Read Tobelo O KELUARAN 30 Bible Online

O KELUARAN 30 - Tobelo bible

O KELUARAN 30

¹Ma Jou wï temoli o Musaika, ”Nodiai o gahumu moi o huhuba mangï de o gota akasia o dupa yoduhu-duhuku mangï.

²O huhuba mangï gënanga madüku ipahagi iata; magurutu deʼ mangoata moi-moi o senti moruata de motoa, deʼ magurutil̄e o senti morihiwo. Malibuku iatö nodiai o totataduku idadi kamoi de mahuhuba mangï gënanga.

³Mal̄okuino, de magumurukino iatö deʼ matotataduku kokiani ihilape de o gurasi madutu deʼ mariwoto o gurasi ikilolitino.

⁴Niodiai o gogoli hinoto mariwoto matimiuku magumuruku hinotoika hupaya yatumungu magota madodowiti o huhuba mangï gënanga.

⁵Madodowiti gënanga kokiani idiai de o gota akasia deʼ ihilape de o gurasi.

⁶Nakelenga o huhuba mangï gënanga o ngöere maporetoka o Jaji ma Peti mahimangino, genangoka mangï aha Ngohi dede ngona homamake.

⁷O ngorumino ihigetongo maöraha o Harun waino mangale wohidiai o hilo, ünanga kokiani watuhuku o dupa mabounu i hemo-hemoro o huhuba mangï gënanga mal̄okuoka.

⁸O hali gënanga kokiani wadiaioli maöraha ünanga watuhuku o hilo o bimaoauku. O dupa ihihuba-huba gënanga kokiani idiai kahoko genangika o öraha magurutu.

⁹Uha nihihuba o huhuba mangï mal̄okuoka gënanga o dupa yöduhu-duhunu, o huhuba o aiwani ekola o huhuba ihidödöa-döakika; uhali nihituagi mal̄okuino o huhuba o angguru ma akere.

¹⁰O taongo moi mamoi o Harun kokiani wadiai o upacara watebini o huhuba mangï de madodagi niodohurero matotataduku iatö deʼ o aiwani o gigini ihihuba-huba ma awunu mangale o baradoha ma apongo. O hali gënanga kokiani idiai o taongo magetongo o öraha magurutu. O huhuba mangï gënanga kokiani ingodumu itebini deʼ nia tingaka mangale Ngohi.”

¹¹Ma Jou wïtemo o Musaika,

¹²”Maöraha niä sensus o Israel manyawa, o nau-nauru moi-moi kokiani yofangu Ngohino o duduhuhu matiwi mangale manga diri hupaya önanga yäkoronaua o bodito maöraha o sensus gënanga yadiai.

¹³ O nyawa moi-nyawa moi yäeto-etongoka o sensus gënanga magoronaka kokiani yofangu de o tiwi ma amoko ihitötantantu maragane imoteke Ahi Tau-tauoka hokä o bobatumu yodingakika mangale Ngohi.

¹⁴O nyawa moi-nyawa moi yäeto-etongoka o sensus gënanga magoronaka, enagënanga moi-moi o nau-nauru manga umuru o taongo monaokoka ekola iholoi, kokiani ihidöaka o bobatumu yödingakikaoka gënanga.

¹⁵O kaya manyawa yakunua kokiani yofangu iholoi deʼ o mihikini manyawa yakunua yofangu ikuranga maöraha önanga yofangu o duduhuhu matiwi mangale manga diri.

¹⁶Nial̄ë o tiwi gënanga o Israel manyawaika deʼ nihipake mangale o pupuji Ahi Tau-tau magoronaka. Mata-mata gënanga ganga o duduhuhu matiwi mangale toönanga manga diri, deʼ Ngohi salalu Tähininga mangale Tägoana önanga.”

