Read Tobelo O KELUARAN 31 Bible Online

O KELUARAN 31 - Tobelo bible

O KELUARAN 31

¹Ma Jou wïtemo o Musaika,

²”Ngohi tï irikoka o Bezaleel o Uri aingohaka, o Hur ai danongo o Yehuda ai hoanino,

³deʼ Tihidöaka o ngongike unangika de Ahi kuaha. Unanga Tihi döaka o mangarati, o sawaro deʼ o kuata hagala irupa o manarama ma aluhu magoronaka:

⁴mangale idiai itä tatoroka iparalu o sawaro inoli yamo manarama de o gurasi o haaka deʼ o tabaga;

⁵mangale ihi gihoro o intan aha yahohonotoko; mangale ya gogarade o gota deʼ mangale hagala irupa o manarama ma aluhu mahomoa.

⁶O Oholiab, o Ahisamakh aingohaka o Dan ai hoanino Ngohi tï irikoka la wï riwo ünanga. Tahidöakoli o sawaro kabiahaua o tukang-tukang yososawaroika, hupaya önanga yodiai okia dika Tahi popareta.

⁷Ahi Tau-tau, o Jaji ma Peti deʼ madadamunu, mata-mata o Tau mapake-pake:

⁸enagënanga o meja de mapakakaha, o hilo mal̄ou o gurasi madutu de mapakakaha, o huhuba mangï o dupa yoduhu-duhku mangï.

⁹O huhuba mangï o huhuba ituhu-tuhuku deʼ hagala ma pakakaha, o akere mabak de mabuku,

¹⁰o Harun deʼ aingoha-ngohaka manga puji mapakeanga, kokiani yapake maöraha önanga yomanarama hokä ma imam,

¹¹o upacara maminya, deʼ o dupa mabounu ihemo-hemoro mangale o Ngï i Tebi-tebini. Mata-mata gënanga kokiani önanga yadiai imadaene imoteke o hidumutu Tonihi döa-döakoka ngonaika.”

¹²Ma Jou wihipareta o Musaika

¹³hupaya wahingahu o Israel manyawaika, ”Ihimulia o Sabat mawange, o wange Tohi totatapuoka hokä ohibatongo mawange. Mangale o wange gënanga kahiado-adonika idadi o hohininga nanga hidogoronaka ngini deʼ Ngohi, hupaya ngini nihiöriki Ngohi ma Jou, deʼ Ngohi tinihidadioka ngini Ahi nyawa mahirete.

¹⁴ Ohibatongo mawange gënanga kokiani ngini niahoromati hokä o wange itebi-tebini. Ngini Tinihidöaka o wange butanga mangale nimanarama, mä o wange matumidi gënanga o wange ma amoko Tohitingaka mangale Ngohi. O nagona yahoromatiua, mä yomanarama mawangeoka gënanga kokiani yähukumu yahohonenge.

¹⁶O Israel manyawa kokiani ihimulia o wange gënanga o ngohaka de o danongo de manga ngohakuku hokä o jaji manonako.

¹⁷ O wange gënanga ganga o hohininga moi itotatapu Ngohi de o Israel manyawa miahidogoronaka, karana Ngohi, ma Jou todiaioka o dihanga de o dunia o wange butanga magoronaka, deʼ o wange matumidoka Ngohi tomatogumu tomanarama deʼ tomahi batongo.”

¹⁸Ho de ipahaka wotemo-temo de o Musa o Sinai mal̄okuoka, ma Jou Madutu wohidöaka unangika obelaka hinoto ma helewo ma Jou Madutu wöduli-dulihoka hagala Ai tita.