Read Tobelo O AYUB 21 Bible Online

O AYUB 21 - Tobelo bible

O AYUB 21

¹O Ayub wohaluhu, ”Ni ihene okia aha totemo; duga-duga gënanga togahoko hokä o lolaru.

³Nihi higumal̄a ngohi tatagali ahidemo, iböto gënanga iyakunoli ngini nihihikauku!

⁴Deo nyawaua ngohi mimateke ributu, hoʼ yadodoua nako ngohi kuranga tosabari.

⁵Nihipulono ngohi, done ngini aha niheranga, ngini nibobotil̄e niauru itamunoka.

⁶Nako tapikiri ahirupa nënanga ngohi tohaharoka karana toborohono.

⁷Yadodoa o nyawa madorou ma Jou Madutu wahidöaka o umuru magurutu, deʼ toönanga manga arata hoko genangika idogo-dogo?

⁸Onanga yowango iyaoaka madekana hiädono yamake toönanga manga ngohaka de manga danongo idadi yobaluhu.

⁹Toönanga manga tau manyawa yorïdi yosanangi; ma Jou Madutu wadotagaoua o huha onanguku.

¹⁰Toönanga manga aiwani idogo ifaata, deʼ ihuhaua, ingohaka.

¹¹O nyawa madorou manga ngoha-ngohaka imatototubo de manga morene, hokä o duba magö imore-morene.

¹²Ihi nïki o rebana mailingi, o sulingi deʼ o kecapi, önanga yorame yonyanyi deʼ yoselo-selo.

¹³Hagala manga wange yamata o utumu magoronaka, deʼ önanga yohonenge iomanga o dame.

¹⁴Enahioko önanga yotemoka ma Jou Madutuika, ”No mahikurutika dede ngomi deʼ noikoka! Ngomi mihaduliua deʼ mioigoua mimangarati anidungutu deʼ Animau mangale tongomi miangango.”

¹⁵Onanga manga dibanga, ”Iwi leleani ma Jou Madutu koiwa ma baraguna, deʼ ima niata Unangika koiwa mafaida.

¹⁶Koigoungua karana tongone dika nanga kuata, hamake hagala tongone nanga dungutu deʼ manga dumutu?” Mä ngohi mata-matauku tohigoungua deo dibanga deʼ o damake mangekomo hoko gënanga.

¹⁷Boteka mamoi iböto o nyawa madorou manga padamara wahonenge, deʼ önanga yäbänga o huha deʼ o bodito? Boteka mamoi iböto ma Jou Madutu wangamo onangika, hiädono önanga Wähukumu?

¹⁸Boteka mamoi ibötoönanga hokä o gandum maröehe madoolenge deʼ o kafo yawuwu o rato deʼ o hidal̄oko?

¹⁹Ngini niato, ”O ngohaka ma Jou Madutu wahukumu karana ai ama ai baradoha.” Mä totemo: O nyawa baradoha gënanga kokiani ma Jou Madutu wahukumu, hupaya önanga imamao karana toönanga manga baradoha, done ma Jou Madutu wohidingoto Ai hukumanga.

²⁰Mal̄aika o nyawa baradoha yatagongo manga baradoha mahirete, mal̄aika yamao ma Jou Madutu Woko Kurutil̄e ai muruka.

²¹Nako o nyawa imata manga öraha o duniaka, ünanga kawahaduliohi boteka ai tau manyawa youtumu?

²²Yakunu o nyawa iwidotoko ma Jou Madutu, enahioko ma Jou Madutu mahirete wahakimi o dodadi o horogaka?

²³Naga o nyawa yotumuloa madekanino yowango; ünanga wo honenge de womahi gogihounika deʼ ai hininga iworo-woro. Ai honenge irïdi de wamao woutumu, ena hioko ai röehe kama kua-kuatohi.

²⁵Mä nagali yohonenge iomanga o hangihara, komamoiua wajame o utumu.

²⁶Mä o lungunoka, önanga imakiniki yorubaiha; yahidoomuino o gaili deʼ o kulubati.

²⁷Igoungu ngohi tohiöriki okia ngini niapikiri deʼ hagala o dorou ngini nihidatoro.

²⁸Nia loleha, ”Kiaka yokokuaha manga tau Yododiai o manarama isosetiaua?”

²⁹Komaiwahi ngini nialeha o nyawa manga ngöe yöoi-oiki? Kaningakuahi ngini o abari önanga ihingö ngahu-ngahu?

³⁰Onanga yato, ”Mawange ma Jou Madutu wohidöaka o hukumanga, yododiai o dorou aha wahihalamati.”

³¹Moiua yongelo ai kalakuanga; moiua yabalahi ai dorou.

³²Unanga iwiao o jereika, deʼ iwihingohama o lungunu ma baiti magoronaika; ai jere yogoana deʼ yapaliara.

³³O nyawa de manga ribuhu imadagi yanïki ai mayeti; de o tonakö yabole-bole iwipohuku.

³⁴Ho, anilolaru gënanga kaohomoa deʼ hagala ani bobaluhu kaieluku!”