Read Tobelo O AYUB 12 Bible Online

O AYUB 12 - Tobelo bible

O AYUB 12

¹O Ayub wohaluhu, ”Igoungu, ngini nënanga nia tagali o umati o nyawa. Nako ngini nihonenge, o barijaö aha ihonenge.

³Ngohiö o nyawa de ahidibangoka; mata-mata ngini nitö temo-temo gënanga, tomangaratioka. Ikali, o nagona yanakoua mata-mata gënanga? Ho, uha niato bote ngini nihi tioil̄e ngohi!

⁴Ngohi ihigogiete ahidodiawo deʼ ahihoba-hobata, enahioko ngohi nënanga tatiai deʼ koiwa ahikuranga. Mahira ma Jou Madutu wö baluhu ahi niata, nako ngohi tomahi böaka togahoko wohï riwo.

⁵Ngini niahikauku o nyawa yobobodito, enahioko niawowango isanangi; o nyawa ngadeke yoruba ngini niagohara.

⁶Mä yoora-ora manga ngango yahikokamodongua; o nyawa yobobarani iwilawani ma Jou Madutu, manga ngango isanangi. Enahioko o gikiri idadi önanga yangaku, duga-duga manga kuata mahirete dika.

⁷Nileha o totaleo deʼ o aiwani mahomoaika done ngini aha enanga inihidöaka o dodotoko.

⁸Nigahoko o hitararono o dodadi o duniaoka deʼ o ngötokaika, done ngini aha niatarima o himangarati.

⁹O nagona mahidogoronaka mata-mata gënanga yamaoua, toönanga manga dodadi ganga ma Jou Madutu mahirete?

¹⁰Unanga watatoro mawowango hagala o dodadi nënanganaga; Unanga wakuaha mangale o nyawa moi-moi manga jiwa.

¹¹Hokä ahi akiri yoigo yajame o inomo ihemo-hemoro, hokogënanga ahingauku yoigo i ihene o demo.

¹²Maabari, o barija naga o nyawa manga umuru magogurutil̄eoka, mä o barija deʼ o kuata naga ma Jou Madutu dika. Yatobari o mangarati naga o nyawa manga umuru ikökuru-kurutokaua, mä o mangarati deʼ o kuaha naga ma Jou Madutuoka dika!

¹⁴Okia wakilianga yakunua ihigokooli o nagona watumunguku yakunua yolapahioli.

¹⁵Unanga watatoko o akere, done iowaha deʼ itore mata-mata, Unanga wapidili ihahuru, done o nguihi iolu!

¹⁶Ma Jou Madutu gënanga wokuata, woputurungu deʼ wokaya! Yotö tipu-tipu deʼ yatötipu-tipu naga Ai kuaha matimioka.

¹⁷Warahuku o popareta yokokuaha manga barija deʼ yotö tuda-tuda wahidadi yagögogiete.

¹⁸Walulumomiki o koano deʼ watagoko önanga;

¹⁹Wahikauku o imam-imam deʼ ihibalu-baluhu.

²⁰Watamunu manga uru o nyawa yowöwarodemo, Warahuku manga barija hagala o nyawa yobalu-baluhu.

²¹Wahi mal̄eke o nyawa yahö heto-hetongo; wal̄ë toönanga manga haku ikokuaha.

²²Yatararono hagala o ngï ihohokomuru; yodihiwara hagala o gurumini mahuhutu itaro-taromo.

²³Hagala o hoana wadiai yodogo-dogo deʼ iwöe manga hasili, daha wabinaha önanga hiädono yowedere.

²⁴Wadiai o tutuda-tutuda imahiorikokaua, hiädono önanga yöiki okiakia honanga koiwa manga dumutu.

²⁵Onanga imahi bobal̄anga o huhutu magoronaka, deʼ kayo lebo-leboto hokä o nyawa yadaluku.”