Read Tobelo O KELUARAN 3 Bible Online

O KELUARAN 3 - Tobelo bible

O KELUARAN 3

¹O öraha gënanga o Musa wögoana hagala ai duba deʼ hagala ai kabingi ai toroa o Yitro, ma imam o Midian matonakoka. Maöraha ünanga magogiriaka wabirï o aiwani o gigini gënanga o tonaka ikokakaha mahonongaika, ünanga woma hiädono o Sinai mal̄okuika, ol̄oku itebi-tebini.

² Genangokadau ma Jou Ai malaekat womahi matoko ai diri unangika o uku itoka-tokara magoronaka ihupu omomo igogol̄owa marubu-rubuino. O Musa wamake o momo igogol̄owa gënanga itoka-tokara, mäkoyö ukua.

³”Hara moioli,” wapikiri. ”O momo i gogol̄owa gënanga koyö ukua! Kayaoa deʼ tö lega tomahi tigi-tigika.”

⁴Ma Jou wïmake o Musa womahitigi o ngïka gënanga, done Unanga wopöaka o momo igogol̄owaino gënanga, ”Musa! Musa!” ”Ngohi nenangoka,” o Musa wohaluhu.

⁵Daha ma Jou Madutu wïtemo, ”Uha nomahi tigi-tigino. Ani sandal nahuputu, hababu ngona noma okoino o tonaka itebi-tebinoka.

⁶Ngohi nënanga ani ete deʼ ani tohora manga Jou Madutu, o Abraham, o Ishak deʼ o Yakub manga Jou Madutu.” Done o Musa watamunu ai biono, hababu ünanga wohawana wimake ma Jou Madutu.

⁷Daha ma Jou wïtemo, ”Ngohi tämakeoka Ahi umati manga huha deʼ manga hangihara o Mesir mabereraka, deʼ Toihenoka toönanga manga böaka yogahoko yähibebasi deʼ o nyawa yadodiai o huha deʼ o hangihara. Igou-goungu, Ngohi tohi öriki mata-mata toönanga manga hangihara.

⁸Hababu gënanga Ngohi touti mangale tahibebasi önanga o Mesir manyawa manga giama mahoatoka deʼ Ta ao önanga yohupu o bereraino gënanga yödumutu o berera moi ilua-luasi. Matonaka ikaya deʼ iburere, deʼ öraha nanga o Kanaan manyawa, o Het manyawa, o Amori, o Feris, o Hewi deʼ o Jebusi manyawa yögogere.

⁹O Israel manyawa manga gari Toihenoka, deʼ Tamakeö sarakia önanga o Mesir manyawa yätuku.

¹⁰Oraha nanga Ngohi tonihuloko la nïhimanga o Mesir manga koano hupaya ngona yakunu nätuda Ahi umati yohupu deʼ o berera nënanga.”

¹¹Mä o Musa wïtemo ma Jou Madutuika, ”Ngohi nënanga o naguna, hiädono takunu tï himanga ma koano deʼ tä ao o Israel manyawa yohupu o Mesir mabereraka?”

¹²Ma Jou Madutu wï baluhu, ”Ngohi aha tonï riwo ngona. Deʼ nako o Israeloka gënanga na aoka nahi hupu o Mesir mabereraka, ngini aha nihi horomati nihi puji Ngohino ol̄oku oka nënanga. Genanga ma nonako inyata Ngohi toni huloko ngona.”

¹³ O Musa wohaluhu, ”Mä nako ngohi mima kamake o Israel ma nyawa deʼ ihi temo ngohino: ’Nia ete deʼ nia tohora manga Jou Madutu wohi huloko ngohi nginika,’ önanga marai aha yoleha, ’O naguna Ai romanga?ʼ Daha okia kokiani ngohi tohaluhu onangika?”

¹⁴ Ma Jou Madutu wato, ”Ngohi ganga NGOHI NAGA. Nënanga doka kokiani ngona nahetongo o Israel ma nyawaika. Unanga iwi heto-hetongo NGOHI NAGA, wohi hulokoka nginika.

¹⁵Nohi abariö onangika Ngohi, ma Jou, manga ete deʼ manga tohora manga Jou Madutu, o Abraham, o Ishak, deʼ o Yakub manga Jou Madutu, woni huloko ngona onangika. Ngohi ma Jou, gënanga Ahi romanga kahi ado-adonika. Genanga doka ihi heto-hetongo mangale mata-mata o hoana mangangohaka deʼ mangadanongukua.

¹⁶Noiki deʼ nä toomu mata-mata o Israeloka manga tutuda. Na hi ngahu onangika, Ngohi, ma Jou, manga ete deʼ manga tohora manga Jou Madutu, o Abraham, o Ishak deʼ o Yakub manga Jou Madutu, wo mahi matokoka Ai diri ngonaika. Nahi ngahu onangika Ngohi to böaoka onangika deʼ Ta makeoka sarakia önanga o Mesir manyawa yä hidiai.

¹⁷Deʼ Ngohi ta putuhoka la Tä ao önanga tahihupu o Mesir mabereraka, o ngï önanga yahö hangihara, deʼ Tä ngotaka önanga o berera moika i kaya-kaya deʼ iboburere, manga berera o Kanaan manyawa, o Het manyawa, o Amori, o Feris, o Hewi deʼ o Yebusi.

¹⁸Ahi umati aha ihi gihene ani demo-demo. Ipaha ngona kama moi deʼ o Israeloka manga tutuda kokiani niöiki niwï himanga o Mesir manga koano deʼ nia hëtongo unangika: ’Ma Jou, o Ibrani manyawa manga Jou Madutu wo böaka wohi nyata ai diri ngomi ino. Oraha nanga nomï higumal̄a ngomi miöiki magurutika o wange hange madodagi o tonaka ikokakahaika mangale mihi huba o huhuba ma Jouika, tongomi mia Jou Madutu.’ ”

¹⁹Deʼ ipaha ma Jou Madutu wï temoli, ”Ngohi tohi öriki o Mesir manga koano aha winï higumal̄aua ngini nioiki, sowaliua nako ünanga hï pakisa.

²⁰Mä Ngohi aha tapake Ahi kuaha, deʼ Ta hukumu o Mesir maberera deʼ o bodito-bodito magiria aha Todotagao dokengika. Genanga deʼ iböto ünanga aha wini higumal̄a ngini ni mä jobo.

²¹ Ngohi aha tadiai o Mesir manyawa manga hininga imura nginika, hiädono maöraha ahi umati nimä jobo, ngininioikua deʼ nia giama kama homoa.

²²Moi-moi o Israel ma ngongoheka aha yogahoko ima koka datekika o Mesir manyawa, deʼ o Mesir ma ngongohekaika yogogere imaka tau moi, o pakeanga, inoli o poromu o haaka deʼ o gurasi. Ngini aha nia hipake gënanga nia ngoha-ngohakika. De madodagi hoko gënanga ngini aha niä ora o Mesir manyawa.”