Read Tobelo O KELUARAN 40 Bible Online

O KELUARAN 40 - Tobelo bible

O KELUARAN 40

¹Ma Jou wïtemo o Musaika,

²”Nihigoko Ahi Tau o wange mamoi o mede mamoioka.

³Nihingohama magoronaika o Jaji ma Peti madol̄a o Tita Ngimoi deʼ nihipake o dadamunu o ngöere mahimangino.

⁴Niakelenga o meja de mapakakaha. Nihingohamö o hilo mal̄ou deʼ mahilo niatuhuku.

⁵Niakelenga o huhuba mangï o gurasi o dupa yoduhu-duhuku o Jaji ma Peti mahimangoka deʼ nio nuneuku o guba o Tau mangoranoka.

⁶Niakelenga o huhuba mangï mangale o huhuba yatuhu-tuhuku o Tau mangorana mahimangoka.

⁷Nia kelenga o akere ma bak o Tau deʼ o huhuba mangï gënanga mahidogorona, daha yoguiti o akere.

⁸De ipaha niö dohohe mahidete o Tau malöa magilolitino, deʼ nia nuneuku o löa mangorana ma amoko madadatoko o ngöere.

⁹De ipaha o Tau-tau deʼ hagala mapakakaha kokiani nohihihuba Ngohino de madodagi hoko gënanga, hupaya ingodumu yatingaka mangale Ngohi.

¹⁰Nohihuba o huhuba mangï deʼ hagala mapakakaha de madodagi hoko gënanga, hupaya ingodumu yatingaka mangale Ngohi.

¹¹Nidiai hoko genangoli de o akere ma bak deʼ mabuku.

¹²Genanga de iböto, nähuloko o Harun deʼ ai ngoha-ngohaka yoböa o Tau mangoranino de imaohiki.

¹³Nihipake o imam mapakeanga o Harunika, deʼ nïminya ünanga hupaya ünanga iwitingaka mangale wohileleani Ngohi hokä ma imam.

¹⁴Daha nähuloko aingoha-ngohaka imahitigi, deʼ nähipake o kameja onangika.

¹⁵Daha näminya önanga hokä ngona nïminya toönanga manga ama, hupaya önanga mayakunu ihïleleani Ngohi hokä ma imam. De o minya upacara gënanga, toönanga manga hoana i uti manga ngohaka de manga danongo yasö o imam mamanarama.”

¹⁶O Musa wadiai hagala moi-moi hokä ma Jou wohi popareta.

¹⁷O wange mamoi o mede mamoioka o taongo mahinotoka magoronaka o Israel manyawa de ipaha yamal̄aka o Mesir maberera, ma Jou Ai Tau-tau gënanga ihidiai.

¹⁸O Musa wögelenga mahohol̄e wohigoko majaro, wohitabi mahita magota-gota, deʼ waoko maliate.

¹⁹Daha wohihohe ma Tau makatu de madadamunu maporetino i l̄oku-l̄oku hokä wohipopareta ma Jou.

²⁰De ipaha o helewo hinoto gënanga yonoa o Jaji ma Peti goronauku. Daha o Musa wohitabi o Peti madadamunu gënanga deʼ wohi ngohama madodowiti magota magogolioko.

²¹Daha ünanga wakelenga o Peti gënanga o Tau-tau magoronaka deʼ mahimangoka wönuneuku o dadamunu o ngöere, hokä ma Jou wohipopareta unangika.

²²De ipaha o Musa wakelenga o meja o Tau magoronaka, ma ngöere maporetoka o koremieuku idaduoka.

²³Daha o meja mal̄okuoka ikelengauku o roti ihidodiaiukuoka, hokä Ma Jou wohi poparetaka o Musaika.

²⁴O hilo mal̄ou wakelenga o Tau-tau magoronaka, o koreharail̄e idaduoka, ihirihimangino de o meja gënanga.

²⁵Daha, o hilo-hilo gënanga yawango ma Jou Ai himangoka.

²⁶O huhuba mangï o gurasi wakelenga o Tau-tau magoronaka mangöere mahimangoka,

²⁷daha watuhuku o dupa mabounu mahemo-hemoro hokä ma Jou wohipoparetaka o Musaika.

²⁸O Musa wönune madadatoko o ngöere o Tau mangoranika,

²⁹deʼ o ngorana gënanga mahimangoka wakelengauku o huhuba mangï mangale o huhuba yatuhu-tuhuku. O huhuba ihidodiaiuku.

³⁰O bak tabaga wakelenga o Tau deʼ o huhuba mangïmahi dogorona, daha yoguiti o akere.

³¹O Musa, o Harun deʼ ai ngoha-ngohaka yaihoro manga giama deʼ toönanga manga l̄ou genangokadau,

³²önanga ihigeto-getongo yowohama ma Jou Ai Tau magoronaika ekola imahitigi o huhuba mangïika.

³³O Tau-tau deʼ o huhuba mangï gënanga magilolitino o Musa wohilaketuku o hidete, daha ünanga wönuneuku madadatoko o ngöere o löa mangorana ma amokoka. De ibötoka o manarama gënanga mata-mata.

³⁴ De ipaha o lobi iuti yatamunuku ma Jou Ai Tau, deʼ o Tau-tau gënanga iomanga de o cahaya ma Jou Ai himanga.

³⁵Karana gënanga o Musa wakunua wowohama o Tau-tau gënanga magoronaika.

³⁶Ihi geto-getongo o lobi gënanga idoa ma Jou Ai Tauoka de yail̄e, o Israel manyawa yakilianga toönanga manga tau-tau madoomu mangale imatururu o ngï mahomoaika.

³⁷Mä nako o lobi gënanga idoaua, önanga imagorakua genangokadau.

³⁸Hokokia madekana o Israel manyawa yodagi yakaika yakaino, ma Jou naga o Tau-tauoka gënanga, o wange-wange womahi rupa o lobi deʼ o hutu-hutu womahi rupa o uku.