Read Tobelo O KELUARAN 35 Bible Online

O KELUARAN 35 - Tobelo bible

O KELUARAN 35

¹O Musa wä toomu yongodumu o Israel manyawa daha wätemo onangika, ”Nënanga ma Jou Ai tita mangale ngini:

² Naga o wange butanga mangale nimanarama, mä o wange matumidi gënanga o wange mangale nimahi batongo, o wange ma amoko i tingakoka ma Jouika. O nagona yomanarama o Sabat mawangeoka kokiani yahukumu yohonenge.

³O wange gënanga ngini yakunua o uku nitofo nia tauoka.”

⁴O Musa wätemo ingodumu o Israel ma nyawaika, ”Hoko nënanga ma Jou Aipareta:

⁵Niao o huhuba ma Jouika. Onagona yögaraki manga hininga, kokiani ihi huba o gurasi, o haaka, deʼ o tabaga;

⁶o ngöere o lenan ma aluhu, o ngöere o wol mabihi-bihi, ma wuwungu deʼ madoka-dokara; o ngöere o kabingi magogo;

⁷o duba manauru makai yadodokarika; o aiwani makai ma aluhu, o gota o akasia,

⁸o hilo maminya; o upacara maminya marampa-rampa deʼ mangale o dupa mabounu mahemo-hemoro;

⁹o paramata delima deʼ o paramata mahomoa mangale ihi poromu ma Imam wo Amo-amoko ai kutangika deʼ ai alu madadamunika.”

¹⁰”Mata-mata yogö gao-gao yososawaro nia hidogoronaka kokiani yaino mangale yadiai hagala ma Jou wohi popareta, enagënanga:

¹¹O Tau-tau, makatu deʼ madadamunu, malalakete deʼ ma röehe, mahita magota, mangorana maliate deʼ mahohol̄e;

¹²O Jaji ma Peti madodowiti magota, madadamunu, deʼ mangöere madadamunu;

¹³mameja de madodowiti magota, mata-mata mapakakaha deʼ o roti yadodiai ukuoka

¹⁴o hilo mal̄ou mangale yatotararono de mapakakaha, o hilo de maminya;

¹⁵o huhuba mangï o dupa yö duhu-duhuku de madodowiti magota o upacara maminya, o dupa mabounu ihemo-hemoro; o tau mangorana madadatoko,

¹⁶o huhuba yö duhu-duhuku mahuhuba mangï de o tarali o tabaga, madodowiti magota de mata-mata mapakakaha; ima iho-ihoro mamabak de mabukuil̄e,

¹⁷o löa mahidete, o liate de mahohol̄e, o löa mangorana madadatoko,

¹⁸o bebeloho de magumi-gumini mangale o Tau-tau deʼ mangale malöa;

¹⁹o imam-imam manga puji mapakeanga maöraha önanga yomanarama o Ngi i Tebi-tebinoka deʼ o pakeanga yatinga-tingakoka mangale ma imam Harun deʼ aingoha-ngohaka.”

²⁰De mata-mata o Israel manyawa ima totoomuino gënanga ima kilianga,

²¹deʼ o nagona dika manga hininga i garaki, yao o huhuba ma Jouika mangale ihi totomo ma Jou Ai Tau. Onangö yoao mata-mata ipö paralu mangale o pupuji deʼ o baranga ihi dodiai ma imam ai pakeanga.

²²O nagona dika yomau, kayaoa o nauru kayaoa o ngoheka, yoboa yoao o paneti imahi poporomu, o ngati-ngati, o ali-ali, o gule, deʼ hagala irupa o poromu o gurasi mangale ihihuba ma Jouika.

²³O nyawa moi-nyawa moi de manga ngöere o lenan ma aluhu, o ngöere wol mabihi-bihi, mawuwungu ekola madoka-dokara, o ngöere o kabingi magogo, o duba manauru makai yadodokarika, ekola o aiwani makai ma aluhu, ihihuba o baranga gënanga.

²⁴O nyawa moi-nyawa moi yakunu yobatumu de o haaka ekola o tabaga, yoao mangale ma Jou. Hoko genangoli yodiai hagala o nyawa de manga gota o akasia mangale o manarama gënanga.

²⁵O ngongoheka yososawaro yorugihi yoao o lenan ma aluhu malawe, mawuwungu deʼ madoka-dokara önanga yadodiaioka.

²⁶Onangö ihirugihi o kabingi magogo malawe.

²⁷O tutuda-tutuda yoao permata delima deʼ o permata-permata mahomoa mangale ihiporomu o kutangika deʼ o alu madadamunu.

²⁸Onangö yoao o rampa-rampa deʼ o hilo maminya, o upacara maminya deʼ o dupa mabounu ihemo-hemoro.

²⁹O Israel manyawa mata-mata de manga hininga mahuka yao toönanga manga huhuba ma Jouika mangale o manarama ma Jou wihi poparetaka o Musaika.

³⁰De ipaha o Musa wätemo o Israel manyawaika, ”Ma Jou wïirikoka o Bezaleel o Uri aingohaka, o Hur ai danongo, o Yehuda ai hoanino

³¹deʼ ünanga wihidöaka de Ai kuaha. Ma Jou Madutu wihidöaka o mangarati, o sawaro deʼ o dagakunu hagala irupa o manarama ma aluhu magoronaka,

³²mangale wodiai wohidailako o datoro ipöparalu o sawaro, inoli wadodiai de o gurasi, o haaka de o tabaga;

³³mangale ihigihoro o paramata mahelewo aha ihipoporomu; mangale o gota wogarade deʼ mangale hagala irupa o manarama ma aluhu mahomoa.

³⁴O Bezaleel deʼ o Aholiabika, o Ahisamakh aingohaka o Dan ai hoanino, ma Jou wahidöaka o sawaro mangale yadotoko toönanga manga sawaro o nyawa mahomoaika.

³⁵Onanga yahidöaka o sawaro hagala irupa o manarama yadodiai yososawaro yohonotoko, yodato-datoro deʼ yososawaro youriti o lenan ma aluhu o wol mabihi-bihi, mawuwungu deʼ madoka-dokara, deʼ o ngöere mahomoahi. Onanga ganga yodato-datoro yososawaro deʼ yakunu yadiai hagala irupa o manarama.