Read Tobelo O AYUB 28 Bible Online

O AYUB 28 - Tobelo bible

O AYUB 28

¹Naga yofai-faiti kiaka yamake o haaka; naga o ngï kiaka o gurasi yatebi-tebini.

²O behi yofai-faiti o tonaka magoronaino; o helewoino yauihi o tabaga.

³O huhutu ihai-haiti yatotara, o ngï duru iluku-luku yatailako. Genangoka, o huhutu magoronaka, o nyawa yolingiri hagala o helewo.

⁴Mangïoka dema gurutika koiwa naga yogogere, komaiwahi yadoko deʼ yanonu, o nyawa yokarajanga ikali imanune o guminoko o pidaha magoronaka duru irö rirïdi.

⁵O tonaka ihihasili o inomo mangale o nyawa, mä o tonaka matimiukuö gënanga, mata-mata yaidulu yawedere hiädono o dunia madol̄a hohibari-barihi.

⁶O helewo o tonaka magoronaka yongohamika o nilam mahelewo, deʼ makafo imahidol̄a o gurasi madutu.

⁷O totaleo o kawihi yanakoua o ngekomo dokengika, deʼ o totaleo o kol̄obaö komaiwahi ihoho mal̄okuoka.

⁸Komaiwahi o singa ekola o aiwani ihohatera mahomoa yanonu o ngekomo irirïdi yameta dokengika.

⁹O nyawa yafaiti o helewo magoronaika ngaro hokokiaö ma dogowini, yakilianga ol̄oku hiädono mangutukuku.

¹⁰Maöraha ünanga wodiai o pidaha o helewo ol̄oku magoronaoka, wamake o paramata duru dema ija-ijaoka.

¹¹Hiädono hagala o ngairi matitiuku ünanga wafaiti, daha wahelenga okia iö iu-iunu.

¹²Mä okiaka o barija yakunu halingiri? Kiaka ngone hakunu homä dotoko la homangarati?

¹³O barija koiwa o nyawa manga hidogoronaoka; koiwa ihiöriki maragane dema gou-goungu.

¹⁴O gahi mabuku-bukuuku deʼ o ngöto itemo o barija koiwa enangoka.

¹⁵O barija hakunua hohitagali ngaro deo gurasi madutu, dede o haakaö hakunua hohi ija.

¹⁶O gurasi deʼ o paramata duru maija-ijaka, yakunua imatero maragane.

¹⁷O gurasi ekola o kahina maaluhu yakunua imatero dede ënanga, yakunua ihifangu deo bunga mangï o gurasi.

¹⁸O barija iholoi ikurutil̄e maragane, ngaro de manyi-manyi, o kristal, ekola o muhutika.

¹⁹O paramata mahelewo madutu deʼ o gurasi madutu, ikuranga maragene deo akali maoa-oa.

²⁰Kiaka o barija matiti? Kiaka ngone hamake o mangarati?

²¹Koiwa o dodadi iwango-wango mamoi iböto iwimake, hoko genangö o totaleo o dihangoka iwimakeua.

²²O honenge deʼ o binahaö itemo, önanga duga-duga yoihene kamabararono mata-mata.

²³Duga-duga ma Jou Madutu wohiöriki o barija naga mangï, duga-duga Unanga wohiöriki mangekomo dokengika.

²⁴Karana ünanga kawapulono o dunia mabaha-bahaika; hagala moi-moi o dihanga matimiuku Unanga watailako wohidodiai.

²⁵Maöraha o hidal̄oko wohidöaka o buturungu, deʼ wohitatapu o ngöto mabati-batingi;

²⁶maöraha wohitantu o awana itifa mangïuku, deʼ o ngekomo yanïki o leletongo deʼ o dotoreke;

²⁷o öraha gënanga o barija wamake, wauji maragane, daha wohidöaka mabarakati.

²⁸ Ma Jou Madutu wotemo o nyawaika, ”Mangale niamake o barija, ma Jou Madutu kokiani ngini niwihoromati. Mangale yakunu nimangarati, o dorou kokiani ngini nimahi kurutika.”