Read Tobelo O KELUARAN 34 Bible Online

O KELUARAN 34 - Tobelo bible

O KELUARAN 34

¹De ipaha ma Jou wïtemo o Musaika, ”Nahonotoko o helewo o belaka hinoto hokä i hira-hira. O helewoika gënanga Ngohi aha tödulihi mabetongo imatero de naga mahelewooka nabela-belaka gënanga.

²Yarehe o ngorumino noma hidiaioka la nadöa o Sinai mal̄oku deʼ nohïhimanga Ngohi ol̄oku gënanga matubuoka.

³Kao nyawa moiö mayakunua yonïki dede ngona ekola naga kiaka dika yaika ol̄oku gënanga hagala o hapi de hagala o duba uha nia mal̄aika i ol̄omo ol̄oku genanga matimiuku.”

⁴Daha o Musa wahonotokoli o helewo o belaka hinoto, deʼ yarehino mawange duru o ngoru-ngorumino ünanga wao wohidöa o Sinai mal̄okuil̄e hokä wihipopareta ma Jou unangika.

⁵De ma Jou wouti moi o lobi magoronaka; nanga womaokoino deo Musa o ngioka gënanga, deʼ wahetongo Ai romanga i tebi-tebini, enagënanga ma Jou.

⁶ De ipaha ma Jou wakaino o Musa ai himangino deʼ wotemo, ”Ngohi ma Jou, ganga ma Jou Madutu ihiomanga deo hininga mamura deʼ o hayanga deo dora. Ahi dora duru ikiria ilamoko, Ngohi tosetia deʼ itaitua Tongamo.

⁷Ngohi kahirahi Tädora manga ngohaka de manga danongo de manga ribu-ribuhu deʼ Tahiapongo manga howono deʼ manga baradoha; ma o nyawa yahowo-howono hakali-kali Tahibebasua de manga hukumanga, deʼ Tahukumoli manga ngoha-ngohaka deʼ manga dano-danongo hiädono manga dotumu de manga kaluwewe karana toönanga manga dimono manga baradoha.”

⁸O oraha genangö o Musa watilabukuku wohuba.

⁹Wotemo, ”Jou, nako ngona i gou-goungu Ani hininga i sanangi ngohino, ngohi togahoko nö modeke Jou nonïki dede ngomi. O nyawa geönanga i goungu manga häeke itogowini, mä nomihiapongo tongomi mia dorou mia baradoha deʼ nomï tarima ngomi hokä Ani umati mahirete.”

¹⁰Ma Jou wïtemo o Musaika, ”O öraha nanga Ngohi todiai o jaji deo Israel manyawa. Toönanga manga lako mahimangoka Ngohi aha todiai ihö hera-heranga o hoana deo berera okiadika o duniaka manga hidogoronaka komaiwahi yadiai, aha yamake ihöhera-heranga Tadodiai, hababu Ngohi, ma Jou aha todiai okianaga hömodo-modongo mangale ngini.

¹¹Nihingounu hagala o tita Tohidöa-döaka nginika o wange nënanga. Ngohi aha Täduhu o Amori manyawa, o Kanaan, o Het, o Feris, o Hewi deʼ o Yebus manyawa maöraha ngini nitagi niahimangika.

¹²Uha nidiai o jaji deo berera niodulu-duluika manyawa, hababu o hali gënanga idadi o modoi idiai o honenge nginiika.

¹³ Ho, uha nidiai hoko gënanga, mä nia ruba toönanga manga huhuba-huhuba mangi, niawedere toönanga manga tugu ikokaramati deʼ niatol̄anga toönanga manga gomanga o Asyera maliate.

¹⁴Uha niahuba o gikiri mahomoa, hababu Ngohi ma Jou, ganga ma Jou Madutu ngaro de okianagali ma Toluku nihihitero.

¹⁵Uha nima kajaji deo berera gënanga manyawa, hababu maöraha önanga yahuba deʼ ihihuba manga huhuba toönanga manga gomangika, önanga aha inïhigaro ngini, deʼ ngini aha nianïki.

¹⁶Nako niangoha-ngohaka yokawingi deo ngongoheka maporetino, o ngongoheka gënanga aha yäbaja önanga la ihimal̄a Ngohi deʼ yahuba toönanga manga gomanga.

¹⁷ Uha nidiai deʼ nia huba o gikiri o haaka ekola o gurasi.

