Read Tobelo O KELUARAN 37 Bible Online

O KELUARAN 37 - Tobelo bible

O KELUARAN 37

¹O Bezaleel wodiai o Jaji ma Peti de o gota akasia, magurutu o senti o ratuhu moi de ngimoi, mangoata deʼ magurutil̄e moi-moi o senti mori butanga de butanga.

²Madol̄a deʼ maporete ihilape de o gurasi madutu, daha wodiai o riwoto o gurasi magilolitino.

³De ipaha wodiai o gogoli gurasi iata mangale madodowiti ma gota deʼ ihipake o peti gënanga mal̄ou iatika, o gogoli hinoto magumuruku yogetongo.

⁴Wodiaiö o dodowiti o gota akasia, deʼ wohilape de o gurasi,

⁵daha madodowiti magota gënanga wohingohama magogolioko o peti gënanga magumuruku yogetongo.

⁶De ipaha wodiai o dadamunu o gahumu moi de o gurasi madutu, magurutu o senti o ratuhu moi de ngimoi deʼ mangoata o senti mori butanga de butanga.

⁷Wodiaiö o malaekat hinoto de o gurasi yatutukoka,

⁸madadamunu mabarene yogetongo moi. O malaekat hinoto gënanga idadi kamoi de madadamunu,

⁹deʼ idiai imari himangino, de magahuhu irefeika yatamunuku mapeti gënanga madadamunu.

¹⁰O Bezaleel wodiai o meja de o gota akasia, magurutu o senti moritufange de tufange, mangoata o senti moruata de iata deʼ ma gurutil̄e o senti mori butanga de butanga.

¹¹O meja gënanga wohilape de o gurasi madutu deʼ magilolitino wodiai mariwoto o gurasi.

¹²Daha ünanga wodiai mameja madateke mangoata o senti tumidi de mahononga. Madateke gënanga de mariwoto o gurasi yakilolitino.

¹³Wodiai o gogoli iata mangale madodowiti magota deʼ ihipake malibuku iata mameja mal̄ouika.

¹⁴O gogoli mangale madodowiti magota madudumungu ihipake ihitigi-tigika mameja madatekika.

¹⁵Madodowiti yadiai de o gota akasia deʼ ihilape de o gurasi.

¹⁶Unangö wodiai o dodai, o udo-udomo, o kendi deʼ o mangko mangale o angguru ma akere ihihuba-huba. Mata-mata o meja mapakakaha gënanga yadiai de o gurasi madutu.

¹⁷O Bezaleel wodiai o hilo matotodenge de o gurasi madutu. Mahohol̄e deʼ majojö yadiai de o gurasi itutukoka. O bunga-bunga ihipoporomu, inoli maboro deʼ maboro mahahawo idadi kamoi de majojö.

¹⁸Majojöika gënanga wodiai majaga butanga, majaga hange magumuruku yogetongo.

¹⁹Majaga yogetongo wodiai o poromu marupa o niara mabunga hange de maboro deʼ maboro mahahawo.

²⁰Ma jojöika wodiai o poromu marupa o niara mabunga iata de maboro deʼ maboro mahahawo.

²¹Majaga mahabi yogetongo gënanga matimiuku wodiai o bunga maboro moi.

²²I ngodumu o hilo matotodenge gënanga deʼ mabunga maboro de majaga-jaga wadiai o gurasi madutu itutukoka o dogiki moi.

²³O hilo mal̄ouika gënanga wodiai o hilo tumidi de mapakakaha mangale ihitebi-tebini o hilo mahubu deʼ madulanga o gurasi madutu.

²⁴Mangale yadiai o hilo matotodenge gënanga deʼ mapakakaha yapake o gurasi madutu o kilo moruange de motoa.

²⁵O Bezaleel wodiai o huhuba mangï mangale o dupa yoduhu-duhuku mangï de o gota akasia. O huhuba mangï gënanga madüku ipahagi; magurutu de mangoata moi-moi o senti moruata de motoa deʼ magurutil̄e o senti morihiwo. Malibuku iatö mal̄okuino wodiai o tataduku idadi kamoi de mahuhuba mangï gënanga

²⁶Magumurukino iatö mal̄okuino, deʼ matataduku ihilape de o gurasi madutu deʼ magilolitino wodiai mariwoto o gurasi.

²⁷Wodiaiö o gogoli hinoto mariwoto gurasi matimiuku magumuruku arihohononga mangale yatumungu madodowiti magota o huhuba mangï gënanga.

²⁸O dodowiti gënanga yadiai de o gota akasia deʼ ihilape deʼ o gurasi.

²⁹ O Bezaleel wodiaiö o upacara maminya deʼ o dupa madutu mabounu mahemo-hemoro, ihiganu hokä o minya mabou-bounu.