Read Tobelo O AYUB 22 Bible Online

O AYUB 22 - Tobelo bible

O AYUB 22

¹ Daha o Elifas wotemo, ”O umati o nyawa manga hidogoronaka, moiuaö yobaraguna ma Jou Madutuika. O nyawa duru manga akali isosawaro, duga-duga yobaraguna mangale manga diri mahirete.

³Boteka naga mafaida mangale ma Jou Madutu, nako ngona nadiai Ai mau? Boteka naga mautumu mangale Unanga, nako ani ngango itö totomo?

⁴Koigoungua karana ani modongo ma Jou Madutuika, ngona inikalaki deʼ inipulono nahowono,

⁵mä karana anibaradoha ilamokoholi, deʼ duru itorou anijojobo deʼ anikalakuanga.

⁶Nako aniriadodoto wakunua wafangu ai nagimi, naora mata-mata ai pakeanga.

⁷O nyawa yabole-bole nahidöakua yokere, yahähahini nahilehaua o inomo.

⁸Napake o pangkati deʼ o kuaha mangale nal̄ë dema tonaka mata-mata.

⁹Kao bobao-bobaoua dika ngona nariwoua, mä o ngohaka o gohihi madutu ngona natukuoli.

¹⁰Karana gënanga inikilolitino, öraha nënanga iomanga o dadagoko, dei todokanino anihininga yahawoino o modongo.

¹¹O wange iholoi ihuhutu, nakunua ngona nomahimake; ngona inilutu iniolu o nguihi homodo-modongo.

¹²Koigoungua ma Jou Madutu wögogere o dihanga magogurutil̄e, deʼ kadaku de wauku wolega, hagala o murumu duru ma gogurutil̄e?

¹³Mä ngona noleha, ”Okia wohiöriki Unanga? Unanga naga o lobi maporetoka deʼ wakunua wona adili ngone.”

¹⁴Ngona natobote Ai lolega yatamunu o lobi deʼ duga-duga mabatingoka o dihanga deʼ o dunia mahidogoronaka Unanga wotagi?

¹⁵Boteka ngona kahirahi nomau natilakuru hagala o nyawa madorou ima ngiri-ngiriki manga ngekomoka?

¹⁶Onanga yadohigoraka maöraha manga honenge iböauahi, deʼ yahinahini o nguihi iö olu-olu.

¹⁷Onanga gënanga yobarani iwieluku WokoKuaha, deʼ yatobote Unanga wakunua okianaga wodiai onangika.

¹⁸Enahioko ma Jou Madutu wahidadioka önanga yokaya! Igoungu ngohi tomangaratiua o nyawa madorou manga dibanga!

¹⁹O nyawa maoa, yoiete iomanga o morene, nako yämake o nyawa madorou yamake o hukumanga.

²⁰Hagala o nyawa madorou manga kiahonanga iwedere ibinahaka, deʼ o uku yatuhuku yamata okia mahou-houohi.

²¹Ee, Ayub, nimadame dema Jou, hupaya ngone namake o dame. Nako gënanga ngona nadiai, maraioka ngona namake o utumu.

²²Natarima okia woni dotokoka ma Jou ngonaika; nagogono gënanga mata-mata anihininga magoronaka.

²³Nomaidulu ma Jouika de anihininga maboluluku o dorou anitauoka kokiani nohibobaha.

²⁴Naumo anigurasi duru madutu; nohikaweli o ngairi mabuku-bukuuku koiwaka maakere.

²⁵Mal̄aika Woko Kokuaha wodadi anigurasi, deʼ anihaaka duru ibaraguna.

²⁶Done ngona yakunu hoko genangika ningaku ma Jou Madutuika, deʼ nohiöriki Unanga aniutumu matiti.

²⁷Nako ngona nomä niata, Unanga aha wonïbaluhu, deʼ ngona yakunu nohitotomo hagala ani jaji.

²⁸Ani hidailako ahaihasili salalu, deʼ o dararono aha yodihiwara aningango.

²⁹O nyawa imaö ede-edenge ma Jou wahikauku, mä manga hininga ipopoluluku wahihalamati.

³⁰Ma Jou Madutu aha woniriwo nako ngona nahowonua, deʼ nako ngona nadiai Ai mau.”