Read Tobelo O KELUARAN 36 Bible Online

O KELUARAN 36 - Tobelo bible

O KELUARAN 36

¹O Bezaleel, o Aholiab, deʼ mata-mata yogö gao-gao yamö make-make o dagakunu deʼ o sawaro ma Jouino, yanako madodagi yadiai hagala ipoparalu mangale yadiai ma Jou Ai Tau. Onanga kokiani yadiai hagala moi-moi hokä ma Jou wohipoparetaka.”

²O Musa wäahoko o Bezaleel, o Aholiab deʼ o nyawa mata-mata yamömake-make o sawaro ma Jouino deʼ yomodeke yobatumu, wähuloko önanga yomulaenge.

³O Musa wahidöaka önanga hagala ihiböbatu-batumu o Israel manyawa mangale o manarama ihigöko ma Jou Ai Tau. Mä o Israel manyawa kahoko genangika dika yoao manga huhuba o Musaika o ngorumino ihigetongo.

⁴Yogö gao-gao magogiriaka yadiai o manarama gënanga

⁵ihingahu o Musaika, ”O bara-baranga ihiböbatu-batumu o nyawa geonanga iholoioka de ipöparalu mangale o manarama ma Jou wähulo-hulokoka.”

⁶O Musa wohingahu o tau-tauika ingodumu o bobatumu mangale ma Jou Ai Tau yadonoka; hoʼ hagala o nyawa okiakaua yoao.

⁷O bara-baranga önanga ihiböbatu-batumoka iholoiokali mangale o manarama gënanga iböto.

⁸De ipaha duru yososawaro yogögao-gao manga hidogoronaka gënanga yodiai ma Jou Ai Tau. O Tau gënanga önanga yodiai deʼ o lenan ma aluhu odobiki ngimoi yauriti de o wol mabihi-bihi, mawuwungu deʼ madoka-dokara, daha ihisuji de o malaikat madulada.

⁹O dobiki moi-dobiki moi maduduga imakoketero; magurutu metere ngimoi de hinoto deʼ mangoata o metere hinoto.

¹⁰O ngöere o dobiki motoa ihikodohanga idadi o hidete moi deʼ o dobiki motoa mahomoa hoko genangoli yadiai.

¹¹O hidete hinoto gënanga madatekino yodiai madudumungu de o ngöere mabihi-bihi,

¹²o lalakete moritoa o hidete yogetongo, hiädono marupa o habi moi.

¹³Daha yodiai malalakete o gurasi moritoa mangale ihirimoi o hidete hinoto gënanga.

¹⁴De iböto önanga yodiai o Tau-tau gënanga makatu de o ngöere o kabingi magogo o dobiki ngimoi de moi.

¹⁵O dobiki moi-dobiki moi maduduga imakoketero, magurutu o metere ngimoi de hange deʼ mangoata o metere hinoto.

¹⁶O dobiki motoa ihikodohanga idadi o hidete moi, deʼ o dobiki butanga mahomoa, hoko genangoli yadiai.

¹⁷Madudumungu moritoa ihipake o hidete madodihiraka madatekino deʼ madudumungu moritoa o hidete mahinotoka madatekino.

¹⁸Daha yodiai malalakete moritoa o tabaga mangale ihirimoi o hidete hinotö gënanga idadi o Tau-tau makatu.

¹⁹Genanga de ipaha yodiai o dadamunu hinoto mangale ma Tau-tau ihiregu, moi de o duba manauru makai yadodokarika, deʼ mahomoa de o aiwani makai ma aluhu.

²⁰De ipaha önanga yodiai o Tau-tau majaro i riko-rikotil̄e de o gota akasia.

²¹O jaro yogetongo magurutil̄e o metere iata de mangoata o senti mori butanga de butanga.

²²Ma jaro yogetongo yodiai o bebeloho hinoto o habi moi, hiädono o jaro-o jaro gënanga yakunu ihikodohanga moi de mahomoaika.

²³Mangale o Tau-tau o koreharail̄e yohima-himanga yodiai majaro monaoko.

²⁴De mahohol̄e o haaka moruata, hinoto majaro yogetongo matimioka mangale mabebeloho hinotö.

²⁵Mangale o Tau-tau o koremieuku yohima-himanga yodiai majaro monaoko

²⁶de mahohol̄e o haaka moruata, hinoto majaro yogetongo matimioka.

²⁷Mangale o Tau-tau maporete o wange madumuniha ihima-himanga, yodiai majaro butanga,

²⁸deʼ majaro hinoto mangale malibuku.

²⁹Majaro malibuku gënanga ihikodohanga mal̄ouika i gila-gila hiädono mal̄okuino. Majaro hinotö imadiai malibuku yadiai hoko genangoli.

³⁰Hoʼ mata-mata naga majaro tufange de mahohol̄e o haaka ngimoi de butanga, hinoto majaro yogetongo matimioka.

³¹Daha önanga yodiai mahita ngimoi de motoa de o gota akasia, motoa mangale majaro ma Tau-tau magumuruku moi.

³²Motoa mangale magumuruku mahomoa, deʼ motoali mangale o Tau-tau maporete o wange madumuniha yohima-himanga.

³³Mahita magota ikokorona, ihitabi magurutil̄e majaro yatogoronaino, o Tau-tau gënanga mabahaka de mabahaika.

³⁴Ma Tau-tau majaro deʼ mahita magota gënanga ihilape de o gurasi, daha yödiaika o gogoli-gogoli gurasi mangale yatumungu o gota-gota gënanga.

³⁵Onangö yodiai madadatoko o ngöere o lenan ma aluhu ihirugihi de o wol mabihi-bihi, mawuwungu deʼ madoka-dokara, daha yasuji de o malaekat madulada.

³⁶Mangale yanune o ngöere gënanga yodiai o liate iata de o gota akasia malape o gurasi de malalakete o gurasi de ihipake mahohol̄e o haaka iata mal̄okuoka.

³⁷Daha yodiai o guba mangale o Tau-tau mangorana de o lenan ma aluhu ihirugihi de o wol mabihi-bihi mawuwungu deʼ madoka-dokara deʼ ihiporomu de o suji-suji.

³⁸Mangale mangorana gënanga mangöere yodiai o liate motoa ihikodohanga de o lalakete-lalakete. Ma bare-barene deʼ madohanga-madohanga o liate motoa gënanga ihilape de o gurasi hode mahohol̄e motoa o yadiai de o tabaga.