Read Tobelo O KELUARAN 7 Bible Online

O KELUARAN 7 - Tobelo bible

O KELUARAN 7

¹Ma Jou wïtemo o Musaika, ”Ngohi aha tonihidadi ngona hokä ma Jou Madutu ma koano ai himangoka, deʼ ani riaka o Harun aha wo temo-temo unangika hokä ani nabi.

²Nohiadono o Harunika mata-mata Tonihi popareta ngonaika. Nï huloko o Harun wahetongo ma koanoika ünanga kokiani wahigu mal̄a o Israel manyawa ya mal̄a o Mesir maberera.

³ Mä Ngohi aha tohidadi ma koano ai haëke i togowini. Unanga aha woni haduliua ngona, ngaroka Ngohi tö gao o bodito ma ngoë o Mesir ma bereraika.

⁴Karana gënanga Ngohi aha tahukumu o Mesir de o hukumanga madodubuho, de ipaha Tä ao mata-mata o Israel manyawa, Ahi umati, yohupu de o berera gënanga.

⁵Done o Mesir manyawa aha ihi öriki Ngohi nënanga ma Jou, maöraha Ngohi Tä hukumu önanga deʼ Tä ao o Israel manyawa yohupu toönanga manga bereraka.”

⁶O Musa deʼ o Harun yadiai okia wahi popareta ma Jou.

⁷O Musa ai umuru o taongo mori tufange deʼ o Harun o taongo mori tufange deʼ hange maöraha önanga iwï himanga ma koano.

⁸Ma Jou wätemo o Musa deʼ o Harunika,

⁹”Nako ma koano wogahoko ngini nidiai ihera-heranga hokä manyonyata igoungu, nï huloko o Harun wal̄ë ai diki-diki deʼ wo hikaweli o tonakuku ma koano ai himangoka. O diki-diki gënanga aha ingali imadadi o dodiha.”

¹⁰Done o Musa deʼ o Harun yoiki iwï himanga ma koano deʼ önanga yodiai okia ma Jou Madutu wahi popareta. O Harun wohi kaweli ai diki-diki o tonakuku ma koano de ai pegawe-pegawe manga himangoka, daha o diki-diki gënanga ingali imadadi o dodiha.

¹¹Karana gënanga ma koanö wä ahoko hagala ainyawa yososawaro deʼ yomai-maihi, daha önanga yodiai hoko genangoli deʼ toönanga manga mamaihi.

¹²Onanga ihi kaweli toönanga manga diki-diki o tonakuku deʼ manga diki-diki gënanga ingali imadadi o dodiha. Mä o Harun ai diki-diki yalahiri toönanga manga diki-diki.

¹³Ngaroko hoko gënanga, ma koano kahirahi watogowini ai haëke deʼ woluku wa haduli o Musa deʼ o Harun manga demo, hokä ma Jou wa heto-hetongoka.

¹⁴De ipaha ma Jou wïtemo o Musaika, ”Ma koano gënanga duru ai haëke itogowini; ünanga woluku wohi gumal̄a o Israel manyawa yoiki.

¹⁵Hababu gënanga noiki nima make dede unanga o hutu-hutuinohi, maöraha ünanga wouti o Nil ma Ngairuku. Nao o diki-diki yakunu ingali imadadi o dodiha gënanga deʼ nï damä wo böa o ngairi madatekoka.

¹⁶Nahetongo ma koanoika gënanga ma Jou, o Ibrani manyawa manga Jou Madutu, wohi huloko ngohi la tohiadono ngonaika ahi Tuanga hupaya nahigumal̄a Ai umati yoiki la iwi huba iwi horomati Unangika o tonaka ikokakahaka. Mä hiädono öraha nënanga ahi Tuanga noluku nohigihene.

¹⁷ Hababu gënanga, ma Jou wotemo hoko nënanga, ’Okia damä aha Tadodiai genangino, ngona aha nohi öriki Ngohi ma Jou. De o diki-diki nënanga ngohi aha tagohara o ngairi ma akere mal̄oku uku, deʼ ma akere aha ingali imadadi o awunu.

¹⁸Hagala o nawoko aha ihonenge, deʼ o ngairi nënanga aha mabounu mamela, hiädono o Mesir manyawa yakunua yaokere ma akere.’ ”

¹⁹Ma Jou wïtemo o Musaika, ”Nïhuloko o Harun wal̄ë ai diki-diki deʼ wohi tumutu mata-mata o ngairi o heli-heli deʼ o lupa-lupanga mal̄okuuku o Mesir mabereraka. Ma o akere aha i madadi o awunu, deʼ o berera mata-mataika aha naga o awunu, mabo boloi o akere mangï deʼ o rube-rube helewo magoronaka.”

²⁰O Musa deʼ o Harun yadiai okia ma Jou wahi popareta. Ma koano deʼ ai pegawe-pegawe manga himangoka. O Harun wagoraka ai diki-diki deʼ wagohara o Nil ma Ngairi ma akere, done ma akere ingali imadadi o awunu.

²¹Hagala o nawoko o ngairi magoronaka gënanga ihonenge, deʼ mabounu duru kahä mel̄a, hiädono o Mesir manyawa yakunua yaokere o akere gënanga. O Mesir matonaka yamodeke naga o awunu.

²²Mä o Mesir yomai-maihi hoko genangoli yodiai de toönanga manga mamaihi, hiädono ma koano kahirahi ai haëke itogowini. Hokä ma Jou waheto-hetongoka, ma koano woluku wahigihene o Musa deʼ o Harun.

²³Koaholi ünanga wolio o kadatoika de kama huhutulö ma wahaduli ikaua idödadadi gënanga.

²⁴Mata-mata o Mesir manyawa yohaiti o baiti o ngairi magurutu madatekino la yolingiri o akere yaoke-okere, karana o ngairi ma akere gënanga yakunua yaokere.

²⁵Ma Jou walolai o Nil ma Ngairi deʼ iböto o wange tumidi ipaha.