Read Tobelo O AYUB 3 Bible Online

O AYUB 3 - Tobelo bible

O AYUB 3

¹ Ipaha o Ayub womulaenge wotemo deʼ wohilolai womakil̄au mawange wato,

²”Ya Jou Madutu, nalolai tomakil̄au mawange, deʼ mahutu ngohi ayo mulaenge mohihiao ngohi!

⁴Ya Jou Madutu, nadiai o wange gënanga ihuhutu, Naehe ani hohiningaino hiädono ihihanga; uha Ngona namal̄aoli o cahaya itotararono yodihiwara.

⁵Nohidiai o wange gënanga itaromo ihuhutu, o hagahutu, igawa deʼ ihohonguku; yahawoino de o lobi deʼ o kamo-kamoro, o wange imomulia madararono yataduhino.

⁶Kokiani o hutu gënanga yahihanga o taongo deʼ o mede magë getongino; uhaoli nohininga, uhaoli niahetongo.

⁷Mal̄aika o hutu-hutu gënanga iomanga o huhutu ima goroua, koiwa o dumorene.

⁸Hei o nyawa yohou-houru deʼ o Lewiatan matutuda, yatapal̄u o wange gënanga de o koboto deʼ o lolai;

⁹uha hiädono o koruku itararono, uha imal̄aika ibatingoka madararono itararono! Mal̄aika o hutu-hutu gënanga kaparasuma itamä, iböa o wange deʼ o ngonganono mahungi.

¹⁰O lolai o bodito mahutu maöraha o ngo ayo mohihingohaka ngohi, deʼ ihimal̄aika tatagongo o hangihara.

¹¹Yadodoa ngohi tohonengua o ayo ami mamata magoronaka, ekola ahi ngomaha itoaka maöraha tomakil̄au?

¹²Yadodoa ngohi mohi kololo ngohi meme deʼ mohitotiri ami daparionoka, ikali mohi huhu ami huhuika?

¹³Hokä nako maöraha gënanga ngohi tohonenge, done ngohi tomaidu deʼ tomahi batongo de toriridi,

¹⁴hokä o kokoano deʼ yokokuaha kahuruonikahi, ihigokookali o kadato o öraha madeka-dekanuku.

¹⁵Ngohi toma idu hokä o koano aingohaka o nauru, wohidol̄a ai tau de o haaka de o gurasi.

¹⁶Yadodoa ngohi tomakil̄au koiwaua ahi jiwa hupaya ahi gioko irahai deʼ ahihininga kata wohanga?

¹⁷Dokengoka, o lungunu magoronaka, o nyawa madorou yodiaiua o dorou, deʼ o buru imata manga kuata, yakunu ipaha manga kangela.

¹⁸Yatago-tagokinoö yamao yoworo, yalapahi yadodorohu yagoa-goanino.

¹⁹Dokengoka o nyawa mata-mata kaimaketero: yaheto-hetongo deʼ yamake-makeua o romanga. Deʼ mabobahaka o gogilaongo yolapahi.

²⁰Yadodoa o nyawa yamal̄aika gila-gila yowango yohangihara? Yadodoa o dararono yahidöaka yodöduka-dukaika?

²¹ Onanga iholoi yoigo o lungunu ngaro de o arata, yodamä o honenge, mä de mahiapotua iböa.

²²O utumu aha yakunu yamao nako önanga yohonenge deʼ yälungunu.

²³O öraha mangahimangika önanga wahawoino ma Jou Madutu, önanga yahigilolitino hagala mahimanga.

²⁴Madururu tol̄omo ngohi tomaliwolu, koiwa madodogumu ngohi togigoro.

²⁵Hagala ihihö hawa-hawana, ihitapal̄u ngohi, hagala tomodo-modongo, ihi tioil̄e ngohi.

²⁶Ngohino koiwa marïdi, ngohi tatagongo o hangihara koiwa mabaha.”