gënanga o huhuba mangï ihitebini. De aha o huhuba mangï gënanga kokiani naminya de o zaitun maminya hupaya ihitingaka mangale Ngohi.

³⁷Nadiai gënanga o wange ihigetongo o wange tumidi madekana. Done o huhuba mangï yamode-modekika idadi itebini; okia dika yakorona o huhuba mangï gënanga kokiani ihidoäka ma Jouika, deʼ o nagona dika yapeke, aha yamake o bodito karana Ahi debini makuata.”

³⁸”O wange ihigetongo kahi ado-adonika o huhuba mangï mal̄okuoka gënanga kokiani ihihuba o duba o dutu hinoto maumuru o taongo moi.

³⁹O dutu moi mangale o ngorumino mahuhuba, deʼ mahomoali mangale o bimaoa mahuhuba.

⁴⁰Ihidomoteke de o duba mangohaka mangale o ngorumino mahuhuba kokiani o kilo moi o tarigu duru maoa-oa ihiganu de o zaitun maminya madutu o litere moi. Mahomoali gënanga o litere moioli o angguru ma akere.

⁴¹O duba mangohaka mangale o bimaoa mahuhuba kokiani ihihuba madodagi kaimatero, ihidomoteke de o gopuno, o zaitun maminya deʼ o angguru ma akere. O huhuba i tuhu-tuhuku gënanga mabounu Ahi hininga yasanangi.

⁴²Nenangoka de ihikaika hagala o öraha, o huhuba ituhu-tuhuku gënanga kokiani ihihuba Ahihimangoka Ahi Tau-tau mangoranoka. Genangoka Ngohi aha mimakamake de Ahi umati deʼ tonitemo-temo ngonaika.

⁴³Genangoka Ngohi aha mimakamake de o Israel manyawa, deʼ Ahi himanga macahaya aha yadiai o ngï gënanga itebini.

⁴⁴Ngohi aha tadiai Ahi Tau deʼ o huhuba mangï gënanga itebini O Harun deʼ aingoha-ngohaka aha Tätingaka de mahomoa hupaya önanga hokä ma imam ihïleleani Ngohi.

⁴⁵Ngohi aha togogere o Israel manyawa manga hidogoronaka, deʼ todadi toönanga manga Jou Madutu.

⁴⁶Onanga aha ihiöriki Ngohi ma Jou toönanga manga Jou Madutu Täao önanga yohupu o Mesir mabereraka, hupaya Ngohi yakunu Togogere toönanga manga hidogoronaka. Ngohi ma Jou toönanga manga Jou Madutu.”