¹⁷Ma Jou wïtemo o Musaika,

¹⁸ ”Nidiai o gahumumoi o bak o tabaga de mabukuil̄e mao tabaga. Nihigögere o bak gënanga o Tau-tau de o huhuba mangï mahidogorona, daha nioguheuku o akere.

¹⁹O akere gënanga mangale o Harun deʼ aingoha-ngohaka hupaya önanga yakunu yaihoro manga giama deʼ manga l̄ou,

²⁰ihira de yöngohama o Tau-tau ekola yahebanga o huhuba mangï mangale yao o huhuba i tuhu-tuhku. Onanga kokiani yadiai gënanga hupaya Tätomaua. O datoro gënanga kokiani önanga ihingounu de toönanga manga difauku kahiado-adonika.”

²² Ma Jou wïtemo o Musaika,

²³”Nal̄ë o rampa-rampa duru maoa-oa, o mur i waro-warouku okilo butanga, o kilo hange o kayumanis, o kilo hange o ugaka mabounu i hemo-hemoro, deʼ o kilo butanga o gota teja.

²⁴Mata-mata yatibanga imoteke odidibanga yapö pake-pake Ahi Tau-tauoka. Nihidogo o litere iata o zaitun maminya,

²⁵deʼ nidiai o upacara maminya, yoganu hokä o minya maboyu-bounu.

²⁶Niapake yaganu-ganuoka gënanga mangale ihiminya Ahi Tu-tau, o Jaji ma Peti,

²⁷o meja deʼ mata-mata mapakakaha, o hilo mal̄ou deʼ mata-mata mapakakaha, o huhuba mangï o dupa yoduhu-duhuku mangï,

²⁸o huhuba mangï mangale o huhuba i tuhu-tuhuku de hagala mapakakaha, deʼ o akere mabak de mabuku.

²⁹De madodagi hoko gënanga kokiani ngona nodingakika okia honanga gënanga mangale Ngohi, hupaya ingodumu idadi itebini. Okiadika yakorona o huhuba mangï gënanga kokiani nihilapahi ma Jouika, deʼ o nagona dika yapeke aha yamake o bodito karana toenanga manga debini makuata.

³⁰Näminya o Harun deʼ ai ngoha-ngohakö hupaya önanga yatabis yodadi ma imam mangale ihïleleani Ngohi.

³¹Nahetongo o Israel manyawaika madekana demagurutu o öraha o minya upacara gënanga itingakika mangale Ngohi.

³²O minya gënanga yakunua yahituagi o nyawa biahauku. Uha nidiai o minya hokä hoko gënanga deʼ nia pake maganu ka genangoli. O minya gënanga itebini, deʼ kokiani niapulono hokä o baranga madebi-debini.

³³O nyawa yododiai o minya hokä hoko gënanga, ekola koma imamua, de yapake yakunokaua yodadi o gegetongo Ahi umati.”

³⁴Ma Jou wïtemo o Musaika, ”Nal̄ë o rupa muruono naga o rampa-rampa imakoketero mangöe enagënanga o hilo o tigono, o jojongo makai, o rasamala matigono deʼ o dupa madutu.

³⁵Nia pake mata-mata gënanga mangale nihidiai o dupa i ganu-ganuino mabounu ihemo-hemoro. Nihidogo o gahi mawaja hupaya o dupa gënanga hirahi o dupa madutu deʼ yakunu ipake mangale Ngohi.

³⁶O hidoku moi o dupa gënanga kokiani yatutuku hiädono ialuhu. Nao gënanga Ahi Tau-tauika deʼ nohibarihi o Jaji ma Peti mahimangino. O dupa gënanga kokiani niapulono hokä o baranga madebi-debini yatingakika mangale Ngohi. Uha nidiai o dupa deʼ maganu deʼ masapuru hokä hoko genangoli mangale ngini mahirete.

³⁸O nagona yodiai iböbou-bounu hokä hoko gënanga, yakunokaua yodadi o gegetongo Ahi umati.”