Read Tobelo O KELUARAN 38 Bible Online

O KELUARAN 38 - Tobelo bible

O KELUARAN 38

¹O Bezaleel wal̄ë o gota akasia, daha wodiai o huhuba mangï mangale o huhuba ituhu-tuhuku. O huhuba mangï gënanga madüku ipahagi, magurutu deʼ mangoata moi-moi o metere hinoto de o senti monaoko, deʼ magurutil̄e o metere moi de o senti moruange.

²Malibuku yogetongo mal̄okuoka wodiai o tataduku idadi kamoi de mahuhuba mangï gënanga. Yamode-modekika wohilape de o tabaga.

³Wodiaiö o bohoko, o huhugara, o mangko, o garpu deʼ o uku mangï. Mata-mata o pakakaha gënanga idiai de o tabaga.

⁴Wodiai o asaki o kawa tabaga ihipali daengino mahuba mangïika-magurutil̄e yatogoronail̄e.

⁵Daha wodiai o gogoli iata mangale mamomoku magota malibuku iata matimino.

⁶Mamomoku magota gënanga wodiai de o gota akasia ihilape de o tabaga.

⁷Daha mamomoku magota hinotö gënanga wohingohama gogolioko magumurukoko hinotö o huhuba mangï gënanga. O huhuba mangï gënanga yadiai de o aoto deʼ magoronauku i pidahoka.

⁸ O Bezaleel wodiai o tabaga de mabukuil̄e o tabaga. Otabaga gënanga o ngongoheka yolöleleani ma Jou Ai Tau mangoranoka manga kahinä.

⁹O Bezaleel wöpagari ma Jou Ai Tau-tau malöa de o hidete o ngöere o lenan ma aluhu. O koreharail̄e idadadu magurutu o metere moruata de iata,

¹⁰ihitumungu o liate tabaga monaoko, moi-moi mahohol̄e o tabaga, de o lalakete deʼ madudumungu o häaka.

¹¹O koremieuku idadadu yadiai hoko genangoli.

¹²O wange madumuniha idadadu ihipake o hidete magurutu o metere monaoko de hinoto, de o liate ngimoi deʼ mahohol̄e ngimoi; malalakete deʼ madodohanga yadiai de o haaka.

¹³O wange mahiwaroko idadadu, naga de mangoranoka mahidete mangoata o metere monaoko de hinotoli.

¹⁴Mahigilika de manirakika o ngorana gënanga ihipake o hidete, moi-moi magurutu o metere butanga de o senti moributanga de oliate hange deʼ mahohol̄e hange.

¹⁶O hidete mata-mata o löa gënanga magilolitino idiai de o ngöere o lenan ma aluhu.

¹⁷Ma liate-liate mahohol̄e yadiai de o tabaga, mä malalakete, madohanga deʼ maliate mabarene yadiai de o haaka. O liate mata-mata malooa gënanga magilolitino ihikodohanga moi de moi de o lalakete o häaka.

¹⁸O löa mangorana ma amoko gënanga madadatoko idiai de o lenan ma aluhu ihirugihi de o wol mabihi-bihi, mawuwungu deʼ madoka-dokara ikali ihiporomu de o suji-suji. Magurutu o metere hiwo deʼ magurutil̄e o metere hinoto, imatero de o löaka mahidete.

¹⁹O ngorana mangöere gënanga ihitumungu o liate iata de o hohol̄e o tabaga iata. Mata-mata malalakete, mabarene madadamunu deʼ madudumungu yadiai de o haaka,

²⁰mä mata-mata mabebeloho mangale o Tau-tau deʼ mangale mapagari yadiai de o tabaga.

²¹Nenanga yatuli-tulihuku o gurasi, o haaka, o tabaga ihipake-pake ma Jou Ai Tau-tau magoronaka, o helewo hinotö de ma Jou Madutu Ai Tita Ngimoi gënanga mangï yagogono. Yatuli-tulihuku gënanga yadiai imoteke o Musa aipareta deʼ yatatoro gënanga o Lewi manyawa yomomanarama o Itamar, ma Imam Harun aingohaka ai tutuda matimiuku.

²²O Bezaleel o Uri aingohaka, o Hur ai danongo o Yehuda ai hoanino, wadiai hagala wihipopareta ma Jou.

²³Wï riwo-riwo, o Aholiab o Ahisamakh aingohaka o Dan ai hoanino, ganga womatengo wogogarade, wödato-datoro deʼ worörugi-rugihi o ngöere o lenan ma aluhu, inoli o wol mabihi-bihi mawuwungu deʼ madoka-dokara.

²⁴O gurasi ihihöhuba-huba ma Jouika mangale o Tau-tau i Tebi-tebini ingodumu magegetongo o kilo ribuhu moi, yatibanga i moteke o duduga ma Jou Ai Tau-tauoka yapake-pake.

²⁵ O haaka yamömake-makeino o Israel manyawaka yosensus magegetongo okilo o ribuhu hange de o ratuhu iata de moruange yatibanga imoteke o duduga ma Jou Ai Tau-tauoka yapake-pake.

²⁶ O gegetongo gënanga imatero de okia yoföfangu-fangu o nyawa mata-mata yahituli-tulihi o sensus gënanga magoronaka. O nyawa moi-nyawa moi yofangu maija ihitötantantu, yatibanga imoteke o duduga yapake-pake. O sensus magoronaka gënanga ihi tulihi o nau-nauru manga umuru o taongo monaoko de i hikail̄e yaribuhu ratuhu butanga de hange de yaratuhu motoa de yamoritoa.

²⁷O haaka gënanga wapake o kilo o ribuhu hange de o ratuhu iata mangale wodiai ma Jou Ai Tau-tau maliate mahohol̄e o ratuhu moi deʼ mangorana madadatoko mangöere. Ma hohol̄e moi madubuho o kilo moruange de iata.

²⁸O haaka mahou gënanga, o kilo moruange, o Bezaleel wo diai o dodohanga deʼ o lalakete mangale maloliate, inoli liate-liate gënanga mabarene madadamunu.

²⁹O tabaga ihihohuba-huba ma Jouika magegetongo mata-mata o kilo o ribuhu hinoto de o ratuhu iata de monaoko de motoa.

³⁰O tabaga gënanga wapake mangale wadiai ma Jou Ai Tau mangorana mahohol̄e, o huhuba mangï de ma asaki o kawa tabaga, ingodumu mahuhuba mangï mapakakaha,

³¹malöa yakilolitino mahidete mahohol̄e de mangorana ma amoko, ma Tau mabebeloho mata-mata deʼ malöa magilolitino.