Read Tobelo O AYUB 2 Bible Online

O AYUB 2 - Tobelo bible

O AYUB 2

¹O dodadi-dodadi o horogaino iwihimangoli ma Jou, de wobö baja-baja nagali toönanga manga hidogoronaka.

²Daha ma Jou wileha unangika, ”Okiaka deʼ naino ngona?” Wobö baja-baja wohaluhu, ”O dodagi tongikangino deʼ taino deʼ todadagi o dunia.”

³Ma Jou woleha, ”Boteka nimakeoka ahi gilaongo o Ayub? O dunia ingodumu moiua o nyawa hoko gënanga manga setia deʼ manga hininga maoa hokä ünanga. Unanga wohihuba Ngohi deʼ kautuo deʼ koiwa wodiai o dorou. Unanga kahirahi wosetia Ngohino, ngaroka ngona nohi bajaoka Ngohi nihi bodito ünanga deʼ koiwa mahababu.”

⁴Mä wobö baja-baja wohaluhu, ”O jiwa deʼ o röehe madumuloa iholoi iragane ngaro deʼ o arata. O nyawa yoigo ihihuba hagala toünanga wadodutu-dodutu itiünanga yakunu wowango kahirahi.

⁵Hohiade ai röehe nahiri, maraioka ünanga aha gila-gila woni lolai Ngona!”

⁶Done ma Jou witemo woböbaja-bajaika, ”Kayaoa, nadiai okia dika dede ünanga, itiuha nitoma ünanga.”

⁷Daha woböbaja-baja ma Jou Ai himangoka deʼ wöiki, deʼ wohi puda o boroho o Ayub ai röehe yamode-modekika ai l̄ou mahoatoka de yail̄e hiädono ai häekil̄e.

⁸Daha o Ayub wogogeruku o wal̄e madudumo madatekoka, deʼ womäl̄e o hepe mabela-belaka mangale womahi rago-ragoho ai röehe.

⁹Ngoi hekata mitemo unangika, ”Kiaka yakunu ngona kahirahi nosetia ma Jou Madutuika? Ika, nihilai Unanga, daha nohonenge!”

¹⁰O Ayub wohaluhu, ”Ngona notemo hokä o nyawa yofuma-fuma! Kaiyakunu ngone duga-duga homau hatarima okia maoa-oa ma Jou Madutuino, hodai totorou ngone hatila?” Ho, ngaroka o Ayub waohana hagala o huha gënanga, ünanga wahetongua o demo-demo iwilo lawa-lawani ma Jou Madutu.

¹¹O huha iwibö babanga o Ayub yoihenoka ai dodiawo yaruange, enagënanga o Elifas o Teman makotaino, o Bildad o Suah manyawa deʼ o Zofar o Naamah manyawa. Onanga imakaturu yomau iwïlega deʼ iwilaru.

¹²Mä maöraha magurutoka deʼ önanga iwipulo-pulonino, önanga ngadeke iwinakookauaoli. Onanga yoari deʼ makuatil̄e deʼ yakakihi toönanga manga pakeanga ikali ihibarihi o kafo o gitawail̄e deʼ manga häekoka.

¹³O wange tumidi deʼ o hutu tumidi önanga yogogeruku o tonakoka, o Ayub ai datekoka, kao demo o doaka moiö deʼ koiwa yotemo, karana önanga iwimake hokokia madubuho ai hangihara.