Read Tobelo O AYUB 14 Bible Online

O AYUB 14 - Tobelo bible

O AYUB 14

¹O nyawa mulaenge imakil̄au gënanga yobole, yokuatua; manga ngango itipoko ikali iomanga o hangihara.

²Enanga itori deʼ imaai hokä o bunga-bunga; ihihanga hokä o gurumini, gila-gila imahihanga.

³Ya Jou Madutu, kiaka yakunu Ngona nomau nohipulono, deʼ nohihihimanga ngohi ani Juru Hakimika!

⁴Yakunoka o nyawa baradoha ihiböa o hali itötotiai?

⁵O nyawa manga umuru magegetongo Ngona nohitantuoka; mamede magegetongo nohi gogeroka. Nohi tatapuokaö ai ngango mabati-batingi; koiyakunua ünanga woaguru.

⁶Mal̄aika ünanga womahibatongo, uha niruaë ünanga; hupaya ünanga wakunu wajame ai ngango hiädono waböto ai manarama.

⁷Kanagahi o nganono mangale o gota itö tol̄a-tol̄anga; ënanga aha itorioli, daha ijaga.

⁸Ngaroka mangutuku o tonaka magoronaka idadi ibabiti, deʼ ma agere ihonenge karana iwedere,

⁹Mä nako o akere yatigi, ënanga iwangoli; hokä idato-datomo magö, madori-dori ihupuoli.

¹⁰Mä nako o nyawa yohonenge, koiwaka ai jarita; ünanga wohonenge, daha kiaika wöiki?

¹¹Hokä o akere ihaga o taaga magoronail̄e, hokä o ngairi iowaha hiädono imata ma akere,

¹²Hoko genangoli o nyawa yohöhone-honengoka: ünanga aha wakunokaua womomikoli. Unanga aha womomikokaua madekanino o dihanga kanagaohi, komaiwaka womomikoli ai ngidu-ngiduino.

¹³Nohigogono ngohi o nyawa yohone-honenge manga dunia magoronaka; nohi hohongino ngohi hiädono Ngona Nohi ngamookauaoli. Mä nohi tantu maöraha mangale nohininga ahi diri.

¹⁴Hababu, nako o nyawa yohonenge, yakunokaua ünanga wowangooli? O wange itagali o wange ngohi totamä hiädono ahiöraha imali-mali nënanga ipaha.

¹⁵Done Ngona aha nohiahoko ngohi, deʼ ngohiö aha tohidöaka o bobaluhu; Ngona aha nohi hayangoli ngohino, o dodadi Nohi dadadioka.

¹⁶Dahaö aha Natotailako ahi aguru magetongo, mä Nohininga okauaoli ahi baradoha.

¹⁷Ahi baradoha aha Nohi apongo deʼ Nohi titoko; ahihowono maöraha mahira aha Naehe.

¹⁸Damä ol̄oku-l̄oku aha itoropaha deʼ ima kokitingakoka, deʼ ol̄oku o helewo ikua-kuata mangïoka yatingakoka.

¹⁹Hagala o helewo yakori o akere ihahuru ikökua-kuata; o tonaka aha ihinahini mangale o awana iriki-rikimi. Hoko gënanga Nawedere o nyawa manga nganono.

²⁰Niutumoka ünanga mangale kahi ado-adonika; Nihuloko ünanga wöiki deʼ Nangali ai biono.

²¹Aingoha-ngohaka yodadi o nyawa yomomulia, mä ünanga wahiorikua. Deʼ nako önanga yodadi yobaragunaua, koiwa naga iwihingahu unangika.

²²Duga-duga airöehoka wamao maborohono; duga-duga o hininga mahuha watago-tagongo.”