Read Tobelo O AYUB 24 Bible Online

O AYUB 24 - Tobelo bible

O AYUB 24

¹Yadodoa ma Jou Madutu wohitatapua o juru hakimi mawange, hupaya nako hagala o nyawa iwinö nako-nako yamake o adili?

²Naga o nyawa ihi rehene o batingi manonako, hupaya ai tonaka idadi ilamokika. Onanga yatohiki o duba matika, deʼ yakurunga toönanga manga duba makurungaka.

³O ngohaka o gohihi madutu manga keledai, önanga ihioaara; o bobao momatengo amihapi, önanga yal̄ë dema pakisa hokä mahidodanu.

⁴Onanga yatatoko o mihikini manyawa yamake manga haku, done pakisa imangiunu yohö hangihara.

⁵Ho, yomomihikini gënanga hokä o keledai ihü huhuku imä lingiri o inomo o tonaka malua-luasi mamö momoka; duga-duga hagala o ngïoka gënanga dika naga o inomo mangale manga ngoha-ngohaka.

⁶O nyawa mahomoa manga dumule pakisa ünanga wakarajanga; o nyawa madorou manga angguru mahohoko kokiani ünanga watoomu.

⁷Toünanga koiwa ai gal̄oko deʼ ai pakeanga wohihauku ai röehe maöraha o hutu-hutu.

⁸Unanga iwipehaka o awana iriki-rikimi ol̄okuoka, daha womahidutukika ol̄oku o helewoika mangale woma hohongo.

⁹O nyawa madorou imagilaongo o ngohaka koiwa manga ayo de manga ama, deʼ yal̄ë o mihikini manyawa manga ngohaka magil̄au yonö nagi-nagimi onangika.

¹⁰O nyawa mihikini yöiki koiwa manga inomo; ünanga iwihahini ünanga kawo utukohi o gandum o dumuleoka.

¹¹O zaitunino ünanga wodiai o minya deʼ o angguru mahohokino, ha oke-okere, mä ünanga mahirete duru ai kiriti madudungu.

¹²O kota-kotaoka hoihene o nyawa tigi-tigi yohonenge manga gurihi, o nyawa yänabo-nabo yopöaka yogahoko yähouru, mä ma Jou Madutu woihenua toönanga manga niata; Unanga woluku walegaika önanga.

¹³Naga o nyawa yaoluku o dararono deʼ yohaturu, önanga yanakoua deʼ yanïkua aingekomo.

¹⁴Maöraha ihohuhutohi wotoma-toma womomiki ai ngidu-ngiduino, daha wohupu watoma o nyawa yohohangihara, deʼ ko o ngoruminouahi, ünanga wahidonga-donga hokä yo tohi-tohiki.

¹⁵Wo howo-howono wodamä o bimaoa; wapake o kokokudu hupaya o nyawa iwi nakoua.

¹⁶Wotohi-tohiki wakilianga o tau o hutu-hutu; maöraha o wangeoka ünanga womahirehene o dararono deʼ woma ngiunu.

¹⁷Unangika, o ngorumino duru ai momodongo, mä o huhutu homodo-modongo, iwisanangi.”

¹⁸Daha o Zofar wato, ”O nyawa madorou yahi nahini o nguihi, ai tonaka madutu ma Jou Madutu walolai; ai angguru madumule öraha nënanga irïdi; moiua yokarajangoli genangoka.

¹⁹Hokä o domoata ihihanga yakorona o ngogoro deʼ o wange malako, hoko gënanga o nyawa baradoha ya l̄ahiri o nyawa yohone-honenge manga dunia magoronauku.

²⁰Ngoi ayo mahirete miwohanga ünanga, deʼ hagala o kulubati ya ol̄omo ai röehe. Ai romanga aha yohiningaokauaoli; ünanga iwihohihanga hokä o gota iheleuru.

²¹Mata-mata gënanga idadi karana ünanga wätuku o bobao-bobao, deʼ wodiai mahayanga koiwa o ayoika ami ngohaka o nauru koiwa-iwa.

²²Mä ma Jou Madutu, de Ai kuaha, wäduhu o nyawa yo kua-kuata. Ma Jou Madutu Aijojobo, done yohonenge o nyawa yososetiaua.

²³Ma Jou Madutu wihidöaka ünanga wöwango isanangi, mä watailako woma togu-togumua.

²⁴Duga-duga öraha utu ünanga wowango woutumu, mä ipaha wöiki mangale kahiado-adonika. Unanga womaai hokä o momo ibaragunaua; hokä o gandum magobe yautuku maröehoka.

²⁵O nagona yakunu ihipongono manyonyata gënanga, ekola yalawani ahidemo madiai?”