Read Tobelo O AYUB 19 Bible Online

O AYUB 19 - Tobelo bible

O AYUB 19

¹Mä o Ayub wohaluhu, ”Yadodoa hokogenangika ngini niahiri tongohi ahihininga, deʼ ngini nihihangihara de niademo-demo?

³Nihi gali-gali ngini nihihikauku ngohi, deʼ ngini nihianiaya ngohi niamaoua inïmal̄eke.

⁴Hohiade ihowono ahimanarama, gënanga inihirugiua ngini.

⁵Ngini niapikiri niadiri iholoi yaoa ngaro de ngohi; ahihuha ngini niapulono ahihowono manyonyata.

⁶Nihiöriki ngohi magogiria ma Jou Madutu wohihangihara, deʼ wohitagoko Ai dadagoko magoronaka.

⁷Ngohi toma rohu-rohu karana Ai hayanga koiwa gënanga, mamoiuaöihi legaika ngohi, topöaka, ”Kiaka o adili,” mäkoiwa ihihi gihenika ngohi.

⁸Ma Jou Madutu wabeno ahingekomo, ngohi takunua taböa, hagala ahi ngekomo maiteteke Wadiai duru kohä mohuhutu.

⁹Unanga wäora ahiarata mata-mata, deʼ ahiromanga maoa Wadadidorou.

¹⁰Unanga wohi gohara ngohi hagala o ngïno, hokä o nyawa yarahuku o ngutuku yadato-datomino, daha Wamal̄aika ibabiti deʼ imaai, hoko gënanga wodohigoraka hagala ahi ngonganono.

¹¹Ma Jou Madutu Ai dohata ngohino ihiru-hiru; ngohi Wohipulono hokä Ai haturu.

¹²Ai duduono ihiparangi wakunua watatoko; ahingekomo wodohurutuku, deʼ ahitau-tau ihigororomino.

¹³Ahi roriadodoto imahikurutika dede ngohi; ngohi todadi o nyawa maporetino mangale mata-mata mimakokanako.

¹⁴Mata-mata ahiahali itö tigi-tigi imahi kurutika manga diri; ahi dodiawo ihihininga okauaoli ngohino.

¹⁵Ahi gilaongo o ngoheka ihiwohanga ngohi o nagona, toönanga manga tuanga; ihipulono ngohi o nyawa ihinakoua ngohi.

¹⁶Tiahoko ahigilaongo, mä ünanga wohibaluhua, ngaroka tibaja ünanga de tabole-bole.

¹⁷Ngohi hekata yatoka mowunanga ma ame ahiwomaha mabounu, ahiriadodoto madutu yoluku ihitigino.

¹⁸Ngohi ihihikauku o ngoha-ngohaka o ngekomoka; nako ngohi tomaokoil̄e, ngohi ihigogiete.

¹⁹Ihimake, ahidodiawo itö tigi-tigi yamao yaporohono; ngohi ihimal̄a önanga tahö hohininga.

²⁰Ahi röehe igogogere ahikai yahawoino ahikobongo; ngadeke dika ngohi tohonenge deʼ ahijiwa ihihaili.

²¹Hei ahi dodiawo, nihihininga ngohi, hababu ma Jou Madutu Ai giama ihi gohara ngohi.

²²Ma Jou Madutu salalu wohitukü ngohi; yadodoa ngini nima duru Unanga? Nio gihounuahi ngini nihihangihara?

²³Aa, tanu ahidemo-demo niatulihi, hiädono aha salalu niohininga;

²⁴tanu deo behi niahonotoko o helewoika, hupaya itedekana o öraha magurutu.

²⁵Ngohi tohiöriki o horogaka naga wohirö riwo-riwo; mabaha Unanga ahawoböa wohiriwo ngohi.

²⁶Ngaroka ahi kai yanabo-nabo deʼ kai dilo-dilongo, mä madekana ngohi de ahiröehe, aha timake ma Jou Madutu.

²⁷De ahi lako mahirete Unanga aha timake, deʼ ngohino Unanga wodadi ahi hobata. Ahi hininga iwedere hababu ngini nitemo,

²⁸”Sarakia madodagi ngone hikalaki?” Ngini nihilingiri o titi mangale nidiai o perekara.

²⁹Mä, öraha nënanga niomodongo o oworika! Hababu ma Jou Madutu wämuruka deʼ wähukumu o nyawa baradoha; done nihiöriki ngini, naga ma Jou Madutu wä adili o nyawa.”