Read Tobelo O AYUB 1 Bible Online

O AYUB 1 - Tobelo bible

O AYUB 1

¹O Us matonakoka wogogere womatengo o nauru ai romanga o Ayub. Unanga wihuba ma Jou Madutu deʼ wosetia ünangaika. Unanga ai hininga yaoa deʼ wodiaiua o dorou kamahuhutulo ma.

²To ünanga aingohaka o nauru yatumidi deʼ aingohaka o ngoheka yaruange.

³Ikali gënanga toünanga ai gogilaongo komanga ngöe, ai duba o dutu o 7.000, ai onta o dutu o 3.000, ai hapi o dutu o 1.000, deʼ ai keledai o dutu o 500. O demo madipoko, ünanga ganga duru wokaya o wange mahiwaroko madaeraka yogogogere manga hidogoronaka.

⁴O Ayub aingohaka o nauru yatumidi toönanga manga biaha mangale yodiai o rameanga manga tauoka moi-moi de madodagi imateke totagali. O rameangoka gënanga o Ayub ngoi ora yaruangeö yäahoko, daha önanga mata-mata ima kinïki yol̄omo deʼ yokere.

⁵O rameanga magetongo iböto, o Ayub salalu womomiki kawöngoru-ngorumu deʼ wohihuba o huhuba mangale aingohaka magetongo hupaya ma Jou wahi apongo önanga. Hababu o Ayub womapikiri, mudukua ai ngoha-ngohaka gënanga yohangajaua yobaradohaoka deʼ iwi hikauku ma Jou Madutu.

⁶ O wange moiuku o dodadi-o dodadi o horogaino iwihimanga ma Jou, deʼ wobo baja-baja naga toönanga manga hidogoronaka.

⁷Ma Jou wileha unangika, ”Okiaka deʼ naino ngona?” Wobö baja-baja wohaluhu, ”Ngohi dahao dika tongika ngino deʼ todagi o dunia tamode-modekika.”

⁸Daha ma Jou woleha, ”Boteka nimakeoka ahi gilaongo o Ayub? O dunia magilolitino moiua o nyawa hoko gënanga manga setia deʼ manga hininga maoa hokä ünanga. Unanga wohi huba Ngohi deʼ kautuö deʼ koiwa wodiai o dorou.”

⁹ Mä wobö baja-baja wahaluhu, ”Maraioka dika o Ayub woni huba Ngona hababu ünanga watarima mabalahi.

¹⁰Unanga ai tau manyawa deʼ hagala ai kaya salalu Nogoana. Ai karajanga Nohi barakati deʼ nihidöaka ünanga mangöe o aiwani o gigini, iyaoaka mangale yaomanga o berera ingodumu.

¹¹Mä hohiade hagala ai kaya gënanga Nal̄e, maraioka ünanga aha gila-gila wonilolai Ngona!”

¹²Daha ma Jou witemo wobö baja-baja, ”Kayaoa, nadiai okia dika deʼ hagala o Ayub ai kaya, itiuha nihangihara ünanga!” Daha ima jobo wobö baja-baja ma Jou Ai himangoka.

¹³O öraha muruono naga ipahaika o Ayub aingoha-ngohaka magogiria yodiai o rameanga toönanga manga riaka worö ria-riaka ai tauoka.

¹⁴Itodokanino womatengo o huhuloko woböa womapopopata o Ayub ai tauika deʼ wohingahu, ”Tuanga, o Syeba manyawa yoböaoka imiparangi ngomi maöraha o hapi-hapi magogiria ipajeko o dumule deʼ o keledai-keledai magogiria i ol̄omo o momo madatekoka. Onanga yaoraoka o aiwani-aiwani gënanga, deʼ yätoma anigilaongo Tuanga naga genangoka. Duga-duga ngohi dika to otana hiädono yakunu tohi ngahu ngonaika Tuanga.”

¹⁶Maöraha ünanga kawotemo-temohi, woböa o gilaongo mahinotoka deʼ wato, ”Tuanga aniduba-duba deʼ aniaiwani magogoana o leletongo yautuku hiädono mata-mata yohonengoka. Duga-duga ngohi okahi mahirete tootana hiädono yakunu tohingahu ngonaika Tuanga.”

¹⁷Unanga wotemo-temo ipahauahi, maöraha o gilaongo mahangeoka woböa wohingahu, ”O Kasdim manyawa yoora-ora o duduono hange, yaoraoka anionta-onta Tuanga deʼ yätoma anigogilaongo Tuanga. Duga-duga ngohi dika to otana hiädono yakunu tohingahu ngonaika Tuanga.”

¹⁸Maöraha ünanga kawotemo-temohi, woböa o gilaongo mahomoa woao o abari, ”Ani ngoha-ngohaka Tuanga magogiria yodiai o rameanga aningohaka Tuanga mariaka aitauoka.

¹⁹I todokanino o rato iwuwu o tonaka ikokakaha deʼ yaino deʼ yodubuku o tau gënanga hiädono iruba deʼ yahonengoka mata-mata ani ngohaka Tuanga.” Duga-duga ngohi tootana hädono yakunu tohingahu ngonaika Tuanga.

²⁰Daha o Ayub womaoko deʼ wakakihi ai pakeanga manonako woduka. Unanga wakori ai tadauru, daha womahi tudukuku deʼ wotemo,

²¹”Ngohi ihihingohaka deʼ ahikia-kiaua, deʼ ngohi aha tohonenge deʼ ahikia-kiauaoli. Ma Jou wohidoakoka deʼ ma Jouoli wal̄ëoka. O higiriri Ai romanga!”

²²Ho, ngaroka o Ayub waohana hagala o huha gënanga, ünanga wodiaiua o baradoha deʼ wihihowonua ma Jou Madutu.