¹⁸ Nihimulia o Roti ma Ragi Koiwa-iwa. Hokä Tohi paretaka nginika, ngini kokiani niaol̄omo o roti maragi koiwa-iwa o wange tumidi madekana, o Abib mamede magoronaka, karana o mede gënanga magoronaka ngini nia mal̄a o Mesir.

¹⁹ Moi-moi o ngohaka o nauru o riaka, deʼ o aiwani manauru madodihiraka i ngohaka, ganga Tongohi madutu,

²⁰ ma ngini kokiani niatuhuhu o keledai mangohaka madodihiraka ihingohaka de nihihuba o duba mangohaka o dutu moi hokä madururu. Nako ngini nioluku niatuhuhu, o keledai matomara gënanga kokiani niatobiki. Moi-moi niangohaka o nauru mariaka kokiani niätuhuhu. Kao nyawa moiö ma yakunua yaino Ngohino nako yoaoua o huhuba.

²¹ Naga o wange butanga mangale nimanarama; uha nimanarama o wange matumidoka, ngaroko gënanga o pajeko ekola o gugutuku maöraha magoronaka.

²² Nihimulia o Gugutuku ma Rameanga maöraha ngini nimulaenge niautuku niagandum mahasili madodihiraka. Nihimuliaö o Tau-tau o Hoka-hoka ma Rameanga o taongo mabahaka, maöraha ngini niutuku o hohoko i rupa-rupa.

²³O taongo moi ihigali mahange mata-mata o nau-nauru kokiani yoboa ihihuba Ngohi, ma Jou o Israeloka manga Jou Madutu.

²⁴Hagala o hoana deo berera manyawa Täduhu de iböto niahimangoka, deʼ Tawoatoka niadaera, kao nyawa moiö ma aha yobaraniua yaora nia berera maöraha ngini nioiki mangale nihimulia o Roti ma Ragi Koiwa-iwa ma Rameanga, o Gugutuku ma Rameanga deʼ o Tau-tau o Hoka-hoka ma Rameanga.

²⁵ Maöraha ngini nihihuba o aiwani o gigini yatoa-toakoka, uha nihi huba okianaga yadodiai dema ragioka. O aiwani i gigini yalui-luituku mangale o huhuba o Paska marameanga kokiani o hutu gënanga dika de koiwaka; yakunua naga mahou hiädono yarehino mawange.

²⁶ O taongo ihigetongo kokiani ngini niao ma Jou nia Jou Madutu Ai Tauika nia tonaka mahasili madodihiraka. O duba mangohaka ma akeme ekola o kabingi mangohaka yakunua ihidohakai de ma ayo mahuhu mateongo.”

²⁷Ma Jou wïtemo o Musaika, ”Natulihi o demo-demo gënanga, karana matiti o demo-demo gënanga Ngohi tadiai o jaji dede ngona deo Israel manyawa.”

²⁸O hutu moruata deo wange moruata o Musa wogogere genangoka dema Jou, dema dekanino gënanga ünanga wol̄omua deʼ wokerua. O jaji mabetongo gënanga, enagënanga ma Jou Madutu Ai Tita Ngimoi, watulihi o helewo mabelakika.

²⁹ Maöraha o Musa o Sinai mal̄okuoka de wouti wao o Tita Ngimoi gënanga ai biono i cahaya hababu ünanga imä ade-adeoka dema Jou, ma o Musa mahirete wohiorikua ai biono itararono.

³⁰O Harun deʼ i ngodumu o kawaha yamake o Musa ai biono i cahaya, deʼ önanga yohawana ima hitigi unangika.

³¹Ma o Musa wä ahoko önanga, hoʼ o Harun deʼ mata-mata toönanga manga tutuda ima hitigi unangika, deʼ o Musa wo temo-temo onangika.

³²Genanga dei böto i ngodumu o Israeloka makawaha ima toomu iwi higilolitino, deʼ onangika mata-mata o Musa wohiädono mata-mata o tita ma Jou wohidoa-doakoka unangika o Sinai mal̄okuoka.

³³Wo temo-temo dede önanga de iböto, o Musa watamunu ai biono deo ngöere.

³⁴Wohigeto-getongo o Musa wowohama ma Jou Ai Tauika mangale imä ade-ade dema Jou, o ngöere gënanga wahuputu hiädono ünanga wohupu. Genanga dei böto ünanga wohiadono o Israel ma nyawaika mata-mata ma Jou Ai behehongo,

³⁵deʼ önanga yamake o Musa ai biono i cahaya. Daha wa tamunoli ai biono hiädono o öraha moioli nako ünanga imä ade-adeoli dema Jou.