Read Tobelo O KELUARAN 6 Bible Online

O KELUARAN 6 - Tobelo bible

O KELUARAN 6

¹Ma Jou Madutu wïtemo o Musaika, wato, ”Ngohi ma Jou.

² Ngohi tomahi matokoka Ahi diri o Abrahamika, o Ishak, deʼ o Yakubika hokä ma Jou Madutu Wokokuaha, mä Ngohi tomahi näko ua ahi diri onangika de ma Jou Ai romanga.

³Ngohiö todiaiua o jaji dede önanga. Ngohi tojaji aha Tahi döaka o Kanaan maberera onangika, o berera toönanga manga ngï mahira yowango hokä o nyawa dagi-dagino.

⁴Ngohi toihenoka o Israel manyawa manga daiana o Mesir ma nyawa imä gilaongo, daha Ngohi tö hininga Ahi jaji gënanga.

⁵Hoʼ nahi ngahu o Israel ma nyawaika Ngohi tä temo onangika: Ngohi ma Jou; o Mesir manyawa imä gogilaongo ngini, aha Tinihibebasi. Ngohi aha tohi matoko Ahi kuaha yömodo-modongo la Tahihalamati önanga deʼ Ta hitapal̄u o hukumanga ma dodubuho o Mesir ma nyawaika.

⁶Ngini aha Tinihidadi Ahi umati, deʼ Ngohi idadi nia Jou Madutu. Done ngini aha nihi öriki Ngohi nënanga ma Jou, nia Jou Madutu Tinihibebasi ngini o Mesiroka manga gogilaongo.

⁷Ngini aha Tinï ao o bereraika o berera Ta hijä jajioka de makoboto o Abrahamika, o Ishak, deʼ o Yakubika; o tonaka gënanga Ti nihi döaka nginika idadi tingini madutu. Ngohi ma Jou.”

⁸Mata-mata ma Jou Ai behehongo gënanga o Musa wohi adono o Israel manyawaika, mä önanga yoluku iwihaduli o Musa, karana yadiai o gilaongo mahayanga koiwa gënanga yadiaioka manga ngonganono itoaka.

⁹De ipaha ma Jou wïtemo o Musaika,

¹⁰”Noiki nï himanga o Mesir mangakoano deʼ nahetongo ünanga kokiani wahigumal̄a o Israel manyawa yamal̄a ai berera.”

¹¹Mä o Musa wohaluhu, ”O Israel manyawa mahirete yoluku i hihi gihene ngohi. Yakunu idadi o Mesir ma koano wahi gihene o nyawa yo sosawaroua yo temo-temo hokä ngohi?”

¹²Hoko gënanga ma Jou wä huloko o Musa deʼ o Harun la ihi adono o Israel manyawaika deʼ o Mesir ma koanoika, önanga ma Jou wahi döaka o manarama mangale yä tuda o Israil manyawa yo hupu o Mesir ma bereraino.

¹³Nenanga o Musa deʼ o Harun manga ete de manga tohora manga roma-romanga: O Ruben, o Yakub aingohaka o riaka, aingohaka o nauru yaruata: O Henokh, o Palu, o Hezron, deʼ o Karmi. Onanga gënanga o roriadodoto o Ruben ai hoanino manga ete de manga tohora.

¹⁴O Simeon deʼ ngoi hekata moma tengo o Kanaan ma ngoheka manga ngohaka o nauru yabutanga: o Yemuel, o Yamin, o Ahad, o Yakhin, o Zohar deʼ o Saul. Onanga gënanga o roriadodoto o Simeon ai hoanino manga ete de manga tohora.

¹⁵O Lewi aingohaka o nauru yaruange: o Gerson, o Kehat deʼ o Merari. Onanga gënanga o roriadodoto o Lewi ai hoanino manga ete deʼ manga tohora. O Lewi ai umuru wakunu o taongo o ratuhu moi de moruange de tumidi.

¹⁶ O Gerson aingohaka o nauru yahinoto: O Libni deʼ o Simei; önanga manga ngohaka de manga danongo yowoë.

¹⁷O Kehat aingohaka o nauru yaruata; o Amran, o Yizhar, o Hebron deʼ o Uziel. O Kehat ai umuru wakunu o taongo o ratuhu moi de moruange de hange.

¹⁸O Merari aingohaka o nauru yahinoto: o Mahli deʼ o Musi. Genanga o roriadodoto o Lewi ai hoanino deʼ toönanga manga ngohaka deʼ manga danongo moi-moi.

¹⁹O Amram wokawingi de o ngo Yokhebed, ai ama ngoi hiranga o dodoto, deʼ toönanga manga ngoha-ngohaka ganga o Harun deʼ o Musa. O Amram wowango o taongo o ratuhu moi deʼ moruange deʼ tumidi.

²⁰O Yishar aingohaka o nauru yaruange: O Kerah, o Nefeg deʼ o Zikhri.

²¹O Uzielö aingohaka o nauru yaruange: o Misael, o Elsafan deʼ o Sitri.

²²O Harun wokawingi de o ngo Eliseba, o Aminadab ngoi ora; o ngo Elisebaö o gia biranga deʼ o Nahason. O ngo Eliseba mihingohaka o Nadab, o Abihu, o Eleazar deʼ o Itamar.

²³O Korah aingohaka o nauru yaruange: o Asir, o Elkana deʼ o Abiasaf. Önanga gënanga o Korah ai hoana manga tau madol̄a manga ete deʼ manga tohora.

²⁴O Eleazar o Harun aingohaka o nauru, wokawingi de o Putiel ngoi ora moma tengo, deʼ toönanga manga ngohaka ganga o Pinehas. Genanga mata-mata o hoana mabaluhu deʼ o tau madol̄a mabaluhu o Lewi aihoanino.

²⁵O Harun deʼ o Musa geonanga ma Jou wahi pareta la yä ao o Israel manyawa yohupu o Mesir mabereraka.

²⁶Onanga yahinoto iwï himanga o Mesir ma koano hupaya ünanga wahibebasi o Israel manyawa.

²⁷Maöraha ma Jou imä ade-ade de o Musa o Mesir mabereraka,

²⁸ma Jou wïtemo, ”Ngohi ma Jou, No hiädono o Mesir ma koanoika hagala moi-moi Ta heto-hetongoka ngonaika.”

²⁹Mä o Musa wohaluhu, ”Jou, Ngona nohi öriki ngohi to sawaroua totemo. Yakunu idadi ma koano wö modeke wo hihi gihene ngohi?”