Read Tobelo O AYUB 15 Bible Online

O AYUB 15 - Tobelo bible

O AYUB 15

¹Daha o Elifas wahaluhu, ”Notemo nohi hohomoa, Ayub, anidemo igoungu koiwa mamangarati! Moiua yososawaro manga bobaluhu hokä ngona nënanga, aha hoko genangua ünanga wödemo ai diri de o demo-demo koiwa mamangarati.

⁴Hohiade anidemo gënanga yamoteke, moiuaö iwimodongo ekola imaniatoli ma Jou Madutuika.

⁵Ani demo-demo ihinyata ngona nahowono, mä anidorou nohitamunu de aniakiri mabaata.

⁶Iparaluua ngona tonikalaki deʼ tonihihowono, hababu anidemo-demo mahirete ngona inikalaki.

⁷Natobote ngona o nyawa madodihiraka inihingohaka? Ngona nohimangika maöraha hagala ol̄oku wohidadi?

⁸Boteka ngona noihene ma Jou Madutu wadiai Aimanarama madatoro? Boteka duga-duga ngona dema ënanga o nyawa manga bobarija?

⁹Hagala nohi öri-öriki, ngomiö mihiöriki; hagala nomangongarati, itararono ngomino.

¹⁰O barija nënanga ngomi miatarima o nyawa yadodudutuino; ani ama womakil̄auuahi önanga nagaka!

¹¹Yadodoa ma Jou Madutu Ai lolaru noluku natarima? Ngomi mitemo de mia sabari deʼ mabole mangale de Ai römanga.

¹²Mä ngona aniawunu idoa, ani lako majanga-janga;

¹³ngona nïngamo ma Jou Madutuika deʼ nïngelo.

¹⁴ Boteka o nyawa kamamoiuku yahowonua? Yakunu ünanga watiai ma Jou Madutu Ai himangoka?

¹⁵Igoungu kaö malaikatikaö ma Jou Madutu wangakuua; önanga yatebinua Ai lolegaoka.

¹⁶Okia hongoli, o nyawa manga kalakuanga itotorou deʼ ipese-peseke, ya okere o dorou hokä o akere dika.

¹⁷Noihene Ayub, ngona aha toni hitararono okianaga moi,

¹⁸ihidödoto-dotoko o nyawa yososawaro ngohino. O dodotoko gënanga watarima ai ete de ai tohoraino, deʼ wohi gila-gila ingodu-ngodumu aidifaukuika.

¹⁹O öraha gënanga moiua o nyawa maporetino toönanga manga bereraka; koiwa yahirörehe-rehene önanga ma Jou Madutuino.

²⁰O nyawa madorou yatötuku-tuku imahikoka nyawa, aha yamao manga hininga mahuha ai wowango magurutu!

²¹Ma ilingi homodo-modongo yatopongono ai ngauku; maöraha irirïdi yoora-ora yoböa iwiparangi.

²²Koiwa o ngonganono unangika womahirehene o huhutu, hababu yotoma-toma manga o oworo iwiginïki ai öraha iworo-woro magetongo.

²³Hagala o totaleo o kawihi kai totamä ai honenge maöraha, ënanga imau yaol̄omo aimaiyeti. Done ünanga wamao kaihohonguku o wange ai himangika.

²⁴O bodito hokä o koano wonau-nauru, woma bötoka womau wiparangi.

²⁵Hoko gënanga manga wowango o nyawa iwilawa-lawani ma Jou Madutu, deʼ yobarani iwilawani Duru woko Kuaha.

²⁶De ai edenge ünanga wiparangi deʼ wilawani ma Jou Madutu; womägoraka ai dadatoko, ünanga woluku womaike.

²⁸Unanga wogogere hagala o kota hohibari-barihikaoka, hagala o tauoka koö iwa-iwa manyawa yogogerika. Hagala o kota gënanga ihi tantuoka mangale kahirahi idadi magilianga.

²⁹Manga kaya o nyawa gënanga aha hihanga koiwa mario ai arata aha imata kamamoiuku.

³⁰Unanga aha wo otanua o huhutu mahai-haitino; o uku aha yatuhuku madori-dori. Unanga aha wohihanga mangale ma Jou Madutu Ai uru mahaga.

³¹Nako ünanga wangaku ibobaragunaikaua, aha iwi tipu ünanga; deʼ magilioro aha watarima, mabaraguna koö iwa-iwa.

³²Maöraha iboauahi, ünanga aha wohonenge, hokä majaga madengeeti imaai yakunokaua kama gou-gouoli.

³³Unanga hokä o angguru mautu iturabaha mahohoko, hokä o zaitun magota mautu irero mahuri.

³⁴O nyawa madorou aha koiwa manga difauku, manga tau youku imata ihigögoko-goko manga uru bokumu mahasilino.

³⁵Genanga önanga ihidato-datoro o dorou deʼ yadodiai; o tipu iö aka-akali hokogenangika imahiluluino aihininga magoronaka.”