Read Tobelo O AYUB 31 Bible Online

O AYUB 31 - Tobelo bible

O AYUB 31

¹Dema koboto ngohi tojajioka o moholehe maboro aha tomipulonua de ahinahihu.

²Okia wadiai ma Jou Madutu ngoneino? Sarakia wabalahi o nyawa manga manarama?

³O bodito deʼ o rugi maraioka Unanga wadotagao o nyawa yododiaika o dorou!

⁴Ma Jou Madutu maraioka wohiöriki hagala ahimanarama; wamake hagala ahiaguru.

⁵Ngohi tokoboto komaiwahi ngohi todiai iadilua; komaiwahioli ngohi tä tipu o nyawa.

⁶Mal̄aika ma Jou Madutu wohitibanga ngohi o didibanga madutu mal̄okuoka, done Unanga aha wohiöriki ngohi tahowonua.

⁷O demo maade ngohi torehenoka o ngekomo madiaioka, ekola ahihihininga yatauru mangale o hali ipese-peseke, nako ahigiama inoda mangale o baradoha,

⁸mal̄aika o nyawa mahomoa yaol̄omo okia tadato-datomo, deʼ mata-mata ahitonaka mahasili ibinaha.

⁹Hohiade mamoi iböto ngohi ihitauru mimakokadateke manga hekatika, deʼ tomangiunika, tomihi donga-donga munanga o ngorana ma poretoka,

¹⁰done mal̄aika ngohi hekata mahakai mangale o nyawa mahomoa; mal̄aika o nauru mahomoa manga dangiroka munanga momarubaiha.

¹¹Nako o baradoha ipese-peseke gënanga igoungu tadiai, ngohi ipatutu tatarima o hukumanga.

¹²O baradoha gënanga ihibinaha hokä o naraka mauku, hagala tapake-pakeino yamata youku.

¹³Maöraha ahigilaongo wotaiana karana ai haku tahowono, tihigihene ünanga deʼ tadiai de ahihininga iriko-rikoto.

¹⁴Nako kowali, sarakia kokiani tihimanga ahi Jou Madutu? Okia tohaluhu maöraha Unanga woböa wohihakimi ngohi?

¹⁵Koigoungua ma Jou Madutu wohihidadi ngohi, wahidadiö ahigogilaongo gënanga?

¹⁶Komaiwahi ngohi toluku täriwo o nyawa yomömihikini, ekola tamal̄aika o bobobao yowango manga nganono itoaka.

¹⁷Komaiwahi tamal̄aika o ngohaka o gohihi yahabirokata, enahioko ngohi mahirete iyaoaka ahi inomo.

¹⁸Mulaenge önanga manga hohumujurohi tapaliara; ahiwowango magurutu tatuda önanga.

¹⁹Nako tamake o nyawa yokuranga, duru yomihikini holi mangale ima ija o pakeanga,

²⁰tihihauku ünanga de o wol mangöere ahidubaino mahirete, done ünanga aha wohi higiriri ngohi de ai hininga magahumu.

²¹Hokä nako mamoi iböto ngohi tä tuku o ngohaka o gohihi, hababu tongaku aha toutumu ahiperekara,

²²done mal̄aika ipagele ahigiama hinotö hiädono ima tingaka ahi belekaka.

²³Ngohi aha todiaiua hoko gënanga, hababu ma Jou Madutu Ai hukumanga duruhe yoborohono ahihininga.

²⁴Komaiwahi ngohi tängaku ahiarata,

²⁵ekola tohi lamo-amoko ahikaya.

²⁶Komaiwahi tahuba o wange ihiwara itararono ekola o medeö itararono marahai.

²⁷Komaiwahi ngohi ihiliko ënanga, ekola taame ahigiama mangale tahoromati.

²⁸O baradoha marupa hoko gënanga ipatutu yamake o hukumanga yahohonenge; karana ma Jou Madutu Duru wo Kokuaha tihipongonoka.

²⁹Komaiwahi ngohi tomahisanangi karana ahihaturu yohangihara, ekola tomorene karana ünanga wamake o bodito.

³⁰Ngohi tomaniatua mangale ahihaturu wohonenge; komaiwahi ngohi todiai o baradoha marupa hokogënanga.

³¹Hagala o nyawa yokokarajanga ngohioka ihiöriki, o nagona dika tahiol̄omo ahitauoka.

³²Ahi tau ihelengaika mangale o nyawa yoi-oiki, komaiwahi tamal̄aika önanga imaidu o ngekomoka.

³³O nyawa mahomoa yaiunu manga baradoha, mä ngohi komaiwa todiai hokä önanga.

³⁴O nyawa yowöe-wöe manga damake tomodongua, deʼ o nyawa manga hikauku, ngohi tahaduliua. Komaiwahi ngohi togogere o tauoka ekola toma rirïdoka dika, duga-duga karana tomodongo aha ihihikauku.

³⁵Koiwa o nyawa yomau ihigihene ahidemo-demo? Tokoboto itiai mata-mata gënanga. Tanu Duru woko Kuaha wohibaluhu ngohi. Hohiade o haturu manga galaki ngohino yatulihi mata-mata hiädono ngohi matamake,

³⁶done de ahihininga ilamoko aha tomahimoku ahibelekaka, deʼ hokä o makota tohitamunuku ahihäekoka.

³⁷Aha tohi ngahu ma Jou Madutuika hagala tadodiai; aha tihimanga Unanga de ahihininga ilamoko deʼ ahihäeke igorakil̄e.

³⁸Hohiade o tonaka tapopajeko tatohikoka, deʼ taora duru wadö dutu-dutu,

³⁹hohiade mahasili tamata ta ol̄omo, deʼ yototumule ima dato-datomo tamal̄aika yahabirokata.

⁴⁰Mal̄aika o jelaiua deʼ o gandum iwango o dumuleoka, mä o momo mahohihika deʼ o momo o nguhumu.” Hiädono genangoka o Ayub ai demo-demo.