Read Tobelo O KELUARAN 33 Bible Online

O KELUARAN 33 - Tobelo bible

O KELUARAN 33

¹ De ma Jou wïtemo o Musaika, ”Na mal̄a o ngï nënanga deʼnoiki kamamoi de o nyawa nä ao-aoka o Mesir de yaino gënanga yoiki o bereraika Tahi jäjajioka o Abraham, o Ishak deʼ o Yakubika de toönanga manga ngohaka de manga danongo.

²Ngohi aha tähuloko imatengo o malaekat la winï tuda ngini. Ngohi aha Täduhu o Kanaan manyawa, o Amori, o Het, o Feris, o Hewi deʼ o Yebus manyawa.

³Ngini niö dumutu o tonaka ikaya-kaya deʼ iboburereika. Mä Ngohi mahirete tininïkua dede ngini, hupaya uha Tinï binaha ngini o ngekomo mahoanika, hababu ngini ganga o nyawa manga haëke itotogowini.”

⁴De ipaha ma Jou wïhuloko o Musa wahetongo o Israel manyawaika, ”Ngini o nyawa niahaëke itotogowini. Nako Ngohi tininïki dede ngini ngarokä hokokiaua dika, marai ngini Tinï binaha kamamoiuku. Nia huputu hagala niapake-pake done Ngohi aha tohitantu okia aha Todiai nginika.” Yoihene deʼ iböto ma Jou Ai dodaaere gënanga, önanga duru manga hininga i huha hokä o nyawa yapakeoka o huha mapakeanga. Daha önanga yahuputu toönanga manga pake-pake. Ho o Sinai mal̄oku yamal̄a de iböto, o Israel manyawa yapakeokaua o pake-pake.

⁷Ihi geto-getongo, nako o Israel manyawa imä tau, o Musa wal̄ë o Tau deʼ wohigoko ikurutika de toönanga manga tau. O tau gënanga yahetongo ma Jou Ai Tau deʼ o nagona yomau yogahoko ma Jou Ai nasihati, yoiki genangikadau.

⁸Nako o Musa woiki o Tauika gënanga, o Israel manyawa imaokoino toönanga manga tau mangorana mahimangoka deʼ iwilega-lega o Musa hiädono ünanga wowohama.

⁹O Musa wowohama de iböto, o liate o lobi iuti deʼ ima togumu ma Jou Ai Tau mangoranoka. O lobino gënanga ma Jou de o Musa ima temo-temo.

¹⁰Maöraha o Israel manyawa yamake o liate o lobi ma Jou ai Tau mangoranoka, önanga mata-mata imaoko deʼ ima rukuku yohuba manga tau mangoranoka moi-moi.

¹¹Ma Jou de o Musa ima temo-temo imarihimangino, hokä o nyawa ima koketemo de manga dodiawo. Genanga de iböto o Musa womakilioro manga tau madoomuika. Mä o Yosua o Nun aingohaka, o goduru womatengo o Musa ai roriwo, kahirahi wogogere o Tau gënanga magoronaka.

¹²O wange moiuku o Musa wïtemo ma Jouika, ”Jou, Ngona nohihipareta ngohi tätuda o nyawa neonanga o berera Nahi jäjajika. Mä Ngona nahetongua o nagona aha Nähuloko la ihïriwo ngohi. Jou Ngona nato Ngona nohinako ngohi, deʼ nosanangi ngohino.

¹³Nako hoko gënanga, nömodeke nohihingahu okia Ani datoro Nadiai, Jou, hupaya ngohi takunu Tonï leleani deʼ kahirahi tasanangi Ani hininga. Nomä hiningaö o nyawa neonanga Nairikoka yodadi Tongona madutu.”

¹⁴Ma Jou wotemo, ”Ngini aha Tinigoana hupaya yakunu nial̄ë o tonaka Tihijä jajioka.”

¹⁵O Musa wohaluhu, ”Nako Jou nonïkua dede ngomi, uha nomi huloko ngomi miamal̄a o ngï nënanga.

¹⁶Sarakia aha o nyawa ihi öriki Ani hininga isanangi ngohiino deʼ o nyawa neonangika nako Ngona nomï riwoua ngomi? Jou Ngona naga tongomi mia hidogoronaka aha ngomi mimakohowono deʼ o hoana de o berera mahomoa o duniaka.”

¹⁷Ma Jou wïtemo o Musaika, ”Ani gogahoko aha Tohimoteke, hababu Ngohi toninako ngona deʼ Ngohi ahi hininga isanangi ngonaika.”

¹⁸Daha o Musa wogahoko, ”Jou nohihimatoko ngohino Ani himanga ma cahaya.”

¹⁹ Ma Jou wohaluhu, ”Ngohi aha takaino ani himangino de hagala Ahi mulia, de inoli Tahetongo Ahi romanga i tebi-tebini. Ngohi ma Jou, deʼ Ngohi tohidumutu o hininga mamura deʼ o hayanga de o dora hagala o nyawa Tä iri-irikoka.

²⁰Ahi biono aha tohimatokua ngonaika, hababu koidadiua o nyawa ihi make Ngohi, deʼ kahirahi yowango.

²¹Ahi honongaika nënanga naga o doporono helewo; ngona yakunu nomaokoino genangokadau.

²²Maöraha Ahi himanga macahaya yakaino, ngona Tonihi ngohama moi o helewo mabilatu magoronaika deʼ Tohitamunu deʼ Ahi giama hiädono Ngohi tatilakuroka.

²³De aha Tatauru Ahi giama hupaya ngona yakunu nohimake Ngohi Ahi poretino, mä Ahi biono aha konamakeua.”