Read Tobelo O KELUARAN 8 Bible Online

O KELUARAN 8 - Tobelo bible

O KELUARAN 8

¹Daha ma Jou wïtemo o Musaika, ”Noiki nïhimanga ma koano deʼ nohiädono unangika Ahi behehongo nënanga: ’Nahigumal̄a Ahi umati la ihihuba ihihoromati Ngohino.

²Nako ngona noluku, o berera nënanga aha tohiomanga deʼ o koro-koro hokä o hukumanga.

³O Nil ma Ngairi aha iomanga de o koro-koro, hiädono o aiwani-aiwani gënanga ihupu o akerel̄e deʼ iwohama ani kadato magoronaika, ani kamari nomä idu-idu magoronaika, de ani gidu-ngiduoka, ani pegawe deʼ ani kawaha manga tau magoronaika, maboboloi o roti mahaharongo magoronauku deʼ o boho-bohokika.

⁴O koro-koro gënanga aha imatotubo deʼ ini doa-doa ngona, o pegawe deʼ o kawaha.’ ”

⁵Ma Jou wïtemo o Musaika, ”Nïhuloko o Harun ai diki-diki wohi tumutu mata-mata o ngairi, o heli-heli deʼ o lupa-lupanga mal̄okuku hupaya o koro-koro ikoki böaino yaömanga yamodeke o Mesir maberera.”

⁶Done o Harun wohitumutu ai diki-diki mata-mata o akere mal̄okuika, daha okoro-koro yaomanga o berera ingodumu.

⁷Mä yomö mai-maihi yapake toönanga manga mamaihi, deʼ yodiaiö o koro-koro ikoki böa o bereraka gënanga.

⁸Makoano wä ahoko o Musa deʼ o Harun, deʼ wätemo, ”Ni mä niata ma Jouika hupaya Ünanga wahohihanga o koro-koro nënanga, done ngohi aha tähigumal̄a ani nyawa yoiki hupaya ihi huba o huhuba ma Jouika.”

⁹O Musa wohaluhu, ”De ahi hininga i sosanangi ngohi aha tomäniata mangale ngona ahi Tuanga. Nohigogere maöraha, done ngohi aha tonihiniata ngona ahi Tuanga, ani pegawe deʼ ani kawaha. Done ahi Tuanga aha inihibebasi de o koro-koro gënanga, deʼ aha koiwa mahou, sowaliua o Nil ma Ngairoka.”

¹⁰Ma koano wohaluhu, ”Nomä niata yarehe mangale ngohi.” O Musa wato, ”Ngohi aha tadiai okia ahi Tuanga nogahoko. Done Tuanga aha nohi öriki koiwa naga o Jou Madutu mahomoa hokä ma Jou, tongomi mia Jou Madutu.

¹¹Unanga aha winihi bebasi deʼ o koro-koro gënanga ngona ahi Tuanga, o popegawe deʼ o kawaha. Aha koiwa naga o koro-koro o tau-tauika sowaliua o Nil ma Ngairoka.”

¹²Daha o Musa deʼ o Harun iwi mal̄aika ma koano. De ipaha o Musa womä niata ma Jouika hupaya wahohihanga o koro-koro wohibö boa-boa ma koanoino.

¹³Ma Jou wohi moteke o Musa ai gogahoko, deʼ o koro-koro naga o tau-tauika, o loa-loaika deʼ o dumule-dumuleika mata-mata i honenge.

¹⁴O Mesir manyawa yatoomu o koro-koro mahonenge gënanga hiädono dema dodoporono, hiädono yamodeke o berera mabounu o mëla.

¹⁵Maöraha ma koano wamake o koro-koro gënanga i kokia honengoka, ünanga watogowini ai haëke. Deʼ hokä ma Jou waheto-hetongoka, ma koano woluku wahaduli o Musa deʼ o Harun manga demo.

¹⁶Ma Jou wïtemo o Musaika, ”Nïhuloko o Harun wagohara o tonaka de ai diki-diki, done o Mesir maberera yamodeke ma kafo ingali imadadi o gomoma.”

