Read Tobelo O AYUB 10 Bible Online

O AYUB 10 - Tobelo bible

O AYUB 10

¹Ngohi togihounu deʼ yatoka towunanga de ahingango, done tapuraraha ahijiwa mamali.

²Ya Jou Madutu, uha Nohihihowono ngohi; nohihitararono yadodoa ngohi Nohilawani.

³Okia mautumu nako Ngona nohi tuku hoko nënanga, deʼ naumo Ani gao-gao mahirete mahasili? Okia mautumu nako Ngona nohiböa manga damake deʼ manga datoro o nyawa madorou?

⁴Ani lolega imateroua de o nyawa manga lolega

⁵deʼ ani umuru imadaenua mamodipoko manga umuru.

⁶Nako hoko gënanga, yadodoa Natailako hagala ahibaradoha? yadodoa Nohiginïki ahihowono magetongo?

⁷De madiai Ngona nohiöriki deʼ namao, ngohi tahowonua, mä itiai. Ngona nohiöriki o nyawa imatengo yakunua ihihihalamati ngohi Ani giamino.

⁸Ngohi nënanga ihituuku Ani giama, sarakia yakunu öraha nënanga kokiani Nohi hibinaha ngohi?

⁹Nohininga o tonaka matau-taulino Nohidadioka ngohi! Sarakia yakunu Nohidiai ngohi tomaidulu todadi o kafo?

¹⁰Nihigumal̄a ahi ama wohihidadi ngohi deʼ nohihihero ngohi ayo amimamata magoronaka.

¹¹Ahi röehe natuku de ahi kobo-kobongo deʼ o nguroto; ahi kobongo nohidöaka o akeme deʼ ahikai nahawo.

¹²Nohi hidöaka ngohi towango; Ngona nohidora ngohi, ahijiwa Nogoana de Ani paliara.

¹³Mä öraha nënanga tohiöriki madekanino gënanga, nomahi bongonika Nohi datoroka ahibodito.

¹⁴Kanohi totailako ngohi nako todiai o howono, hupaya yakunu Natila nohihidöaka o apongo.

¹⁵Nako ngohi todiai o baradoha, done okia idadi ngohino igoungu o bodito! Mä nako ahimanarama koiwa makuranga, kahirahi ngohi nohipulono todiai o baradoha! Tobaraniua ngohi tagoraka ahihäeke, hababu tamao ahihininga iduka deʼ tobaragunaua.

¹⁶Nako tohasili, ngaro hokokiaua, Ngona nohiginïki ngohi hokä singa. Deʼ Nohidumutokali Ani kuaha, duga-duga mangale nohihikokamodongo ngohi.

¹⁷Salalu Naduhuloko o hakihi ihilawani ngohi; deʼ iholoi i lamoko Anigangamo ngohino. Natoomu o duduono-duduono maduru mangale ihilawani deʼ ihiparangi ngohi.

¹⁸Yadodoa Nohi mal̄aika ngohi toma kil̄au o duniaka? Holoi yaoa ngohi tohonenge dika o nyawa ihimakeuahi!

¹⁹Done matero-tero ngohi komaiwahi toma kil̄au, hababu o mamata inohi gila-gila ihilungunu.

²⁰Eh, itedekanokauaoli ngohi aha tohonenge, done mal̄aika ngohi mahirete, hupaya yakunu ngohi tajame ahi öraha mahouohi nënanga.

²¹Itedekanokauaoli ngohi toiki deʼ toma idulokaua, tameta o berera ihohuhutu deʼ duru kai hohonguku,

²²o berera ihohuhutu, iomanga o gurumini deʼ o ruae, kiaka o dararono kaimatero marupa o huhutu.”