Read Tobelo O AYUB 29 Bible Online

O AYUB 29 - Tobelo bible

O AYUB 29

¹O Ayub wohigila-gila ai hitararono, wato,

²”Tanu ahiwowango tamakeoli hokä mahira, maöraha ma Jou Madutu wohi hohongino ngohi.

³Ngohi salalu wohihidöaka o roriwo, watararono maöraha totagi o huhutu magoronaka.

⁴Genanga hagala ahiutumu mawange, maöraha ma Jou Madutu kawohitigiohi wahohongino ahitau.

⁵O öraha gënanga, Duru Woko Kuaha wohidatekukuohi ngohi, deʼ ahingoha-ngohaka naga ihihigilolitino.

⁶Ahi aiwani o gigini ihihasili o susu duru kohängöe. Hagala ahi zaitun mautu ihihasili o minya kohängöe, ngaroka idatomo o tonaka ihohelewooka.

⁷Nako o kota mabalu-baluhu migogere mima kinïki, deʼ tomä l̄ë ahingï toönanga manga hidogoronaka,

⁸o nyawa o gögö ihirehene, de manga japatioka önanga kade ihimake ngohi. O nyawa yobalu-baluhö imaoko demakumati; mangale ihidöaka manga horomati.

⁹O nyawa yolago-agomo imatogumu yotemo-temo,

¹⁰deʼ o nyawa yobö baragunaö yotemoua.

¹¹O nagona dika yoheranga nako yoihene mangale ngohi; o nagona ihimake ngohi, Ihi giriri ahi oa-oa.

¹²Hababu, tariwo o nyawa mihikini yogaho-gahoko o roriwo; tariwo o gohihi madutu koö iwa-iwa toönanga manga dididiki.

¹³Ngohi ihihigiriri o nyawa duru yohöhuhuha, tariwo o bobobao hiädono önanga yosanangi.

¹⁴Ahi jojobo irikoto koiwa makuranga; tasösö o adili hoko genangika.

¹⁵Mangale o nyawa yopilo-piloko, ngohi todadi manga lako; mangale o nyawa yolugu-lugu, ngohi manga l̄ou.

¹⁶Mangale o nyawa yomömihikini, ngohi todadi manga ama, mangale o nyawa maporetino, ngohi todadi tarö riwo-riwo.

¹⁷Mä o nyawa manga hayanga koiwa-iwa manga kuaha, tatobiki, deʼ toönanga manga huhuba tohihalamati.

¹⁸Ahi ngonganono enagënanga tadono o umuru magogurutil̄e, deʼ tohonenge tö rirïdi ahi tauoka mahirete.

¹⁹Ngohi hokä o gota mautu iwango iburere, mangutuku iyaoaka yaokere deʼ o dumunitara yapehaka majaga-jaga.

²⁰Ngohi salalu ihihigiriri mata-mata o nyawa, deʼ komaiwahi ahikuata ikuranga.

²¹Hagala o nyawa yorïdi, nako ngohi tahidöaka o nasihati; hagala ahidemo önanga yoihene de madiai.

²²Ngohi totemo-temo iböto moiokauaoli paralu yodogo; o demo yangohama hokä o awana maakere madututu.

²³O nyawa mata-mata yatarima ahidemo-demo de manga morene, hokä yototumule yatarima o awana hagala okia honanga maöraha itori.

²⁴Tagogiete onangika maöraha önanga manga nganono itoaka; ahibiono iö utu-utumu yodogo toönanga manga kuata.

²⁵Ngohila tasö o tutuda, deʼ tal̄ë hagala maputuhu. Tätuda önanga hokä ma koano ai duduono magoronaka, deʼtalaru önanga o hininga mahuha magoronaka.