¹⁷Done o Harun wagohara o tonaka de ai diki-diki, deʼ mata-mata o kuhuhunu o Mesir mabereraka ingali imadadi o gomoma yäguruhe o nyawa deʼ o aiwani.

¹⁸Yo mai-maihi ihi dailako yapake manga mamaihi de manga mantra la yodiaiö o gomoma, mä önanga yohasilua. Kiaka dika naga o gomoma,

¹⁹ hiädono yomai-maihi gënanga yotemo ma koanoika, ”Nenanga ma Jou Madutu Ai manarama.” Mä ma koano gënanga watogowini ai haëke, deʼ hokä waheto-hetongoka ma Jou, ma koano gënanga woluku wahaduli o Musa deʼ o Harun manga demo.

²⁰Ma Jou wïtemo o Musaika, ”Noiki yarehe duru o ngoru-ngorumino nimamake de ma koano maöraha ünanga wouti o ngairuku, deʼ nohiädono Tongohi ahi demo nënanga: ’Nahi gumal̄a Ahi umati yoiki ihi huba ihi horomati Ngohino.

²¹Nako ngona noluku, done Ngohi aha tahuloko o guhuru i boa ngonaika, o popegaweika deʼ o kawahaika. O Mesir manga tau mata-mata, maboboloioli o berera yamode-modekika aha i omanga de o guhuru.

²²Mä Ngohi aha todiai hara moioli mangale o Gosyen madaera, manga ngï Ahi umati yogogere. Dokengoka aha koiwa o guhuru, hupaya ngini nihiöriki Ngohi, ma Jou, wadodiai gënanga.

²³Ngohi aha tadiai Ahi umati de ani kawaha i maketeroua. Ihö hera-heranga gënanga yarehe aha imadadi.’ ”

²⁴Ma Jou wahuloko o guhuru iboa duru kahä ngöe ma koano ai kadatoika, deʼ ai popegawe manga tau-tauika. O Mesir maberera yamodeke duru o huha de o hangihara karana o guhuru-guhuru gënanga.

²⁵De ipaha ma koano wä ahoko o Musa deʼ o Harun daha wätëmo, ”Noiki nihi huba nia huhuba nia Jou Madutuika, mä o bereraka nënanga dika.”

²⁶”Kayaoa de ngarouha,” o Musa wohaluhu, ”karana o Mesir manyawa aha yamao manga hininga yadaenua nako yamake tongomi mia huhuba gënanga, deʼ marai ngomi aha imï kaweli de o helewo hiädono mihonenge.

²⁷Ngomi kokiani mioiki o tonaka ikokakahaika magurutika o wange hange madodagi la mihihuba o huhuba ma Jouika tongomi mia Jou Madutu, hokä wohi poparetaka ngomino.”

²⁸Ma koano watemo, ”Kayaoa, tinïhigumal̄a ngini nioiki o tonaka i kokakahaika la nihihuba o huhuba ma Jouika, nia Jou Madutu, iti yakunu nikurutikaua nioiki. Nio hohininga, nihi niati ngohi!”

²⁹O Musa wohaluhu, ”Ngohi toiki de ipaha, ngohi de majapati tomä niati ma Jouika hupaya yarehe o guhuru-o guhuru gënanga ini mal̄a ngona ahi Tuanga, o popegawe deʼ o kawaha. Mä uha nomi tipuoli ngomi, deʼ uha nätatatoko o Israel manyawa yoiki la ihihuba manga huhuba ma Jouika.”

³⁰O Musa wimal̄a ma koano daha womä niata ma Jouika,

³¹deʼ ma Jou wohi moteke o Musa ai gogahoko. O guhuru-o guhuru gënanga ikokihoho yamal̄a ma koano, o popegawe deʼ o kawaha. Ka o guhuru moiö de koiwa igogogerohi.

³²Mä mamoiohi nënanga maʼ ma koano watogowini ai haëke deʼ wahigumal̄aua o Israel manyawa gënanga yoiki.