Read Tobelo O AYUB 27 Bible Online

O AYUB 27 - Tobelo bible

O AYUB 27

¹O Ayub wohi gila-gila ai hitararono, wato, ”De ma Jou Madutu wowango-wango, wohi hidöakua o adili ngohino,

³ngohi tokoboto: Madekana ma Jou Madutu kawo hihidöakohi o womaha ngohino, madëkana ahi jiwa kanagaohi ahi röehe magoronaka,

⁴ahi uru makai aha yahetongua o tengeluku mademo, ahi akiri aha ihi demoua o tipu itotorou.

⁵Ho, ngohi toluku totemo ngini nitiai; hiädono tohonengö tasoso ngohi topesekua.

⁶Ngohi kahirahi toma hijojo ahi hingounika, deʼ ahi hininga magoronakaö hoko genangika itebini.

⁷Tanu ahi haturu wahukumu hokä yososetiaua, deʼ ahi lawani wagohara hokä o nyawa madorou.

⁸Boteka manga ngonganono mangale o nyawa madorou maöraha ma Jou Madutu wal̄ë Ai jiwa?

⁹Boteka ma Jou Madutu aha woihene ai gari maöraha o huha iwi tapal̄u ünanga?

¹⁰Kokiani ünanga wömau o sanangi ma Jou Madutuika, deʼ womä niata Unangika wamaoua iwi bole.

¹¹Ngohi aha tinï dotoko mangale ma amoko Ai kuaha ma Jou Madutu, tini hingahu nginika Duru woko Kuaha ai datoro.

¹²Mä, ngini mata-mata niwi makeoka mahirete, Hoʼ, yadodoa ngini nihidöaka o nasihati koö iwa-iwa mamangarati?”

¹³Daha o Zofar wotemo, ”Hoko nënanga madodagi ma Jou Madutu Duru woko Kuaha wähukumu o nyawa yolalalimi deʼ yososetiaua.

¹⁴Nako aingohaka yowöe, önanga aha yohonenge o parangi magoronaka deʼ aingohaka de ai danongo aha yowango dema kuranga.

¹⁵Ai dutu kanagahi, yohonenge karana o panyake o bobaku, deʼ hagala manga babao yagariua önanga.

¹⁶Kaiyakunu dika ai haaka itotoporono deʼ ai pakeanga ilape-lapeil̄e,

¹⁷mä o haaka deʼ o pakeanga gënanga mata-mata aha idadi o nyawa manga hininga iriko-rikoto madutu.

¹⁸O nyawa madorou manga tau ibabiti hokä o arara maigutu, duga-duga o tau womahi jai-jai hokä womatengo wogoa-goana ai hohohongo.

¹⁹Unanga waluluiha ai diri hokä o kaya manyawa, mä ünanga wakunua wogilio, maöraha ünanga womaidu womomiki ihihanga ibinahaoka ai kaya.

²⁰Homodo-modongo iwitapal̄u hokä o taufani iboa itodokanino. O rato o hutu-hutu iwiwuwu deʼ iwililiara ünanga wöiki.

²¹O hidal̄oko o wange mahiwara iwigoraka ünanga, deʼ ai tauoka de iwihi haili.

²²Unanga iwiolu koiwa mahayanga, deʼ pakisa woara womä lingiri o hohohongo.

²³Iwiotaka, o nyawa iwitarima de yopopoka; okiaka hononga ünanga wamake o hikauku.”