Read Tobelo O AYUB 13 Bible Online

O AYUB 13 - Tobelo bible

O AYUB 13

¹Mata-mata gënanga mamoi iböto tamake deʼ toihene mahirete, deʼ igou-goungu tanako.

²Okia ngini nihiöriki, ngohiö tohiöriki; Uha niatobote ngohi koto utumua dede ngini.

³Mä ngohi tomau titemo de Duru woko Kuaha; ngohi toigo todemo ahi perekara ma Jou Madutu Ai himangoka.

⁴Hababu ngini niatamunu niabodo de o tipu, imahowonua hokä yohou-houru madutuua.

⁵Hohiade ngini nitemoua, maraioka ngini inipulono nibarija.

⁶Done ni ihene ahingongelo; niohohininga tomademo.

⁷Kaiyakunu de ma Jou Madutu Ai romanga ngini nieluku? Kaiyakunu ngini nitemo itiaiua mangale Ai paralu?

⁸Kaiyakunu ngini niwihiböa ma Jou Madutu, deʼ Niwi demo hokä ihidö dato-datoro?

⁹Nako ma Jou Madutu winitailako, aha yaoa mahasili? Yakunu ngini niwitipu hokä niätipu o nyawa?

¹⁰Nako ngini niwihiböa, ngaroka de kanimahi bongonika, ngini aha winihukumu ma Jou Madutu dema hayanga koiwa.

¹¹Boteka ai mulia ma Jou Madutu yatodokanua niajiwa? Boteka Ai kuaha homodo-modongo yatodokanua nia hininga?

¹²Hagala nianasihati hokä o kafo ifofaidaua; nimademo hokä o tonaka matau-taulu igapanga itororata.

¹³Hababu gënanga nimarïdi, mal̄aika ngohi totemo-temo! Ngohi tohaduliua sarakiaö magorehau!

¹⁴Ngohi toma sadia tohitai ahijiwa!

¹⁵Ngohi toma putuhoka ahihiningaka hababu ahinganono itoakoka! Nako ma Jou Madutu womau wohitoma, ngohi tomaike dika mä aha todemo ahi kalakuanga Ai himangoka.

¹⁶Akunu idadi karana ahibarani gënanga ngohi tohalamati, hababu o nyawa madorou aha yobaraniua iwi himanga ma Jou Madutu!

¹⁷O öraha nënanga ni ihene nihidodiai ahi demo; nio hohininga ahihitararono.

¹⁸Ahi perekara ibötoka tohihimanga; ngohi tongaku, yakunua ihihihowono ngohi!

¹⁹Jou, nako Ngona noböa deʼ nohikalaki ngohi, ngohi aha tomarirïdi deʼ todamä ahiajali.

²⁰Mä natarima ahi gogahoko hinoto nënanga, hupaya ngohi tobarani to Ni himangoli:

²¹noma togumu nohihangihara ngohi, deʼ uha Nohihi banga ngohi de Ani momodongo!

²²Notemo, done aha tohidöaka o bobaluhu. Ekola mal̄aika ngohi totemo, daha nohidöaka mabalahi!

²³Hokokia mangöe o howono deʼ o baradoha tadodiai? Hagala tatotilakuru abeika nahetongo!

²⁴Yadodoa Ngona nomahirehene deʼ nomahititoko ngohioka? Okia mahababu Nohipulono ngohi hokä Ani haturu?

²⁵Ngohi duga-duga o gota mahoka itifa yakorona o hidal̄oko, kiaka yakunu nohi hawa-hawana ngohi? Ngohi duga-duga o momo madoolenge deʼ imaai, kiaka yakunu nohigoginïki ngohi!

²⁶Nohi tantuoka o wowango imali-mali ngohino; nabalahi ahihowono maöraha tomä göika.

²⁷ Ahi l̄ou Naliko de o rante o behi; hagala ahijako-jako Natö tailako. Igoungu ahil̄ou mahoata, nohipidilua Ani lolegaoka.

²⁸Done ngohi aha todadi tobabiti hokä o gota mangedere; hokä o goguhu yaol̄omo o ngoëre ngohi idadi tobabiti.